JISAYA 10 - Tanou Moonsoi Timugon

¹ Aibui boo ramuyun! Nambaal kau ra undang-undang ondo' kalo natimpok koson mangimbolo' ra ulun kuno.

² Ginio noyo namakuan min mongompong ra ulun musikin mangalap ra matanda' risilo am katimpakan, am niayuk mampagaau ra longgom ru ulun napuor am anak nailusan ra matuo.

³ Atan baalon min bulintok ri Aki Kapuuno' mangukum ramuyun ra tauli no? Atan baalon min paat ra Io mamparatong ra karaat intor ra pagun ondo' maalur? Osoi kia pakiindanganan min? Ati papasibunian min ra rapu' kalangkayaan mino?

⁴ Bulintok mangayou matoi kau, kapoam ralaaton koson ra ulun rinakop. Kaa' nasauk pana baal koson raginio, sangit ru Tuhan lakat poyo kalo malulu'; lakat Io poyo masaga' mangukum ramuyun.

Raja' ru Asyur koson kuliamos ri Aki Kapuuno'

⁵ Mindagu Tuhan, “Aibui boo ra Asyur! Pamakuan Kuno ra Asyur koson ra tataun pamalamba' mangukum ra ulun ondo' sangitin Kuno.

⁶ Atarin Ku i Asyur koson mangayou ra bansa' ondo' namatir ra pangintapatan, am ondo' napasingkual ra sangit Kuno. Susubon Ku Asyur mampagaau, mantakou, am manginginjang ra bansa' raginio koson ra losok ru ralan.”

⁷ Kaa' ralalom ru guang nano, raja' ru Asyur mokoondo' ra inatangan galama'. Raja' no moogot mamakai ra undang-undang ra mokotog koson mamuso ra nasuangan bansa'.

⁸ Raja' maayo ragu, “Moonong panglima kuno ioginio sangulun raja'!

⁹ Kinala ku bandar Kalno am Karkimis, bandar Gamat am Arpad. Kinala ku bandar Samaria am Damsyik.

¹⁰ Inukum ku karajaan-karajaan ondo' sumamba ra sinungkalalaing. Sinungkalalaing nilono masuang poyo ka sinungkalalaing giu' ra Jirusalim am Samaria.

¹¹ Pinuso ku Samaria am ngaangai' sinungkalalaing nano. Ragino koson raginio niayuk pamakuan kuno ra Jirusalim am ngaangai' sinungkalalaing ondo' sambaan ra giu'.”

¹² Kaa' mindagu Tuhan, “Amon ru mopongo' atan ondo' baalon Kuno giu' ra Bulur Sion am Jirusalim, ukumin Ku raja' ru Asyur sabap maayo ragu nano am limbau nano.”

¹³ Raja' ru Asyur maayo ragu, “Nansalinut binaal kuno intor ra kaikangan kuno galama'. Mapintar aku am mapandai. Pinuso ku balitan ru pagun-pagun am nampagaau ra inula' nilono. Koson ra sanginan sapi' gawayan, kikinjangin ku bansa' ondo' minayan ra giu' no.

¹⁴ Ngaangai' bansa' ra tana' ti koson ra bunsut ru susuit; gaawon ku rapu' nilono koson kinatasu' ra aku manimung ra talu'. Kolondo' sanginan pana susuit sumugal bulu koson mampakalaa' raki' kapoam mampagaal ra tinduk koson mamios!”

¹⁵ Kaa' mindagu Tuhan, “Makapamanggo kia kapak no ra ulun ondo' mamakai riso no? Maatang kia toojo rondo' garagaji' no ka ulun ondo' mamakai ra garagaji' no? Sala' ka tataun pamalamba' no mampaguut ra ulun kaa' ulun no mampaguut ra tataun pamalamba'.”

¹⁶ Tuhan Ondo' Maayo' Kaga' Kuasa' mamparatong ra maruol koson mangukum ra panglima-panglima ondo' maikang. Matiu' ilo ra maruol ru salom koson ra apui sumolob ra rumalat-ralat.

