JIRIMIA 49 - Tanou Moonsoi Timugon

Ukuman ru Tuhan ra pagun ru Amon

¹ Koon raginio noyo ragu ru Tuhan intor ra pagun ru Amon, “Ati kia giali ungkuyon ru Israil? Kolondo' kia osoi pana ondo' mangampin ra pagun nano? Kua kia polosoo' nilo bansa' ondo' siminamba ra Dewa Milkon nampagaau am minayan ra wilayah ru bansa' ru Gad?

² Kaa' masaboi paat no ra Aku mangkinibit ra mamagun ru bandar maayo Raba mokorongog ra bolos ru pangayawan, am bandar no mokoloso masauk ra malunsai. Pekan-pekan ra liliut no makai' kosolob. Kopongo raginio Israil makaalap saguli ra tana' no intor risilo ondo' nampagaau no.

³ Mamagun kau ru Gisybon, pantangi' no! Bandar Ai napuso noyo! Ruandu' kau ru bandar Raba, pangulir no! Pambayang kano ra konoon karung am pangulir no. Pagiru' no ra giu' am giti ra maubong kaga'. Milkom, dewa min patirin ra pagun mabaya' ra imam-imam am pagawai-pagawai ru pamarinta.

⁴ Kua ramuyun lumimbau, ulun kau ngai' ondo' kalo gumagaya'? Ilai' noyo, kaikangan min tumalimpuun lumawo. Kua kia lansan kau ra kaikangan galama' am mindagu ra kolondo' osoi pana makakau' mamulunsar ramuyun?

⁵ Mamparatong Aku ra kalaanan ramuyun intor ra ngaangai' intok. Ngaangai' min magiru', sigagama' kuminam mamayag ra inan. Kolondo' osoi pana boo makapanimung ra pulalai min.

⁶ Kaa' paat ra orou tauli no, saukon Ku Amon ra langkaya' saguli'. Aku, Tuhan nakaindagu noyo.”

Ukuman ru Tuhan ra pagun ru Idom

⁷ Koon raginio noyo ragu ru Tuhan intor ra pagun ru Idom, “Kalio boo kia kinapintar ru mamagun ru Idom? Kalo kia boo makapambilin tingganai-tingganai risilo? Kalio noyo kia kapintaran nilai?

⁸ Mamagun kau ru bandar Didan, likar no am pagiru' no! Pansibuni no! Pusoon Ku papag ri Isau, sabap ra nasaboi paat no ra Aku mangukum risilo.

⁹ Paat ra ulun mangupu' ra kawa' ru anggur, nanatang ilo kasanganu kawa' ra puun ru anggur. Paat ra ulun mantakou matong ra rondom ti, alapon nilo ayuk atan ondo' kasagaan nilo.

¹⁰ Kaa' Aku nangalap ra ngaangai' papag ri Isau. Bunsayon Ku intok nansibunian nilo, saboi ilo kalo boo makapansibuni. Ngaangai' mamagun ru Idom napuso noyo; kolondo' sangulun pana natatang.

¹¹ Pataako' anak-anak min ra nailusan ra matuo no Raki' am Aku magalung risilo. Ulun-ulun napuor min pana makalansan Raki'.

¹² Ulun ondo' sotopot no kalo ukumin pana natiu' ra ukuman. Indoson min kia ra makalabus kau intor ra ukuman? Maaru' ukumin kau!

¹³ Aku galama' nagibot noyo ra bandar Bojra masauk ra tana' kaagisan ondo' makalalaa'. Ulun makakurit riso am alapon inggalan nano koson ra pagulasan. Pekan-pekan giu' ra liliut nano pana malunsai ra sabubuoi no. Aku, Tuhan nakaindagu noyo.”

¹⁴ Aku, i Jirimia mindagu, “Okou Idom, nakaapu aku ra tanou intor ra Tuhan. Nanusub Io ra sangulun minongoi ra bansa'-bansa' koson mambala' risilo maa' raginio manimung ra saujor nilo am tumampos mamulunsar risilo.

¹⁵ Mampalawo Tuhan ramuyun, am kolondo' sangulun pana mangurumat ramuyun.

¹⁶ Ruungon kau ru kalimbawan min. Kolondo' sangulun pana malaa' ramuyun koson ra pangkaraan min. Minayan kau giu' ra lolot ru bulur batu, maalur giu' ra rasawat ru gunung. Kaa' kabalu' pana nambaal kau ra baloi giu' ra intok masawat kaga', koson ra sawat ru bunsut ru susuit kanui, paingganaan kau ru Tuhan. Koon raginio noyo ragu ru Tuhan.”

¹⁷ Indagu Tuhan, “Kapusaan ru Idom makalalaa' kaga' saboi moonong ulun ondo' mansail ra giu' no makatigog am malaa'.

¹⁸ Koson ra Sodom am Gomora pusoon mabaya' ra pekan-pekan giu' ra liliut, koson niayuk ra Idom pusoon. Kolondo' sangulun pana mayan giu' ra Idom. Aku, Tuhan nakaindagu noyo.

