JISAYA 14 - Tanou Moonsoi Timugon

Sumaguli' Israil ra pamagunan galama'

¹ Makaasi' Tuhan ra ulun Nano Israil am nampili' risilo poyo koson ra longgom Nano galama'. Pinaayan No ilo ra pagun nilo galama' am ulun bansa' suai pana matong am mayan mababaya' risilo ra giu'.

² Masuang bansa' mangindangan ra ulun ru Israil muli' ra tana' ondo' pinataak ru Tuhan risilo. Giu' no bansa'-bansa' masauk ra ulipon ru Israil. Ilo ondo' galing i nangala ra Israil, kalaan ilo boo ru Israil. Ulun ru Israil mamarinta ra bansa'-bansa' ondo' nakaili' nangimbolo' risilo.

Raja' Babilonia giu' ra tana' ru ulun minatoi

³ Langgain ru Tuhan karualan am kaimbalaan ru ulun ru Israil. Palabuson No ilo intor ra kandoi maagat ondo' pinajajal risilo.

⁴ Bulintok ra Tuhan no mambaal koson raginio, asabin nilo raja' Babilonia koson ragitio, “Raja' ra malaat kaga' naratu' noyo! Kalo boo makapangimbolo' io ra osoi-osoi ayuk pana!

⁵ Pinolonggo' noyo ru Tuhan kuasa' ru namarinta-namarinta ra malaat kaga'

⁶ ondo' sumangit-sangit nangimbolo' ra bansa'-bansa' am tanduusin nilo mangimbolo' risilo.

⁷ Pupus nano titikop ru tana' ti makaliman ra kaayagan matanda', am ngaangai' ulun marimbai am makaansuk.

⁸ Puun ru sipris am puun ru sidar giu' ra Libanon pana maansukan ra naratuan ru raja' no, am kolondo' osoi-osoi pana boo mantagar ra puun-puun no bulintok ru raja' no nakaugar noyo.

⁹ Tana' ru ulun minatoi nakatampos noyo koson mangapu ra raja' ru Babilonia. Ulun minatoi ondo' makakuasa' ra tana' ti ra galing i nakaliman am raja'-raja' ra minatoi siminukal intor ra panturungan nilono.

¹⁰ Ilo ngaangai' mampiau ra raja' ru Babilonia, ‘Ragino malawo kou koson ramon! Okou koson niayuk ramon!

¹¹ Galing i urumaton kou ra miujik jitor, kaa' ragino soroi kou ra tana' ru ulun minatoi. Ulor masauk ra intok pambalangan muno am lingguang masauk ra bajang muno!’

¹² Alii ra raja' ru Babilonia, butitin ru susuab ondo' moonsoi kaga', naratu' kono intor ra limbowon! Galing i nangala kou ra bansa'-bansa', kaa' ragino okou pinatiran ra tana'.

¹³ Gumogot kou magaloi ra limbowon am mapauli ra panturungan muno ra rasawat ru butitin-butitin ondo' masawat kaga'. Pangkaraan muno makaturung kou koson ra raja' ra rasawat ru gunung giu' ra ralayo, intok timungan ru dewa-dewa.

¹⁴ Gumogot kou magaloi ra bujuk ra gaun am masauk koson ra Io Ondo' Maayo Kaga' Kuasa'.

¹⁵ Kaa' ragino pinatuun kou suku' tayar ondo' ragana' toojo ra tana' ru ulun minatoi.

¹⁶ Ilo ondo' soroi ra giu' no magilong am mongoror rirun. Mangkuot ilo, ‘Gitio kia ondo' nampakalalaa' ra tana' ti am nampakaliang ra karajaan-karajaan?

¹⁷ Gitio kia ondo' namuso ra bandar-bandar am mangulau ra tana' ti nasauk ra limayak kaagisan? Gitio kia ondo' kalo igondo' papalabus ra ulun rinakop nano kapoam mapalabus risilo muli'?’

