JIRIMIA 47 - Tanou Moonsoi Timugon

Tanou ru Tuhan intor ra pagun ru Palistin

¹ Kalo poyo namulunsar raja' ru Misir ra Gaja, minindagu Tuhan raki' intor ra pagun ru Palistin,

² “Ilai' noyo, timug tatanga' manggayo giu' ra ralayo, am masakob koson ra sungoi manggayo. Timug no sumakob ra pagun am suang no, bandar-bandar am mamagun ra giu' no. Ulun gumolok makiindangan, moonong ulun ra tana' ti manulaboi.

³ Mokorongog ilo ra kinurikap ru kuda, kinuritut ru kurita' kuda, am kinurutuk ru luda' no. Ama' kalo mangkaili koson mangalap ra anak nilo; longon ru ama'-ama' malawo am kalo maikang.

⁴ Nasaboi paat no koson mamuso ra ngaangai' ulun ru Palistin, am mamuso ra ngaangai' indangan ondo' inapu ru bandar Tirus am Sidon. Aku, Tuhan mamuso ra ulun ru Palistin, ngaangai' ulun ondo' minatong intor ra pulu' Krita.

⁵ Mamagun ru Gaja mangiluk kaga' guang, mamagun ru Askilon pana nongkoror. Saboi sanggilan kia ulun ru Palistin mangulir?

⁶ Golok kau, ‘Okou ilang ru Tuhan! Saboi sanggilan kia okou mompopot? Saguli' no ra angkap muno, ayan no ra giu' no am tangus no.’

⁷ Kaa' ati kulaan kia ru ilang no makatangus, sotopot no Aku nanusub riso mangandoi? Nanusub Aku riso mamulunsar ra Askilon, am ulun ondo' minayan giu' ra nagas.”