JIRIMIA 51 - Tanou Moonsoi Timugon

Ukuman ra bokon ra Babilonia

¹ Indagu Tuhan, “Tatanga' Aku mamparatong ra angin ondo' mamuso ra tampilon ru Babilonia am mamagun nano.

² Mangator Aku ra ulun bansa' ra bokon koson mamuso ra Babilonia koson ra angin ondo' mampasiab ra rami. Paat ra orou kapusaan no sumuku', mamulunsar ilo intor ra ngaangai' intok, am mapasauk ra pagun no naliung-liung.

³ Pai' pangani' ra kaluagan ra saujor nano koson mamanah kapoam mambayang ra bayang basi'. Pai' polosoo' ungkuyon mangamulok no maayag! Pusoo' titikop ru pulalai ru saujor nano!

⁴ Mangapilatan ilo am matoi giu' ra ralan-ralan ru bandar nilo.

⁵ Aku Tuhan, i Aki Kapuuno' Ondo' Maayo Kaga' Kuasa', kalo poyo nangiruan ra Israil am Jiuda, kabalu' pana makatula ilo noyo Raki', Ondo' Matulai Kaga', i Aki Kapuuno' ru Israil.

⁶ Pagiru' no intor ra Babilonia! Bayago' noyo inan min! Pai' patoi sabap ra tula ru ulun ru Babilonia. Raino tatanga' Aku mansuli' am mangukum risilo nontopot ra binaal nilo.

⁷ Ragili Babilonia koson ra sangkir mas ra kalindu' Kuno, am mangkinibit ra ngaangai' bansa' ra tana' ti magauk. Bansa'-bansa' nanginum ra wain saboi ilo mantuyang.

⁸ Pulali' ru Babilonia naratu' am napuso! Pangulir no sabap ra naratuan nano! Babaso' noyo pilat-pilat nano, am maaru' lair ru mababas Babilonia.

⁹ Ulun bansa' ra bokon ondo' minayan ra giu' no minindagu, ‘Nangkinam akai nangindangan ra Babilonia, kaa' nakatawos. Iruani' Babilonia am ibok no muli'. Nangukum noyo i Aki Kapuuno' ra Babilonia ra maagat am mamuso riso ra lingonon.’ ”

¹⁰ Indagu Tuhan, “Giminolok ulun Kuno, ‘Nampakito Tuhan ra itakau motopot. Ibok balai' takau mamagun ru Jirusalim ra atan ondo' binaal ru Tuhan, i Aki Kapuuno' takau.’ ”

¹¹ Namuir Tuhan ra guang ru raja'-raja' Midia sabap ra masaga' Io mamuso ra Babilonia. Koon raginio noyo ralan Nano mansuli' sabap ra Baloi Nano pinuso. Nanusub Tuhan, “Koloromo' noyo panah! Tomposo' noyo perisai!

¹² Pangani' ra pulanu koson mamulunsar ra timbok ru bandar Babil. Kapioto' pagalungan! Posoroyo' saujor-saujor giu' ra intok ru sigagama'! Awangi' pantula'!” Nambaal Tuhan ra atan ondo' rinagu Nano intor ra ulun ru Babilonia.

¹³ Pagun no langkaya' kaga' am sungoi no masuang, kaa' pupus no nasaboi noyo am paat ru bayag nano nakai' noyo.

¹⁴ Tuhan Ondo' Maayo Kaga' Kuasa' nagibot noyo ralalom inggalan Nano galama' ra mamparatong Io ra ulun ra kinasuang no koson ra gapu' sampanon koson mamulunsar ra Babilonia, am gumolok ilo ra golos ru kamanangan.

Rimbai pangamparan ri Aki Kapuuno'

¹⁵ Namingkal Tuhan ra tana' ti ra kuasa' Nano; Namingkal Io ra tana' ti ra kapintaran Nano, am nampaatang ra limbowon ra pangaratian Nano.

¹⁶ Sumugut ra susuban Nano timug giu' ra limbowon makanginoos; namparatong Io ra gaun intor ra pompor ru tana' ti. Nangkinibit Io ra ganit mainpiat giu' ralalom ru rasam, am nangingkual ra angin intor ra intok nambulian.

