JIRIMIA 9 - Tanou Moonsoi Timugon

¹ Mapara' piboo bonsoi no amon ru ulu kutu koson ra tulubong ondo' nototop ra timug, am mato kuno koson ra talagusu' ondo' tumilis ayuk, maa' raginio makatangi' aku ra orou am rondom, manulaboi ra bansa' kutu ondo' pinatoi ru pantula'.

² Mapara' piboo bonsoi no amon ru mokoondo' aku ra intok ayanan giu' ra tana' kaagisan, maa' raginio minggalur aku intor ra bansa' kutu. Ngaangai' ilo kalo gumagaya', ilo ulun malaat guang ngaangai'.

³ Masalok ilo tumampos lalair koson magabau; giu' ra titikop pagun ondo' motopot kalo manguasa', tumbalik no gumaai-gaai kalo mabanis guang. Indagu Tuhan, “Ulun Kuno kalo lulumonggo' mambaal ra kalaatan, kalo mangiou ilo Raki' koson i Aki Kapuuno' nilo.”

⁴ Moonong ulun musiti' pagilalain rangan nano; pongkotob pana kalo maintopot. Koson ilo ri Jakub ondo' namparuung ra pabukat nano, am moonong ulun manimbaal ra ragu ra rangan nano.

^5-6 Ngaangai' ilo mamparuung ra rangan, kolondo' sangulun pana mindagu ra motopot. Maindalom ilo mindagu ra magabau, marara' ilo lumonggo' mambaal ra tula. Puka' rayusin ra puka', ruung rayusin ra ruung, rayusin baalon. Minindagu Tuhan ra ulun Nano marara' mulig Riso.

⁷ Ginio ra indagu Tuhan Ondo' Maayo Kaga' Kuasa', “Koson ra ulun mamasau ra basi', ulun Kuno kinamin Ku, maa' raginio masauk ilo ra mapasau. Atan poyo maalap Ku kabaal ra ulun Kuno ondo' nambaal noyo ra kalaatan?

⁸ Rila' nilo koson ra panah ondo' makapatoi; kalo lulumonggo' ilo magabau. Ragu nilono maamis ra mangambi', kaa' sotopot no nampakaang ilo ra pampalandak.

⁹ Kalo kia musiti' Aku mangukum risilo sabap ra binaal nilo? Kalo kia musiti' Aku mansuli' ra bansa' koson raginio? Aku, Tuhan, nakaindagu noyo.”

¹⁰ Aku, i Jirimia, mindagu, “Manulaboi aku ra gunung-gunung am tangiin sakot limayak, sabap ra ngaangai' no napua' noyo am kalo sailin ru ulun. Bolos ru bibiag kalo boo morongog; susuit am niayuk bibiag masigo nagiru' noyo am minugar.”

¹¹ Indagu Tuhan, “Saukon Ku Jirusalim ra intok panunturan ra nangapuut, intok pansibunian ru uku' kataunan. Bandar-bandar ru Jiuda masauk ra masiluk, intok ondo' kalo boo ayanin.”

¹² Pangkuot aku, “Iou Tuhan, kua ra pagun ti nasauk ra kolondo' tutuu' am napua' koson ra tana' kaagisan, saboi kolondo' ulun mansail no? Osoi kia ondo' sama' pintar koson makarati' ra ngaangai' no? Osoi kinua' balain Muno intor ra baal ragitio maa' raginio makapambala' io ra ulun bokon?”

¹³ Taam Tuhan, “Baal raginio masauk sabap ra ulun Kuno kalo boo mampalio ra nangilaan ondo' tinaakan Kuli risilo. Kalo giminagaya' ilo Raki' am kalo siminugut ra susuban Kuli.

¹⁴ Bambalingatan ilo am siminamba ra sinungkalalaing Baal koson ra ondo' nangilaan ru kinamatuaan nilai.

¹⁵ Ginio ra rongogo' noyo ondo' baalon Kuno, Tuhan Ondo' Maayo Kaga' Kuasa', i Aki Kapuuno' ru Israil: Mangani' Aku ra ulun Kuno ra tutuu' mapait koson akanon am tuuwo koson inumon.

¹⁶ Pantutuliaron Ku ilo ra bansa'-bansa' ondo' kalo nauligan nilo kapoam kinamatuaan nilai. Mangator Aku ra saujor koson mamulunsar risilo saboi ra Aku mamuso risilo ra malingon.”

Mamagun ru Jirusalim mampalaa makiindangan

¹⁷ Tuhan Ondo' Maayo Kaga' Kuasa' mindagu ra ulun Nano, “Ilai' noyo atan ondo' nasauk! Piawo' ulun manulaboi ra ginajian. Susubo' ruandu'-ruandu' matong am marimbai ra rimbai panguliran.”

¹⁸ Indagu mamagun ru Jiuda, “Susubo' ilo tumaki' marimbai ra rimbai panguliran ramon, saboi mato mai mototop ra lomou, am bingkolot ru mato mai maasa' sabap ra mantangi'.”

¹⁹ Rongogo' bolos ru tangi' giu' ra Sion, “Natutuk akai noyo! Tinauyu' akai toojo. Musiti' akai mangiruan ra pagun mai; baloi mai linunsai noyo.”

²⁰ Indagu aku, “Rongogo' ragu ru Tuhan, ruandu' kau ngai', talinaasi' ragu Nano. Ilaa' noyo anak-anak ruandu' min ra manulaboi, ilaa' rangan-rangan mino ra marimbai ra rimbai panguliran.

²¹ Kapatayan siminubol noyo minaya' ra gigimpalan, am siminubol ra ralalom ru istana takau; kapatayan siminansar ra anak-anak giu' ra ralan maayo am buayoi-buayoi giu' ra intok malimparang.

²² Baangkai kumalayatan giu' ra ati-ati, koson ra tuntur ru pampalabung ra tana', koson ra gandum ondo' tinantab am iniruanan ru ulun manantab, am kalo linulur ru osoi pana. Nanusub Tuhan raki' mampatanou ra tanou raginio.”

²³ Indagu Tuhan, “Ulun mapintar kalo mamanggo sabap ra kapintaran nilo, ulun maikang kalo mamanggo sabap ra kaikangan nilo, am ulun langkaya' kalo mamanggo sabap ra kalangkayaan nilo.

²⁴ Amon ru osoi pana mamanggo, musiti' io mamanggo sabap ra io nakaulig am nakarati' Raki', am ra Aku noyo Tuhan ondo' motogom ra ulun ra sabuoi-buoi no, am Aku mambaal ra matimpok am motopot. Ngaangai' no makabansuk ra guang Kuno. Aku, Tuhan, nakaindagu noyo.”

^25-26 Indagu Tuhan, “Masaboi paat no ra mangukum Aku ra ulun ru Misir, Jiuda, Idom, Amon, Moab, am mamagun ru tana' kaagisan ondo' nompolontob ra abuk nilo. Ngaangai' ru ulun no sinunatan noyo, kaa' kalo giminagaya' ra nabantuan ondo' tinatanduan ra sunat no. Kolondo' sangulun pana risilo am kolondo' sangulun pana ra ulun ru Israil ondo' giminagaya' ra nabantuan Kuno.”