JISAYA 15 - Tanou Moonsoi Timugon

Pusoon ri Aki Kapuuno' Moab

¹ Gitio noyo tanou ru Tuhan intor ra Moab. Bandar Ar am Kir pinuso ralalom sorondom ayuk. Titikop pagun ru Moab masauk ra masiluk.

² Mamagun ru Dibon magaloi ra bulur koson mantangi' giu' ra intok sumamba ra dewa. Mamagun ru Moab sasingut-singut manulaboi ra bandar Nibo am Midiba. Kinungkulan nilo abuk am jangut koson tatandu' ra mangulir.

³ Ulun mangkiralan nambayang ra konoon ru karung. Giu' ra tana' nalimparang am pinuusan ru baloi, ulun manulaboi am mantangi'.

⁴ Tangi' ru ulun giu' ra Gisybon am Iliali maining saboi ra Jagas. Saujor-saujor pana monontol; liminawo ilo.

⁵ Makaasi' Aku ra Moab. Mamagun nano nagigiru' giu' ra Joar am Iglat-Silisia. Mokoondo' nagaloi ra ralan mongoi ra Lugit liliwa' mantangi'. Mokoondo' niayuk nagiru' giu' ra Oronaim liliwa' mompogolok am mangiluk sabap ra nalumpa' ru karaat.

⁶ Sungoi Nimrim nalasakan. Sakot ra tobo nano liminonot am kolondo' boo tutuu' ra masansam.

⁷ Ulun sumandaup ra Sungoi Gaarabim koson maguyum ra kaayagan mababaya' ra rapu' nilono.

⁸ Titikop pambaitan ru Moab maining bolos mantangi'. Tangi' raginio maining niayuk giu' ra Iglaim am Biir-Ilim.

⁹ Giu' ra bandar Dibon, timug ru sungoi kiminulau ra malia' sabap ra nararatok ra raraa'. Kaa' i Aki kapuuno' maparatong poyo ra atan ondo' makalalaa' kaga' no ra mamagun ra giu'. Sotopot no moonong ulun ondo' lakat naayag giu' ra Moab potoyon ingguluin.