JIRIMIA 7 - Tanou Moonsoi Timugon

Nampatanou i Jirimia giu' ra Baloi ru Tuhan

^1-3 Nanusub Tuhan raki' mongoi ra Baloi ru Tuhan am migor giu' ra kulobon garabang ondo' pansailan ru mamagun Jiuda paat ra ilo matong sumambayang. Nanusub Io raki' mampatanou ra bala' ru Tuhan Ondo' Maayo Kaga' Kuasa' ti risilo, “Kulawo' noyo paliso am baal ru kaayagan min, Aku pana mangiou ramuyun lumayun ayan ragiti.

⁴ Pai' pangintopot ra ragu-ragu magabau ti, ‘Moonsoi takau ayuk, sabap ragitio Baloi ru Tuhan. Tojojo gitio Baloi ru Tuhan! Topot gitio Baloi ru Tuhan!’

⁵ Kulawo' baal ru kaayagan am paliso min. Katimpok no ra rondo' am bokon.

⁶ Pai' imboloo' bansa' ra bokon, anak kolondo' matuo am napuor. Pai' potoyo' ulun ondo' kolondo' sala ra pagun ti. Pai' samba ra tuhan-tuhan ra bokon, sabap binaal raginio mamuso ramuyun.

⁷ Amon ru mangulau kau ra baal ru kaayagan am paliso min am niayuk lumonggo' mambaal ra ngaangai' no, mangiou Aku ramuyun magulayun ayan ra pagun ti ondo' tinaakan Kuno ra kinamatuaan min koson ra tana' tungkuson.

⁸ Nangintopot kau ra ragu-ragu magabau.

⁹ Mantakou kau, mampatoi, mansawa', mangani' ra kaintutunan magabau, mampataak ra taak simbalui ra Baal, am sumamba ra dewa-dewa ondo' kalo igondo' nauligan min.

¹⁰ Mopongo kau mambaal ra ngaangai' no, matong kau ra saang Kuno giu' ra Baloi Kuno galama', am mindagu, ‘Moonsoi akai ayuk!’ Akau pana rumayus mambaal ra malaat no.

¹¹ Guang min kia ra Baloi Kutu intok pansibunian ru mantatakou? Nakakito Aku ra ngaangai' binaal min no.

¹² Ongoi no ra Silo, bandar ondo' pinili' galing Kuli koson ra intok sambayangan ru ulun Raki'. Ilai' ga boo atan binaal Kuno ra intok no sabap ra tula ru ulun Kuno Israil.

¹³ Binaal min ngaangai' tula no; inda' pana ra ruruli' Aku minindagu ramuyun, kaa' marara' kau rumongog. Marara' kau tumaam paat ra Aku mampiau ramuyun.

¹⁴ Ginio ra atan ondo' baalon Kuno ra Silo baalon Ku ra Baloi Kutu, intok ondo' lansanin min. Intok ondo' tinaakan Ku ra kinamatuaan min ni am akau ti baalon Ku koson ra Silo.

¹⁵ Akau pagiruon Ku intor ra saang Kuno koson ra Aku nampagiru' ra pabukat min, ulun ru Israil. Aku, Tuhan nakaindagu noyo.”

Ulun ondo' bambalingatan

¹⁶ Indagu Tuhan, “Jirimia, pai' no pakiasi' ra ulun ragitio. Pai' no pampiau makiindangan kapoam makiasi' koson risilo; pai' no pakimasi' Raki', sabap ra marara' Aku rumongog rirun.

¹⁷ Okou galama' nakakito ra binaal nilo giu' ra bandar-bandar Jiuda am giu' ra ralan-ralan ra Jirusalim!

¹⁸ Lalaing-lalaing nanimung ra luton, ungkuyon nampaang ra apui, am ruandu' nangutou ra tapung koson baalon ra kuui ra dewi ondo' ininggalanan nilo koson ra Raja' Ruandu' ru Suruga'. Nampataak ilo niayuk ra wain ra tuhan-tuhan ra bokon koson mapakaruol ra guang Kuno.

¹⁹ Kaa' sotopot no, pai' ru Aku rinuol nilo, kaa' inan nilo galama' saboi ra tinauyu' ilo.