¹⁷ I Aki Kapuuno' sinda ru Israil, masauk ra apui. I Aki Kapuuno' ru Israil, i Aki Kapuuno' ondo' matulai, masauk ra simbula' ru apui, ondo' songorou no makaumpo ra ngaangai' no, mulu' piboo ru kusingan am alab.

¹⁸ Kataunan makapal am umo ra malabung giu' ra Asyur pinuso toojo koson ra sangulun marualan maimbolo' suku' matoi.

¹⁹ Puun ru tataun kalo kukula' matatang, saboi sangulun lalaing pana makauntob.

Kalo masuang ulun sumaguli'

²⁰ Masaboi niayuk bulintok amon ulun ru Israil ondo' naayag kalo boo lumansan ra bansa' ondo' itik poyo mamuso risilo. Topot-topot ilo malansan ra Tuhan, i Aki Kapuuno' ru Israil, i Aki Kapuuno' ondo' matulai.

²¹ Kalo masuang ulun ru Israil sumaguli' ri Aki Kapuuno' ondo' matulai.

²² Kabalu' pana raino ulun ru Israil masuang koson ra agis giu' kiing ru raat, kalo masuang sumaguli'. Karaat maginaa ra ulun ru Israil am maaya' ilo ukumin.

²³ Sotopot no Tuhan Raja' Ondo' Maayo Kaga' Kuasa' mamparatong ra karaat ra titikop ru pagun ti, koson ra rinagu Nali.

Pagun ru Asyur ukumin ru Tuhan

²⁴ Tuhan, Raja' Ondo' Maayo Kaga' Kuasa' mindagu ra ulun Nano ondo' minayan ra Sion, “Pai' kalaa' ra ulun ru Asyur kabalu' pana mangimbolo' ilo ramuyun koson ra ulun ru Misir ra galing i.

²⁵ Kalo boo mabuoi lumonggo' Aku mangukum ramuyun, am pusoon Ku ilo.

²⁶ Aku, Tuhan Ondo' Maayo Kaga' Kuasa', mampalapos risilo ra pitol lalapos koson ra Aku nampalapos ra ulun ru Midian giu' ra Batu Orib ra galing i. Ukumin Ku Asyur koson ra Aku nangukum ra Misir.

²⁷ Amon ru masuku' bulintok no, palabuson Takamin intor ra pangimbalaan ri Asyur, am kalo boo manguasa' io ramuyun.”

Pantula' manalimpuun ra pamulunsaran

²⁸ Saujor ru pantula' nanguasa' noyo ra bandar Ayat! Nansail ilo ra Migron! Kuliamos linutu' tinatang nilo ra Mikmas!

²⁹ Nansail ilo ra ralan makalalaa' am raino mombolong ilo giu' ra Giba! Mamagun ru bandar Rama mangalaa', am mamagun ru Gibia, bandar ru Raja' Saul nagigiru'.

³⁰ Golok kano, alii ra mamagun ru Galim! Rongogo' noyo, alii ra mamagun ru Laisya! Taam kano, alii ra mamagun ru Anatot!

³¹ Mamagun ru Madmina am Gibim nagigiru' koson maguyum ra kaayagan.

³² Orou raiti' pantula' siminoroi ra bandar Nob; giu' no gonggomon nilo palar tumingkuang ra Bulur Sion, mongoi ra bandar Jirusalim.

³³ Tuhan Ondo' Maayo Kaga' Kuasa' maparatu' risilo koson ra raan-raan ondo' tatason intor ra puun nano. Ulun ondo' malilimbau kaga' am mamanggo no tagaron am asasabin.

³⁴ Tagaron ilo ru Tuhan, koson ra puun giu' tatanga' ru kataunan tagaron ra kapak. Kabalu' pana maikang ilo koson ra puun ondo' moonsoi kaga' giu' ra Libanon, maaba' ilo niayuk.