¹⁷ Nagilong ra ngaangai' no, ulun nakasioro' am makaliman ra sasambungon; ulun ondo' nambaal ra sinungkalalaing napilat guang sabap ra dewa-dewa no kalo motopot am kalo maminawo.

¹⁸ Dewa-dewa no kolondo' onong am musiti' asabin; ngaangai' no pusoon paat ra Tuhan matong koson mangukum.

¹⁹ I Aki Kapuuno' ri Jakub sala' ka koson ra dewa-dewa no; Io no nambaal ra ngaangai' no, am Io nampili' ra Israil nasauk ra ulun Nano galama'. Inggalan Nano iono Tuhan Ondo' Maayo Kaga' Kuasa'.

Babilonia koson ra amar

²⁰ Indagu Tuhan, “Okou Babilonia, koson kou ra amar Kuno am kinandoi pangayou Kuno. Mamakai Aku rirun koson mamuso ra bansa'-bansa',

²¹ koson mamuso ra kuda am ulun nangura' no, koson mamuso ra kurita' kuda am ulun timinampak no,

²² koson mamatoi ra ungkuyon am ruandu', koson mamuso ra ulun matutuo am ulun mamulok, koson mamatoi ra anak ungkuyon am ruandu',

²³ koson manimbalui ra magagalung am domba sampanon, koson manimbalui ra ulun mamparadu' am kuda nilo, koson mamuso ra panguasa'-panguasa' am pagawai nilo.”

Ukuman ra Babilonia

²⁴ Indagu Tuhan, “Makakito kou ra Aku mambalos ra Babilonia am mamagun nano ra ngaangai' kalaatan ondo' binaal nilo ra Jirusalim.

²⁵ Okou Babilonia, koson kou ra gunung ondo' mamuso ra titikop ru tana' ti, kaa' Aku, Tuhan noyo pantula' muno. Paakangon Ku kalindu' koson mamparata' rirun am mompoloso rirun mosolob saboi masauk ra kaau.

²⁶ Kolondo' rondo' batu pana intor ra nalunsayan muno pakayon saguli' koson alapon ra panambaloi. Masauk kou ra tana' kaagisan ra sabubuoi no. Aku, Tuhan, nakaindagu noyo.”

²⁷ “Pangani' ra pulanu koson mangayou! Samputi' bujung maa' raginio morongog ru bansa'-bansa'! Potomposo' bansa'-bansa' koson mangayou ra Babilonia! Susubo' pamarintaan ru Ararat, Mini am Askinas mangayou. Lantiko' sangulun pagawai saujor koson maningganai ra pangayawan no. Susubo' noyo kuda ondo' masuang koson ra gapu' sampanon!

²⁸ Potomposo' noyo bansa'-bansa' koson mangayou ra Babilonia. Piawo' noyo raja'-raja' ru Midia, tingganai-tingganai am pagawai ru saujor nilo, am niayuk saujor ru ngaangai' pagun ondo' kinuasa' nilo.

²⁹ Tana' ti mogonggon am mauyog sabap ra Tuhan tatanga' mampaugar ra inatangan Nano koson mampasauk ra Babilonia ra tana' kaagisan, intok ondo' kalo inayanan ru ulun.

³⁰ Saujor-saujor ru Babilonia kalo boo mangayou. Nairu' boo kinabaani nilo, am tatanga' mansibuni giu' ra ralalom ru kubu-kubu; malaa' ilo koson ra ruandu'. Kulobon garabang ru bandar linunsai noyo am baloi-baloi nosolob.

³¹ Ulun-ulun sinusub mansusunu' koson nambala' ra raja' ru Babilonia ra bandar nano binulunsar intor ra moonong pisuk.

³² Ginaau ru pantula' intok laupan ru sungoi am nonolob ra kubu-kubu sindungan. Saujor-saujor ru Babilonia nagalabo.

³³ Kalo boo mabuoi pantula' mangala risilo am manginginjang risilo koson ra ulun manginginjang ra gandum giu' ra intok mangagik ra gandum. Aku, Tuhan Ondo' Maayo Kaga' Kuasa', i Aki Kapuuno' ru Israil, nakaindagu noyo.”

