JISAYA 16 - Tanou Moonsoi Timugon

Moab kolondo' kalansanan

¹ Intor ra bandar Sila giu' ra tana' kaagisan, namagun ru Moab nangator sanginan domba ra namarinta ra Jirusalim.

² Naginaa ilo ra tobo ru Sungoi Arnon, ruli'-ruli' kolondo' kuayan koson ra susuit ondo' inanjau intor ra bunsut.

³ Mindagu ilo ra namagun ru Jiuda, “Atan kia baalon mai? Sindungi' akaino koson ra puun ru tataun manindung bulintok ra mampayung orou ondo' malasu', am polosoo' akaino sumindung ra saau muno. Akai ti ulun nagigiru'; pasibunio' akaino am pai' kalaat ramon.

⁴ Polosoo' akaino mayan ra pagun mino. Sindungi' akaino intor risilo ondo' masaga' mamuso ramon.” (Pangimbalaan am pamusaan no langgain, am ulun ondo' mamuso ra pagun ru Israil mapuso.

⁵ Kopongo raginio sangulun intor ra papag ri Raja' Daut masauk ra raja' ondo' mamarinta ra ulun nano ralalom katagaman am pampagagayaan. Raja' mataki' lumingat koson mambaal ra katapatan, am mapaundok ra katimpakan.)

⁶ Mindagu ulun ru Jiuda, “Nakaining akai ra limbau ru ulun ru Moab; mapara' piboo limbau am manggo nilono. Kaa' ragu masawat nilono kolondo' onong-onong.”

⁷ Mantangi' ulun ru Moab sabap ra kaimbalaan nilo. Mantangi' ilo bulintok ra ilo mangkara' ra akanon maamis ondo' masalok nilo akanon giu' ra Kir-Garisit. Malumpus ilo.

⁸ Umo mamaar ra Gisybon am umo ru anggur giu' ra Sibma napuso – umo ondo' manangampos ra wain tayar ru ulun namarinta ru ngaangai' bansa' am makagauk risilo. Galing i umo ru anggur no malangka' saboi ra bandar Jaijir, am mongoi tampilon ra sirangon suku' ra tana' kaagisan, am mongoi tampilon ra kalasaan suku' ra sandaup ru Raat Matoi.

⁹ Kaa' ragino tangiin ku puun ru anggur Sibma koson ra tangi' kuno ra Jaijir. Tumulisan lomou kuno koson ra Gisybon am Iliali, sabap kolondo' boo ampos ru tatanom koson mapabansuk ra guang ru ulun.

¹⁰ Ragino kolondo' osoi-osoi pana maansukan ra tana' ondo' malabung no. Kolondo' osoi-osoi pana magitatapap ra longon kapoam marimbai ra umo-umo ru anggur. Kolondo' boo mamaga' ra kawa' ru anggur. Puau ra kaansukan limininos noyo.

¹¹ Mangiluk guang kuno magilong ra babaal ru Moab am Kir-Giris.

¹² Gumogot toojo ulun ru Moab mangkiwa' ra bulur mongoi ra intok sambayangan nilo koson makiasi', kaa' gogot nilono kolondo' onong.

¹³ Gini noyo tanou ondo' ragili pinataak ru Tuhan intor ra Moab;

¹⁴ kaa' ragino mindagu Tuhan, “Ralalom buoi talu ngambilor, nansalinut kinalangkayaan ondo' anggakon ru Moab no mapuso. Namagun nano ra masuang masauk kalo kukula' am malawo.”