JIRIMIA 6 - Tanou Moonsoi Timugon

Jirusalim pinagawangan ru pantula'

¹ Ulun kau ru Binjamin, pagiru' no koson mamayag ra inan! Iruani' Jirusalim! Samputi' bujung giu' ra Tikoa am paangi' apui pulanu giu' ra Bit-Kirim! Karaat am usung maar sumaboi intor ra ralayo.

² Moonsoi kaga' Bandar Sion, kaa' maumok bandar no ra tauli no;

³ raja'-raja' am saujor nilo mangkim ra giu' no. Mambaal ilo ra pangkiman giu' ra liliut ru bandar no, sigagama' giu' ra intok kasagaan.

⁴ Konilo, “Tampos no mamulunsar ra Jirusalim! Tampos no! Bulunsaron takau bulintok tanga' ru orou!” Kaa' ilo pana mindagu, “Nakatawos noyo, orou lumondom galing noyo, babara' gumawar noyo.

⁵ Bulunsaron takau bulintok ra rondom, am mangumok ra kubu-kubu ru bandar no.”

⁶ Tuhan Ondo' Maayo Kaga' Kuasa' nanusub noyo ra raja'-raja' koson mantagar ra puun tataun am mambaal ra timbok koson magawang ra Jirusalim. Indagu Tuhan, “Mangukum Aku ra bandar ti sabap ra masuang kaga' pangimbalaan nasauk ragiti.

⁷ Koson taur ru timug mangingkual ayuk ra timug, koson niayuk ra bandar no manangampos ayuk ra kalaatan. Nokorongog Aku intor ra pangimbalaan am kapusaan ra bandar ti; nakakito Aku ra maruol am pilat ra giu' no.

⁸ Alii ra Mamagun ru Jirusalim, polosoo' noyo kapaganan no masauk ra pampakaraan ramuyun! Amon ru kalo lioon min pampakaraan raginio, iruanin Takamin; kulawon Ku bandar min masauk ra tana' kaagisan ondo' kalo ayanin ru ulun.”

Ulun ru Israil masaga' gumuor

⁹ Tuhan Ondo' Maayo Kaga' Kuasa' minindagu raki', “Saliiron Israil koson ra umo ru anggur ondo' kawa' nano inupu' noyo ngaangai'. Ginio ra buoi ru orou lakat poyo soroi, bayago' ulun ondo' lakat poyo maayag.”

¹⁰ Taam aku, “Osoi kia rumongog amon ru pakaraan ku ilo? Mokotog guang nilo am marara' rumongog ra tanou Muno; kuritin nilo tanou Muno ondo' pinasaboi kuno.

¹¹ Iou Tuhan, sangit Muno risilo niayuk malasu' ra ralalom ru inan kutu! Kalo noyo moorot ku.” Tuhan pana mindagu, “Paabuso' sangit Kuno ra lalaing-lalaing giu' ra ralan-ralan maayo am ra ulun mamulok ondo' tatanga' mantitimung. Mansawo rokopon, am ulun matutuo pana rokopon.

¹² Baloi nilo pataakin ra ulun bokon, koson niayuk ra umo am andu' nilo. Mangukum Aku ra mamagun ru pagun ti.

¹³ Ngaangai' ulun ondo' maayo am niayuk ondo' boborok, magingkaut am kalo mabanis guang. Atan poyo ra nabi am imam pana mamparuung ra ulun.

¹⁴ Karaan nilo pilat-pilat ru ulun Kuno koson ra pilat boborok ayuk. Konilo, ‘Ngaangai' no moonsoi am mamaa'.’ Kaa' sotopot no kalo toojo moonsoi am kalo mamaa'.

¹⁵ Mauyu' ilo kia sabap ra nambaal ra makauyuyu' ti? Kalo, totopot noyo kolondo' kauyuan nilo; nanangkapal bulos nilo. Ginio sabap ra maratu' ilo koson ra ulun bokon; bayag nilo pupusin paat ra Aku mangukum risilo. Aku, Tuhan nakaindagu noyo.”