³⁴ Raja' ru Babilonia nongolot-ngolot noyo ra Jirusalim am inakan-akan no. Sinaliir no bandar no koson ra ulun nanaliir ra rarapu'. Koson ra tambuakal, tinolon no bandar no. Inalap no atan ayuk kasagaan nano, am ondo' bokon no patirin no.

³⁵ Musiti' mamagun ru Sion mindagu, “Polosoon Babilonia malumpa' ru kalaatan ondo' binaal nali ritakau!” Musiti' mamagun ru Jirusalim mindagu, “Polosoon Babilonia malumpa' ru kaimbalaan ondo' pinalumpa' nali ritakau!”

Indanganon Israil ru Tuhan

³⁶ Ginio ra indagu Tuhan ra mamagun ru Jirusalim, “Tutunon Ku baal mino am mambalos ra pantula' mino ra binaal nilo ramuyun. Palasakon Ku puun-puun ru timug giu' ra Babilonia am mampalasak ra sungoi-sungoi no.

³⁷ Pagun no masauk ra tuntur ru nalunsai ondo' ayanin ru bibiag masigo. Baal no makalalaa'; kalo ayanin ru ulun giu' no, am ngaangai' ulun malaa' magilong raginio.

³⁸ Mamagun ru Babilonia mansangal koson ra singa', am mokobolos koson ra anak ru singa'.

³⁹ Liliwa' suung ru akan nilo sumonor, paakanon Ku ilo, am gaukon ilo am karuolon ulu. Mombolong ilo am kalo boo tumirong-tirong.

⁴⁰ Ibiton Ku ilo maa' raginio simbaluyon koson ra anak domba, domba gawayan am kambing. Aku, Tuhan, nakaindagu noyo.”

Pupus ru Babil

⁴¹ Indagu Tuhan, “Bandar ondo' omporon ru titikop ru tana' ti ginaau noyo! Nasauk noyo Babil ra intok ondo' makalalaa' ra bansa'-bansa'!

⁴² Raat liminuab ra Babil am nampasakob riso ra kinulun ondo' makanginoos.

⁴³ Bandar-bandar giu' ra pagun no makalalaa'; baal no koson ra tana' kaagisan ondo' kolondo' timug, ondo' kalo inayanan kapoam pansailan ru osoi pana.

⁴⁴ Ukumin Ku i Bel, dewa ru pagun Babilonia, am mambaal riso mampataak ra kuliamos tinakou nano. Bansa'-bansa' kalo boo sumamba riso. Timbok ru bandar Babil nalunsai noyo.

⁴⁵ Ulun kau ru Israil, pagiru' no intor ra giu' no! Bayago' noyo inan intor ra sangit Kuno ondo' nanimbula'.

⁴⁶ Pai' kalaa' kapoam mairu' kinabaani sabap ra nokorongog ra tanou kalo motopot. Moonong bilor mokoondo' ayuk ra tanou kalo motopot – tanou kalo motopot intor ra kalaatan giu' ralalom ru pagun am intor ra raja'-raja' ondo' mangayou rondo' am bokon.

⁴⁷ Nasaboi paat no ra Aku mangukum ra sinungkalalaing ru Babilonia. Titikop ru pagun no tauyuon, am ngaangai' ru mamagun nano potoyon.

⁴⁸ Ngaangai' no ra tana' ti am giu' ra limbowon magilakup paat ra pagun ru Babilonia maratu' ra kalindu' ru bansa' intor ra ralayo ondo' matong koson mamuso riso.

⁴⁹ Babilonia nangkinibit noyo ra pinatayan ru ulun intor ra titikop ru tana' ti; kaa' raino Babilonia maratu', sabap ra nangkinibit ra pinatayan ru masuang kaga' ulun ru Israil. Aku, Tuhan, nakaindagu noyo.”

Tanou ri Aki Kapuuno' ra ulun ru Israil giu' ra Babilonia

⁵⁰ Indagu Tuhan ra ulun Nano giu' ra Babilonia, “Nakalabus kano intor ra kapatayan. Raino pagiru' kau! Pai' kano paginaa! Kabalu' pana maalur kau intor ra baloi, karaa' min Aku, Tuhan min, am karaa' min Jirusalim.

