JISAYA 17 - Tanou Moonsoi Timugon

Ukumin ri Aki Kapuuno' Siria am Israil

¹ Tuhan mindagu, “Damsyik kalo boo koson ra rondo' bandar, kaa' koson ayuk ra tuntur ru napuut.

² Bandar-bandar giu' ra pagun Siria iruanin ra sabuoi-buoi no. Sapi' am domba salilitau ra giu' no am kolondo' sangulun pana manganjung.

³ Israil matatakan ra panindungan, am Damsyik matatakan ra pampalabusan. Ulun ru Siria ondo' soroi maayag ilo ralalom pagasaban koson ra ulun ru Israil. Aku, Tuhan Ondo' Maayo' Kaga' Kuasa' minindagu noyo.”

⁴ Mindagu Tuhan, “Bulintok nano masuku' paat ra kuasa' ru Israil no langgain, am kinalangkayaan nilono mapuso.

⁵ Israil masauk koson ra umo ondo' ampos nano nakumos noyo, am nokoloso koson ra umo giu' ra Limayak Ripaim paat ra makai' kakumos ampos nano.

⁶ Kalo kukula' ulun ondo' mabayag. Bulintok raginio Israil masauk koson ra puun ru jaitun ondo' kawa' nano nakai' kaupu', am soroi kukula' ngaunor ayuk tampilon ra untu kapoam raan ra magana'. Aku, Tuhan, i Aki Kapuuno' ru Israil, minindagu noyo.”

⁷ Bulintok ru orou raginio matong, ulun sumaguli' makiindangan Riso Namangun risilo, i Aki Kapuuno' ru Israil, i Aki Kapuuno' ondo' matulai.

⁸ Kalo boo lumansan ilo ra altar-altar binaal nilo galama', kapoam lumansan ra kandoi ru kalindu' nilo galama', ioginio sinungkalalaing Dewi Asyira am altar-altar panalaban ra kaminyan.

⁹ Bulintok ru orou raginio matong, bandar-bandar ra mapiot sungka' nano masauk ra mapuut am masiluk koson ra bandar-bandar ondo' iniruanan ru ulun ru Giwi am ulun ru Amori paat ra ilo nagiru' intor ra ulun ru Israil.

¹⁰ Alii ra Israil, nalilianan mu i Aki Kapuuno' ondo' namayag rirun, am ondo' nanindung rirun koson ra gunung batu. Kaa' tinanaman mu umo-umo maantak koson ra dewa-dewa.

¹¹ Kabalu' pana tatanom raginio manalantar am mambusak bulintok ra orou nantanaman muno, kaa' kolondo' niayuk ampos no; ondo' soroi ayuk kapaganan am lugu ra kalo mapali'.

Pagun-pagun ru pantula' kalaan

¹² Bansa'-bansa' ra maikang kumuliasou-asou, am bolos no koson ra nginoos ru kinulun ru raat ondo' mapuor kaga'.

¹³ Bansa'-bansa' jumalai koson ra kinulun maayo, kaa' i Aki Kapuuno' nongompong risilo, am nagiru' ilo mininggalur. Inanjung ilo koson ra apol giu' ra pipilon ru bulur ondo' masiob ru angin, am koson ra kaau ondo' masiob ru bagiu'.

¹⁴ Bulintok mamai' lumaat ilo, kaa' suabon no lumiot ilo. Ginio noyo pangaruan ra moonong ulun ondo' mampagaau ra pagun takano.