JIRIMIA 52 - Tanou Moonsoi Timugon

Naratuan ru Jirusalim

¹ Umur ru Raja' Jidikia ruo ngoopor am rondo' ngambilor paat ra io nasauk ra raja' ru Jiuda, am namarinta giu' ra Jirusalim buoi mopor am rondo' ngambilor. Ina' nali ininggalanan ri Gamutal anak ri Jirimia intor ra bandar Libna.

² Raja' Jidikia makatula ra Tuhan koson ra Raja' Joyakim ragili.

³ Siminangit kaga' Tuhan ra mamagun ru Jirusalim am Jiuda saboi pinagiru' No ilo am kalo boo nanindung risilo. Giminuor Raja' Jidikia ra Raja' Nibukadnijar intor ra Babilonia.

⁴ Ginio ra Raja' Nibukadnijar nababaya' ra ngaangai' pulalai ru saujor nano namulunsar ra Jirusalim paat ra orou koopor, sila' koopor ralalom bilor kasiam ra pamarintaan ru Raja' Jidikia. Nangkim ilo giu' ra liwar ru Jirusalim am nambaal ra timbok koson magawang ra bandar no.

⁵ Riminayus ilo nagawang ra bandar no saboi ra bilor koopor am rondo' ra pamarintaan ru Raja' Jidikia.

⁶ Paat ra orou kasiam, sila' kaapat ra bilor raginio, paat ra bitilan giu' ra bandar no najanjayan kaga' saboi mamagun kolondo' boo akanon,

⁷ timbok ru bandar linunsai ru pantula'. Kabalu' pana bandar no inawangan ru ulun ru Babilonia, ngaangai' saujor ru Jiuda nakapagiru'. Nagiru' ilo paat ra rondom, am minaya' ra ralan ondo' mansail ra taman ru istana, am miningkual mansail ra kulobon garabang nantuuman ru karuruo timbok ra intok raginio. Nagiru' ilo minongoi ra Limayak Jordan.

⁸ Kaa' saujor ru Babilonia nangilou ra Raja' Jidikia, am namparakop riso giu' ra pipit mamaar ra Jiriko. Paat raginio ngaangai' ru saujor nano nangiruan ra Raja' Jidikia.

⁹ Inibit Raja' Jidikia ra Raja' Nibukadnijar, ondo' paat raginio soroi giu' ra Ribla, giu' ra wilayah Gamat. Giu' no nangukum Raja' Nibukadnijar ra Raja' Jidikia.

¹⁰ Giu' ra Ribla, anak-anak ungkuyon ru Raja' Jidikia pinatoi ra talupak ru mato ru Raja' Jidikia, am pagawai-pagawai ru Jiuda inukum ra matoi.

¹¹ Kopongo raginio mato ru Raja' Jidikia kinuol, am rinantai io am inibit ra bandar Babil. Inaput Raja' Jidikia ra giu' no suku' ra io minatoi.

Baloi ru Tuhan pinuso

¹² Paat ra orou koopor, sila' kalimo ra bilor koopor am siam ra pamarintaan ru Raja' Nibukadnijar giu' ra Babilonia, i Nibujaradan, iono panglima saujor am maminson ra raja', minatong ra Jirusalim.

¹³ Sinolob no Baloi ru Tuhan, istana, am baloi ru ngaangai' ulun mangaatang giu' ra Jirusalim;

¹⁴ saujor-saujor nano nampalunsai ra timbok ru bandar.

¹⁵ Kopongo raginio nagibit i Nibujaradan ra ulun ondo' lakat poyo soroi giu' ra bandar no ra Babilonia, iono ulun manukang ra matasik ondo' lakat poyo soroi, am ilo ondo' sumaung ra ulun ru Babilonia.

¹⁶ Kaa' i Nibujaradan nangiruan ra santayaran intor ra mamagun ondo' musikin kaga' giu' ra Jiuda, ilo ondo' kolondo' rapu'. Nanusub io risilo mangandoi giu' ra umo ru anggur am giu' ra umo-umo.

¹⁷ Pinopol ru ulun Babilonia lugu'-lugu' gangsa' am kurita' kuda ondo' giu' ra ralalom ru Baloi ru Tuhan, am niayuk tangki' gangsa' ondo' maayo. Inibit nilo ngaangai' gangsa' no ra Babil.