¹⁸ Ngaangai' raja' ru bansa'-bansa' ra nakasail linobong ralalom kaansukan giu' ra lobong galama',

¹⁹ kaa' okou kolondo' lobong kabalu' pana baangkai muno patirin am polosoon saboi mapasa' am niayuk matauban ra baangkai ru saujor-saujor ondo' minatoi ra pangayawan. Ngaangai' no pinobobol ra luang ondo' kabatuan. Koson ra baangkai ra kikinjangin,

²⁰ okou kalo lobongon koson ra raja'-raja' ra bokon sabap ra okou namuso ra pagun muno am namatoi ra mamagun muno galama'. Kolondo' sangulun pana ramuyun sambaloi ra mangalaat no bayagon. Ngaangai' no matoi.

²¹ Pangingguluan patalimpuunon noyo. Ngaangai' anak ru raja' ti matoi sabap ra tula ru kinamatuaan nilai. Kolondo' sangulun pana risilo makapamarinta ra tana' ti kapoam mambaal ra bandar-bandar.”

Pusoon ri Aki Kapuuno' Babil

²² Mindagu Tuhan Ondo' Maayo Kaga' Kuasa', “Owoyon am pusoon Ku Babil. Kalo polosoon Ku atan-atan pana maayag, io pana lalaing kapoam osoi-osoi ayuk. Aku, Tuhan minindagu noyo.

²³ Kulawon Ku Babil masauk ra tana' malinjong, am karuui mayan ra giu' no. Pusoon Ku Babil. Aku, Tuhan Ondo' Maayo Kaga' Kuasa' minindagu noyo.”

Pusoon ri Aki Kapuuno' ulun ru Asyur

²⁴ Nampator Tuhan Ondo' Maayo Kaga' Kuasa', “Atan ondo' inatang Kuno masugut. Atan ondo' inaru' Kuno masauk.

²⁵ Pusoon Ku ulun ru Asyur giu' ra Israil pagun Kuno, am manginginjang risilo intor ra rasawat ru gunung-gunung Kuno. Palabuson Ku ulun Kuno intor ra pangimbalaan ru ulun ru Asyur am intor ra kapaganan nilono.

²⁶ Gitio noyo guangon Kuno ra tana' ti; ukumin Ku ngaangai' bansa'.”

²⁷ Tuhan Ondo' Maayo Kaga' Kuasa' namatas noyo mambaal koson raginio. Mangukum Io risilo, am kolondo' sangulun pana makapanginga' Riso.

Pusoon ri Aki Kapuuno' ulun ru Palistin

²⁸ Gitio noyo tanou ondo' pinabala' bulintok ra bilor pinatayan ru Raja' Agas.

²⁹ Alii ra ulun ru Palistin, kabalu' pana tataun lalamba' ondo' pinampalamba' ramuyun no pinandak, pai' kau paringkuanang sabap ra amon santaun kukuo matoi, santaun poyo makalalaa' kaga' no matong. Sanginan tambuakal makakawo mabak intor ra talu' ru kukuo.

³⁰ Tuhan magalung ra ulun Nano ondo' musikin am magibit risilo maayag ra kalinuos ayuk, kaa' porotongon No bitilan ra maaja' no ramuyun, alii ra ulun ru Palistin. Kolondo' sangulun pana intor ramuyun no polosoon maayag.

³¹ Pompogolok no am pampiau no makiindangan, alii ra mamagun ru ngaangai' bandar ru Palistin! Musiti' monontol kau ngaangai' malaa', sabap ra kulampun ru kaau makapal masiob ru angin makito ra ralayo, tatandu' ratangan ru sampulalai ondo' maikang kaga'; kolondo' matalou ra sampulalai raginio.

³² Atan kia pataamon takau ra ulun-ulun sinusub ru ulun ru Palistin? Balain takau ra Tuhan noyo napabigor ra Sion, am ulun Nano naimbolo' makaalap ra sindungan ra giu'.