⁵¹ Kamin, ‘Inasaban am tinauyu' akai; totopot akai kalo maikang sabap ra ulun bansa' ru bokon minayan ra lamin-lamin matulai giu' ra Baloi ru Tuhan.’

⁵² Ginio ra guango' noyo ragu Kutu. Masaboi paat no ra ukumin Ku sinungkalalaing ru bandar Babil. Ngaangai' ulun ondo' napilat mampalaa giu' ra titikop ru pagun.

⁵³ Kabalu' pana Babil nakaaloi ra limbowon am nambaal ra rondo' kubu ondo' maikang ra giu' no, lakat Aku poyo manusub ra ulun mamuso riso. Aku, Tuhan, nakaindagu noyo.”

Rayus ru pamusaan ra Babil

⁵⁴ Indagu Tuhan, “Rongogo' tangi' giu' ra Babil, ulun manulaboi sabap ra kapusaan giu' ra pagun no.

⁵⁵ Tatanga' Aku mamuso ra Babil, am pasaukon io ra masiluk. Saujor ru pantula' matong koson ra kinulun ondo' makanginoos, am pabayaan ra golok ilo mamulunsar.

⁵⁶ Matong pantula' koson mamuso ra Babil; saujor-saujor no rinakop noyo, busur nilo pana pinandak noyo. Aku, i Aki Kapuuno' ondo' nangukum ra kalaatan; pamakuan Ku ra Babil no nogondo' ra binaal nano.

⁵⁷ Mangkinibit Aku ra panguasa'-panguasa' mangagauk – ulun nano ondo' mapintar, tingganai-tingganai nano am saujor-saujor nano. Mombolong ilo am kalo boo tumirong-tirong. Aku, Raja' nakaindagu noyo; Aku noyo Tuhan Ondo' Maayo Kaga' Kuasa'.

⁵⁸ Timbok ru bandar Babil ondo' maikang no malunsai ra tana', kulobon-kulobon garabang nano ondo' masawat solobon. Pirot ru bansa'-bansa' ngaangai' no papalo ayuk, ngaangai' no ra pupus no makai' kosolob niayuk. Aku, Tuhan Ondo' Maayo Kaga' Kuasa', nakaindagu noyo.”

Tanou ri Jirimia inataran ra Babilonia

⁵⁹ Ulun mangindangan ra Raja' Jidikia iono i Siraya anak ri Niria, akupu ri Magsiya. Paat ra bilor kaapat ra pamarintaan ru Raja' Jidikia giu' ra Jiuda, minaya' i Siraya ra raja' minongoi ra Babilonia. Nanusub aku riso magibit ra kukula' bilin.

⁶⁰ Giu' ra ralalom ru rondo' kitab nanulis aku ra ngaangai' kapusaan ondo' makalumpa' ra Babilonia, am niayuk ngaangai' baal ra bokon intor ra pagun no.

⁶¹ Indagu aku ri Siraya, “Paat ra akau makasaboi ra Babil, piroto' noyo maa' raginio ngaangai' ondo' tinulisan ra ralalom ru kitab ti basaan min ra ulun ra giu' no.

⁶² Kopongo raginio pakiasi' no koson ragitio, ‘Iou Tuhan, minindagu Kou ra pusoon Mu pagun ti, saboi kolondo' atan pana ilo ondo' maayag mayan ragiti – kolondo' ulun am kolondo' bibiag. Intok ti masauk ra tana' kaagisan ra sabubuoi no.’

⁶³ Okou Siraya, mopongo kou mambasa' ra suang ru kitab ti risilo, pobongkoso' kitab ti ra rondo' batu am papatiro' karuruo no ra ralalom ru Sungoi Iprat.

⁶⁴ Balai' ilo ra koon raginio noyo pupus ru Babilonia. Malinjob Babilonia am kalo noyo boo sumalula', sabap ra kapusaan ondo' porotongon ru Tuhan riso.” Ragu-ragu ri Jirimia polos ragiti.