¹⁹ Koson ra singa' miningkual intor ra kataunan gimbaan giu' ra kiing ru Sungoi Jordan am nagaloi ra padang ru sakot ondo' masansam, koon niayuk ra Aku matong am mangkinibit ra ulun ru Idom magiru' ra mamulali' intor ra pagun nilo. Kopongo raginio tingganai ondo' pilion Kuno mamarinta ra pagun no. Osoi kia ondo' mogondo' Raki'? Osoi kia baani gumula' Raki'? Panguasa' ra ati kia ondo' masaga' manggal Raki'?

²⁰ Ginio ra rongogo' noyo inatangan Kuno koson manggal ra mamagun ru Idom, am inatangan Kuno ra tayar ru mamagun Timan. Anak-anak nilo pana ralaaton mugar, am ngaangai' ulun mangalaa'.

²¹ Paat ra Idom maratu', bolos nano mosongou kaga' saboi titikop ru tana' ti mogonggon, am golok ru mamagun nano morongog polos ra Teluk Akaba.

²² Pantula' mamulunsar ra Bojra koson ra susuit kanui ondo' nanumbit ra kawo miningkal. Paat orou raginio saujor ru Idom mangalaa' koson ra ruandu' ondo' maganak.”

Ukuman ru Tuhan ra bandar Damsyik

²³ Koon raginio noyo ragu ru Tuhan intor ra bandar Damsyik, “Mamagun ru bandar Gamat am Arpad maimamang am magalabo sabap ra nokorongog ilo ra tanou malaat. Guang nilo maimamang am magalabo nakalumpa' risilo koson ra kinulun ru raat.

²⁴ Mamagun ru Damsyik kalo maikang am nagiru' noyo ra nalaa'. Marualan am maimbolo' ilo koson ra ruandu' ondo' maganak.

²⁵ Bandar ra nauligan kaga' ondo' kaindalaman no naansukan kaga', raino masiluk am kolondo' namagun.

²⁶ Paat orou raginio bala kamulakan potoyon giu' ra ralan maayo, am ngaangai' saujor no pusoon.

²⁷ Solobon Ku timbok ru Damsyik am mangumpo ra istana-istana ru Raja' Bingadad. Aku, Tuhan Ondo' Maayo Kaga' Kuasa', nakaindagu noyo.”

Ukuman ra bansa' ru Kidar am bandar Gajor

²⁸ Koon raginio noyo ragu ru Tuhan intor ra bansa' ru Kidar am libung-libung ondo' kinuasa' ru Gajor, iono libung-libung ondo' kinala ru Raja' Nibukadnijar intor ra Babilonia, “Bulunsaro' bansa' ru Kidar, am pusoo' ulun intor ra tampilon sirangon!

²⁹ Gaawo' ngaangai' kim am tinambiag nilo, tabir ru kim am atan ayuk ondo' soroi giu' ralalom ru kim. Gaawo' unta nilo am balai' ilo, ‘Tontol liminiput ramuyun!’

³⁰ Mamagun kau ru bandar Gajor, Aku, Tuhan, nampakara' ramuyun: Pagiru' no ra maalur am pansibuni no. Raja' Nibukadnijar intor ra Babilonia, nangatang noyo koson manggal ramuyun. Minindagu raja' no,

³¹ ‘Ibok no bulunsaro' takau ulun ondo' mamimio am maayag ra moonsoi! Bandar nilo kalo noyo sinindungan sabap ra kolondo' kulobon garabang kapoam pinangalor ra kulobon no.’

³² Gaawo' unta am ngaangai' tinambiag nilo! Pantutuliaron Ku ngaangai' ulun ondo' kinariwa' abuk nilo. Porotongon Ku karaat risilo intor ra ngaangai' intok.

³³ Saukon Gajor ra tana' kaagisan ra sabubuoi no, intok ondo' inayanan ru taani ayuk. Kolondo' sangulun pana mayan ra giu' no. Aku, Tuhan, nakaindagu noyo.”

Ukuman ru Tuhan ra pagun ru Ilam

³⁴ Kalo nabuoi kalupus Raja' Jidikia nasauk ra raja' ru Jiuda, Tuhan Ondo' Maayo Kaga' Kuasa' minindagu intor ru Ilam raki'.

³⁵ Indagu Io, “Potoyon Ku ngaangai' ulun ru pulalai mamanah ru Ilam, sabap ra ilo noyo ondo' nampasauk ra Ilam maikang kaga'.

³⁶ Mangkinibit Aku ra angin intor ra ngaangai' intok magangin ra Ilam, am pantutuliaron Ku mamagun nano saboi kolondo' rondo' pagun pana ondo' kalo rinatangan ru ulun nagigiru' intor ra Ilam.

³⁷ Mangkinibit Aku ra mamagun ru Ilam malaa' ra pantula' ondo' masaga' mamatoi risilo. Siminangit Aku kaga' ra mamagun ru Ilam am mamuso risilo. Atarin Ku saujor ondo' mangayou risilo, saboi pusoon Ku ilo lingono'.

³⁸ Pusoon Ku raja'-raja' am tingganai-tingganai, am panturungan Kuno patirongon giu' ra pagun no.

³⁹ Kaa' malupus raginio saukon Ku mamagun ru Ilam ra langkaya' saguli'. Aku, Tuhan nakaindagu noyo.”