¹⁸ Inibit nilo niayuk sukup-sukup, intok pambulian ra kaau ondo' pakayon koson mamasau ra altar, kuliamos ru lampung, mangkuk-mangkuk koson pangkaang ra raraa' intor ra taak-taak simbalui ondo' pataakon, mangkuk-mangkuk panalaban ra kaminyan, am ngaangai' kuliamos gangsa' ra bokon ondo' pinakai koson ralalom sambayang giu' ra Baloi ru Tuhan.

¹⁹ Inalap nilo ngaangai' kuliamos ondo' binaal intor ra mas am pirok, nakaaya' mangkuk-mangkuk boborok, intok ru baa, mangkuk-mangkuk pangkaangan ra raraa' ru taak-taak simbalui ondo' pataakon, intok pambulian ra kaau, tampakan ra lampung, mangkuk ru kaminyan am mangkuk ru papataakan ra wain.

²⁰ Kuliamos-kuliamos gangsa' ondo' binaal ru Raja' Salomo koson ra Baloi ru Tuhan, iono ruo ngantaun lugu', kurita' kuda, tangki' maayo am mopor am ruo ngainan sapi' ondo' napatampakan no – ngaangai' no maagat kaga' saboi kalo matimbang.

^21-22 Ruo ngantaun lugu' no nogondo' gayo no: moonong santaun sawat no 8 ngamito, liliput no 5.3 ngamito am tatanga' no makaluang. Tambaga' ru lugu' no makapal 75 ngamilimito. Giu' ra rasawat ru moonong lugu' no mokoondo' ra ulu ru lugu' ra sawat no 2.2 ngamito. Giu' ra liput ru ulu ru lugu' mokoondo' binatu ra gangsa', ondo' binungaan ra kawa' dalima' intor ra gangsa'.

²³ Giu' ra binatu ra gangsa' ra moonong lugu' no mokoondo' 100 kawa' dalima' intor ra gangsa'; 96 intor raginio makito intor ra ragana'.

Mamagun ru Jiuda pinatiran ra Babilonia

²⁴ Suai raginio, i Nibujaradan, panglima ru saujor no, namparakop ra Tingganai Maayo Imam Siraya am ulun mangindangan riso, iono Imam Jipanya, am niayuk talu ngaulun pagawai maatang ru Baloi ru Tuhan.

²⁵ Intor ra bandar no rinakop ri Nibujaradan sangulun panglima saujor, tulu' ngaulun maminson galama' ru raja' ondo' lakat poyo soroi giu' ra bandar no, ulun mangindangan ra panglima ondo' mampaugar ra kandoi ru upis ru saujor, am onom ngoopor ngaulun mangaatang ra bokon.

²⁶ Nagibit Nibujaradan risilo ra raja' Babilonia, ondo' paat raginio soroi ra Ribla,

²⁷ giu' ra wilayah Gamat. Giu' no linamba' ilo am inukuman boo ra matoi. Koon raginio noyo mamagun ru Jiuda inaut intor ra pagun nilo, am pinatiran ra pagun ra bokon.

²⁸ Gitio noyo suang ru ulun ondo' rinakop ru Raja' Nibukadnijar: Paat ra bilor katulu' ra pamarintaan nano, namparakop io ra suang no 3,023 ngaulun.

²⁹ Paat ra bilor koopor am balu', namparakop io ra 832 ngaulun intor ra Jirusalim.

³⁰ Paat ra bilor karuo ngoopor am talu, suang 745 ngaulun rinakop ri Nibujaradan. Ngaangai' no ra suang no 4,600 ngaulun ondo' rinakop am pinatiran ra pagun.

³¹ Paat ra bilor ru Raja' Iwil-Mirodak nasauk ra raja' ru Babilonia, nampakito io ra makaasi' ra Raja' Joyakin intor ra Jiuda am nampalabus ra Raja' Joyakin intor ra pangaputan. Baal ragitio nasauk paat ra orou karuo ngoopor am limo, sila' koopor am ruo, bilor katalu ngoopor am tulu' kalupus Raja' Joyakin rinakop am pinatiran ra pagun.

³² Moonsoi pamakuan ru Raja' Iwil-Mirodak ra Raja' Joyakin, am nangani' ra Raja' Joyakin ra intok ondo' masawat poyo intor ra raja'-raja' ra bokon ondo' niayuk pinatiran ra Babilonia.

³³ Iniou Raja' Joyakin rumalin ra bayang ru pangaputan nano, am niayuk iowon mangakan giu' ra mija' ru raja' buoi ru bayag nano.

³⁴ Moonong orou, buoi ru bayag nano, inanian Raja' Joyakin ra ruit koson ra pakuan ru bayag nano.