²⁰ Ginio ra Aku, Tuhan Raja' mampalumpa' ra sangit Kuno ra bibilak ra Baloi ru Tuhan, ra ulun am bibiag, am niayuk ra puun tataun am ampos ru tana' ti. Sangit Kuno bibilak koson ra apui ondo' kalo malasa'.

²¹ Akau ulun Kuno, nakapandai kau ra mokoondo' kukula' taak simbalui ondo' solobon min ra rasawat ru altar musiti' koyoon solobo', am mokoondo' niayuk taak simbalui ra bokon ondo' akanon min. Kaa' Aku, Tuhan nakaindagu, moonsoi poyo akanon min ngaangai' no!

²² Paat ra Aku nagibit ra kinamatuaan min miningkual intor ra Misir, kalo inanian Ku ilo ra kaulayan intor ra taak simbalui koson mapabansuk ra guang Kuno kapoam intor ra taak simbalui ra bokon ra tayar Kuno.

²³ Nanusub Aku ayuk risilo koson gumagaya' Raki' maa' raginio Aku masauk ri Aki Kapuuno' nilo, am ilo masauk ra ulun Kuno. Nanusub Aku risilo maayag sumugut ra susuban Kuno maa' raginio maansukan ilo.

²⁴ Kaa' marara' ilo rumongog raginio am marara' mampalio. Inambai nilo ra sinugut kasagaan ru guang nilo ra mokotog am malaat. Ginio ra nasauk ilo toojo ra malaat poyo am kalo masauk ra moonsoi poyo.

²⁵ Intor ra kinamatuaan min miningkual intor ra Misir saboi ra orou raiti', magail Aku manusub ra ulipon-ulipon Kuli, nabi-nabi minongoi ramuyun.

²⁶ Kaa' kolondo' osoi pana ondo' mangkirongog kapoam mampalio risilo. Inambai min ra nasauk ra mokotog poyo guang am masaga' poyo gumuor intor ra kinamatuaan mini.

²⁷ Ginio sabap ra, alii Jirimia, inda' pana posoboyon mu ngaangai' bala' ti ra ulun Kuno, kalo mangkirongog ilo rirun. Kabalu' pana mampiau kou risilo, kalo tumaam ilo.

²⁸ Balain mu ilo ra ilo noyo rondo' bansa' ondo' marara' gumagaya' Raki', Tuhan i Aki Kapuuno' nilo, am marara' ilo migila' intor ra ukuman ondo' pinatiu' risilo. Gagaya' nilo Raki' kolondo' noyo boo, inambai boo ra kalo boo tunungon.”

Binaal malaat giu' ra Limayak Ginom

²⁹ Indagu Tuhan, “Alii ra mamagun ru Jirusalim, panulaboi kano; lampari' am patiri' abuk mino. Rimbayo' rimbai panguliran giu' ra tampak ru kabuluran, sabap ra Aku, Tuhan tatanga' sumangit am nangimpai noyo ramuyun.

³⁰ Mamagun ru Jiuda nambaal noyo ra kalaatan. Pinabanta' nilo sinungkalalaing nilo ondo' kasisangin Kuno giu' ra ralalom Baloi ru Tuhan, saboi najamalan.

³¹ Nambaal ilo rondo' altar ondo' ininggalanan ra Topit giu' ra Limayak Ginom. Giu' ra rasawat ru altar no nonolob ilo ra anak-anak nilo, ungkuyon am ruandu', koson ra taak simbalui. Sotopot no kalo igondo' Aku panusub risilo mambaal raginio, am niayuk kalo igondo' baal raginio miningkual intor ra pangkaraan Kuno.

³² Ginio ra, masaboi paat no ra intok raginio kalo boo sabiton ra Topit kapoam Limayak Ginom, kaa' Limayak Pamatayan. Lobongon nilo baangkai ra giu' no sabap ra kolondo' boo intok ra bokon.

³³ Baangkai masauk ra akanon ru susuit am bibiag masigo am kolondo' boo ulun mangunjau.

³⁴ Pagun ti masauk ra intok kolondo' atan pana tutuu'. Bolos maansukan am maansayan, am niayuk maansukan ra paguguatan giu' ra bandar-bandar Jiuda am giu' ra ralan-ralan ru Jirusalim langgain Ku.