JISAYA 13 - Tanou Moonsoi Timugon

Mangukum i Aki Kapuuno' ra Babil

¹ Gitio noyo tanou ri Aki Kapuuno' koson ra Babil ondo' inapu ri Jisaya anak ri Amos.

² Paundoko' noyo bandira' ru mangayou giu' ra rasawat ru bulur ondo' malimparang! Pampiau no ra saujor. Painsawato' longon muno koson rondo' pulanu risilo mongoi pamulunsar giu' ra kulobon-kulobon garabang ru bandar ondo' malilimbau no.

³ Tuhan nampiau ra saujor-saujor pinili' Nano. Mangaikang ilo, mintopot guang, am kalansanan Nano. Kandoi nilono intor ra Tuhan koson mangukum ra ulun ondo' natiu' ra sangit Nano.

⁴ Rongogo' noyo nginonsol giu' ra rasawat ru gunung, koson masuang ulun natitimung. Rongogo' noyo kumuliasou-asou ngaangai' bansa' am pamarintaan-pamarintaan ra natitimung. Tuhan Ondo' Maayo Kaga' kuasa' mampatampos ra saujor mangayou.

⁵ Minatong ilo intor ra pagun ra mangaalur, pompor ru tana' ti. Sabap ra sangit Nano, Tuhan matong koson mamuso ra titikop ru tana' ti.

⁶ Pantangi' no sabap orou ru Tuhan mamaar noyo, bulintok ra Tuhan Ondo' Maayo Kaga' Kuasa' mamparatong ra pamusaan.

⁷ Moonong kalindu' ru sasangulun masauk lamumu', am moonong gogot ru sasangulun matatak.

⁸ Mangalaa' ilo am marualan koson ra ruandu' maganak, mototontong ilo ra guang malaa', am bulos nilono malia' sabap mauyu'.

⁹ Orou ru Tuhan no matong, am paat raginio mampaabus Tuhan ra sangit Nano ondo' makalalaa' kaga'. Tana' ti masauk mapua', am moonong ulun makatula potoyon.

¹⁰ Moonong butitin am tinting ru butitin lumasa' sinda no. Mato ru orou lumondom bulintok sumirang am bulan kolondo' boo sinda.

¹¹ Mindagu Tuhan, “Ukumin Ku tana' ti sabap ra kalaatan nano, am ngaangai' ulun sabap ra tula nilo. Paingganaan Ku moonong ulun malilimbau, am mangukum ra moonong ulun ondo' masawat guang am niayuk malaat kaga'.

¹² Ulun ra naayag intor ra karaat no kalo kukula', masuang poyo mas kopoyo ra untobon.

¹³ Limbowon pasaukon Ku monontol, am tana' ti mauyog intor ra intok nano paat ra orou raginio, Bulintok ra Aku, Tuhan Ondo' Maayo Kaga' Kuasa' mapatalang ra sangit Kuno.

¹⁴ Ulun bansa' suai ondo' minayan ra Babil magiru' ra pagun nilo galama'. Mantutuliar ilo koson ra tambang ondo' magiru' intor ra ulun mampalula', kapoam koson ra sampanon ru kambing ondo' kolondo' magagalung.

¹⁵ Osoi-osoi marakop tobokon saboi matoi.

¹⁶ Makakito ilo ra lalagang nilono lambaan saboi matoi, baloi nilono gaawon, am andu' nilono sowoon.”

¹⁷ Mindagu Tuhan, “Paimbuoron Ku ulun Madai maa' raginio mamulunsar ra Babil. Kalo lioon nilo pirok, am kalo mabunduk guang nilo ra mas.

¹⁸ Ulun mamulok potoyon nilo ra panah am tanggayan nano. Kalo makaasi' ilo ra lalagang kapoam lalaing.

¹⁹ Kula' suang ru pamarintaan, Babilonia niayuk maantak am masauk ra kaansukan ru ulun nano. Kaa' Aku, Tuhan, mamuso ra bandar Babil koson ra Aku namuso ra Sodom am Gomora!

²⁰ Kolondo' sangulun pana boo mayan ra giu'. Kolondo' ulun ru Arab mugar-ugar am mangkim ra giu' no, am kolondo' magagalung magibit ra kambing domba koson mongkotop ra giu'.

²¹ Intok raginio ayanin ru bibiag masigo am puok. Susuit unta mayan ra giu' no, am paus sakayat-kayat ra intok napuut no.

²² Bolos ru uku' kataunan am taani mamintanou ra manara-manara am istana-istana. Bulintok ru Babil magagai mamaar noyo, am bulintok no kalo boo kabuoyon.