JIRIMIA 8 - Tanou Moonsoi Timugon

¹ Paat raginio bungul-bungul ru raja'-raja' am pagawai pamarintaan giu' ra Jiuda, am niayuk bungul-bungul ru imam-imam, nabi-nabi am niayuk mamagun ru Jirusalim ra bokon kakalon intor ra lobong.

² Kuayan no sala' ka timungon am lobongon poyo, kaa' koson polosoon ra tana' koson ra pampalabung. Bungul-bungul nilo makulipatak ra matuug ru sinda mato ru orou, sila' am butitin ondo' tagamin, intok mangandoi ayuk, sambaan am pakituluan nilo.

³ Ulun intor ra bansa' malaat ti ondo' lakat poyo maayag, ondo' pinantutuliar Ku noyo ra nansalinut intok, masaga' poyo matoi intor ra maayag. Aku, Tuhan Ondo' Maayo Kaga' Kuasa' nakaindagu noyo.”

Tula am ukuman

⁴ Nanusub Tuhan raki' mampasaboi ra ragu-ragu ragitio ra ulun Nano, “Paat ra ulun maratu', maaru' tumirong ilo poyo. Paat ra ulun makalayau ra ralan, maaru' sumaguli' ilo ra ralan galing.

⁵ Kaa' kua ramuyun, ulun Kuno, nararayus nangiruan Raki' am kalo siminaguli' Raki'? Kua mapiot guut min ra sinungkalalaing min am marara' sumaguli' Raki'.

⁶ Rinongog ku noyo toojo, kaa' kalo mindagu kau ra motopot. Kolondo' sangulun pana intor ramuyun pansagulian guang ra binaal nano ra malaat. Kolondo' sangulun pana ondo' mindagu, ‘Atan kia kasalaan kuno?’ Akau ngaangai' minaya' ra ralan galama' koson ra kuda nasimbul maribok mongoi ra intok pangayawan.

⁷ Susuit kanawai pana makapandai ra paat ulian nano; susuit maningkuluuk, susuit tuntuayan am susuit murai niayuk makapandai ra paat bandingan ra intok. Kaa' akau, ulun Kuno, kalo makapandai ra ukum ondo' pinataak Kuno ramuyun.

⁸ Baani kau kaga' mindagu ra mapintar kau am makapandai ra ukum Kuno! Ilai' ga boo, ukum Kuno kinulau noyo ru mangingila' ra ugama ondo' kalo mabanis guang.

⁹ Ulun-ulun ondo' mangapintar ra gino min ngai' tauyuon, maubong am marakop ilo. Marara' ilo mangapu ra ragu Kuno; raino, kapintaran ra atan kia ondo' lakat poyo soroi risilo?

¹⁰ Ginio ra pataakin Ku umo nilono ra ulun bagu, am andu' nilo ra ulun bokon. Ngaangai' ulun ondo' maayo am niayuk boborok, maguyum ra kalabaan ra kalo mabanis guang. Niayuk poyo nabi am imam pana mamparuung ra ulun.

¹¹ Karaan nilo ra pilat-pilat ru ulun Kuno koson ra pilat boborok ayuk. Mindagu ilo, ‘Ngaangai' no moonsoi am mamaa'.’ Kaa' ngaangai' no totopot kalo noyo moonsoi am kalo mamaa'.

¹² Akau ulun Kuno, mauyu' kau kia sabap ra nambaal noyo ra ngaangai' baal ondo' malaat no? Kalo, totopot kalo mauyu' kau; nanangkapal bulos mino! Ginio ra maratu' kau koson ra ulun bokon; bayag mino mapupusan paat ra Aku mangukum ramuyun. Aku, Tuhan nakaindagu noyo.

¹³ Moogot Aku manimung ra ulun Kuno koson ra ulun manimung ra ampos ru tana' nilo. Kaa' ulun Kuno koson ra puun ru anggur am puun ru ara ondo' kalo nangkawa', am poyo raun-raun no pana nolonot noyo. Ginio sabap ra Aku nangiou ra ulun bansa' bokon matong am manguasa' ra pagun nilo.”

¹⁴ Indagu ulun ri Aki Kapuuno', “Kua kolondo' atan kon binaal takau? Ibok takano pagiru' ra bandar-bandar ondo' mokoondo' ra kubu; polosoon noyo itakau matoi ra giu' no. Tuhan, i Aki Kapuuno' takau namatas noyo koson mompoloso ritakau maluus. Nangani' Io ritakau ra tuuwo inumon sabap ra makatula takau Riso.

¹⁵ Banangan ayuk itakau malansan ra pabansayan am paat ra pamabasan, sabap ondo' matong kalaanan ayuk.

¹⁶ Soroi noyo pantula' giu' ra bandar Dan; gala' ru kuda nilo morongog noyo. Titikop ru pagun mangalaa' paat ra kuda nilo mampagala'. Pantula' nakaratong noyo koson mamuso ra titikop ru pagun takau, am niayuk bandar takau am niayuk ngaangai' ru mamagun nano.”

¹⁷ Indagu Tuhan, “Ilain toojo! Raino mangator Aku ra kukuo ra tatanga' min koson maninduk ramuyun, kukuo makapatoi ondo' kalo maalap kapukau.”

Mangiluk i Jirimia mangkara' ra bansa' nano

¹⁸ Guang kutu mangiluk am mapari', kangilukan kuno kalo maalap kapali'.

¹⁹ Rongog no! Giu' ra titikop pagun morongog ku bansa' kutu mampalaa, “Kolondo' kia boo Tuhan giu' ra Sion? Ati kia raja' ru Sion raino?” Taam Tuhan, raja' nilo, “Kua singkualo' min sangit Kuno? Sumangit Aku sabap ra sinamba min sinungkalalaing min am kumuku' samba ra dewa-dewa ru bansa' bokon ondo' kolondo' noyo toojo onong.”

²⁰ Golok ulun ru Israil, “Bulintok malasu' am bulintok mangkumos nakasail noyo, kaa' kalo poyo binayag akai.”

²¹ Natutuk guang kutu sabap ra natutuk bansa' kuno; mangulir aku, nasindualan kaga' guang kuno.

²² Kolondo' kia tatapis giu' ra Giliad? Kolondo' kia duktur ra giu' no? Kua kia ra bansa' kutu kalo mapali'?