Nangimpai Israil ra paningganayan ri Aki Kapuuno'

¹⁶ Indagu Tuhan ra ulun Nano, “Bigor kano giu' ra lilisangon ru ralan am ilai' noyo toojo! Kuati' noyo ralan-ralan ra galing i, am ati kia ra ralan ondo' moonsoi kaga'. Mopongo raginio baya' no ra ralan raginio, okou pana maayag am moonsoi.” Kaa' konilo, “Kalo, marara' akai maya' ra ralan no!”

¹⁷ Kopongo raginio nampalantik Tuhan ra magagalung koson mangkirongog ra bolos pulanu ru bujung. Kaa' konilo, “Marara' akai mangkirongog.”

¹⁸ Ginio ra indagu Tuhan, “Rongog kano bansa' kau! Musiti' kau makapandai ra atan ondo' masauk ra ulun Kuno.

¹⁹ Rongog no, okou tana' ti! Ulun Kuno marara' mangapu ra pangilaan Kuno am kalo gumagaya' Raki'. Ginio ra porotongon Ku karaat risilo koson ra ukuman ra ngaangai' inatangan nilo.

²⁰ Atan kia boo onong ru kaminyan intor ra Syiba ondo' inibit nilo Raki', kapoam apa' pampagamis ra akanon intor ra pagun maalur? Marara' Aku mangapu ra taak nilo. Marara' Aku ra taak-taak simbalui nilo.

²¹ Ginio ra mangkinibit Aku risilo makasaru am maratu'. Ama' am anak, rangan am pasambalayan matoi.”

Bulunsar intor ra Ralayo

²² Indagu Tuhan, “Ulun matong intor ra rondo' pagun giu' ra ralayo; rondo' bansa' ondo' maikang giu' ra pagun maalur tatanga' tumampos koson mangayou.

²³ Mokoondo' ilo ra panah am ilang; malaat ilo am kalo mangampun. Bolos kinurukup ru kuda nilo ondo' kinuraan koson ra bolos ru raat ondo' mangkinulun. Nakatampos ilo noyo mamulunsar ra Jirusalim.”

²⁴ Indagu mamagun ru Jirusalim, “Nokorongog akai noyo ra tanou no am malawo boo guang mai. Malaa' akai am marualan koson ra ruandu' ondo' maganak.

²⁵ Kalo makakau' akai mugar giu' ra ralan maayo kapoam mongoi ra umo, sabap giu' ra ati pana pantula' ondo' manakinandoi mapatabual ra malaa'.”

²⁶ Indagu Tuhan ra ulun Nano, “Pambayang no ra konoon karung am pagiluir no ra kaau. Pangulir no am panulaboi no ra malumpus koson ra ulun manulaboi ra pinatayan ru anak ungkuyon ondo' langkuir, sabap ra io mampaluus no mamulunsar ramuyun ra mamulali'.”

²⁷ Kopongo raginio indagu Tuhan ri Jirimia, “Kinami' noyo ulun Kuno, koson ra okou nangkinam ra basi'. Imumuyi' paliso nilo!

²⁸ Ilo ngaangai' gugumuor ondo' mokotog guang, koson ra kinokotog ru tambaga' am basi'. Malaat paliso nilo am mugar mongoi ra ati-ati koson mampatanou ra tanou ondo' mampalaat ra ulun bokon.

²⁹ Malasu' noyo kaga' pampaliou no, kaa' jamol ru basi' kalo niayuk maliou am malulu'. Banangan ayuk boo ulun Kuno rayuson kinamin koson kapasawon, sabap ra ilo ondo' malaat kalo ininggi'.

³⁰ Inggalanin ilo ra tatai' basi' kolondo' onong, sabap ra Aku, Tuhan namatir noyo risilo.”