JIRIMIA 46 - Tanou Moonsoi Timugon

Misir kinala giu' ra Karkimis

¹ Indagu Tuhan raki' intor ra bansa'-bansa'

² tumalimpuun ra Misir. Koon raginio noyo ragu Nano intor ra saujor ru Raja' Niko intor ra Misir, ondo' kinala ru Raja' Nibukadnijar intor ra Babilonia, giu' ra Karkimis mamaar ra Sungoi Iprat paat ra bilor kaapat ra pamarintaan ru Raja' Joyakim koson ra raja' ru Jiuda,

³ “Panglima-panglima saujor ru Misir giminolok, ‘Pongoono' perisai min, am jalai no ra mamulunsar!

⁴ Paatango' kalat ra kuda am kurai' kuda min! Tinting kano am pantupi' ra tupi' basi'! Asaa' tutura' min! Bayango' noyo bayang basi' min!’ ”

⁵ Pangkuot Tuhan, “Kaa' atan kia ondo' nakito Kutu? Liminugut ilo ra nalaa'. Saujor nilo linamba' paluguto'; nagiru' ilo ra maribok kaga', kalo baani ilo mangkaili sabap ra nalaa' kaga'.

⁶ Ilo ondo' maribok ra nasimbul kalo makapagiru'; saujor-saujor kalo makapagiru'. Makasaru am maratu' ilo, giu' ra ralayo, mamaar ra Sungoi Iprat.

⁷ Osoi kia ondo' siminimpor koson ra timug ru Sungoi Nil, koson ra sungoi ondo' naliuran tobo no?

⁸ Ginio noyo pagun ru Misir, ondo' siminimpor koson ra Sungoi Nil, koson ra sungoi ondo' naliuran tobo no. Indagu pagun ru Misir, ‘Sumimpor am mangalom aku ra tana' ti; pusoon ku bandar-bandar am mamagun ra giu' no.

⁹ Susubo' kuda no mugar, am kurita'-kurita' kuda mugar ra maribok! Pangator no ra saujor-saujor: ulun intor ra Itiopia am Libia ondo' nagibit ra perisai, am niayuk ulun maturasik mamanah intor ra Lidia.’ ”

¹⁰ Gitio noyo orou ru Tuhan Raja' Ondo' Maayo Kaga' Kuasa': orou raiti' mansuli' Io; orou raiti' mangukum Io ra pantula' Nano. Ilang Nano mangakan risilo saboi maasug, am manginum ra raraa' nilo saboi majala'. Orou raiti' Tuhan Ondo' Maayo Kaga' Kuasa' nanimbalui ra taak-taak simbalui Nano, giu' ra ralayo, mamaar ra Sungoi Iprat.

¹¹ Mamagun kau ru Misir, ongoi no ra Giliad am pagalap ra tatapis! Ngaangai' ru tatapis min napandayan ra kolondo' onong; kolondo' rondo' pana makababas ramuyun.

¹² Bansa'-bansa' nokorongog ra nagasaban ramuyun; ngaangai' ulun nokorongog ra tangi' min. Saujor ondo' sangulun nakasaru ra saujor ra bokon, am karuruo no naratu' ra tana'.

Ratangan ru Raja' Nibukadnijar

¹³ Paat ra Raja' Nibukadnijar intor ra Babilonia, minatong namulunsar ra Misir, minindagu Tuhan raki',

¹⁴ “Potonowo' noyo tanou ragitio giu' bandar-bandar ru Misir, iono Migdol, Mimpis am Tapanis, ‘Tampos kano mangampin ra inan min; ngaangai' longgom min mapuso ralalom ru pangayawan!

¹⁵ Kua kia ri Apis, dewa min ra maikang no naratu'? Linamba' ru Tuhan dewa no!’

¹⁶ Saujor-saujor min nakasaru am naratu'! Nagindagu ilo ra rondo' am bokon, ‘Ribaki'! Ibok uli' takau ra bansa' takano, am nagiru' intor ra ilang ru ulun mamatoi!’

¹⁷ Anii' raja' ru Misir ra inggalan ondo' bagu: ‘Ulun Masuang Ragu Ondo' Nampalabus ra Kaluagan.’

¹⁸ Aku, Tuhan Ondo' Maayo Kaga' Kuasa', Aku noyo raja'. Aku noyo i Aki Kapuuno' ondo' maayag. Koson ra Gunung Tabor masawat poyo intor ra gunung ra bokon, am Gunung Karmil masawat poyo intor ra ralimbou ru raat, koon raginio noyo kaikangan ru ulun ondo' mamulunsar ramuyun.

¹⁹ Tampos kano ra rokopon, mamagun kau ru Misir! Mimpis masauk ra tana' kaagisan, kalunsayan ondo' kalo inayanan ru ulun.

²⁰ Misir koson ra sanginan sapi' ondo' molomok, kaa' tininong ru pikot intor ra ralayo.

²¹ Mulu' ra saujor-saujor ra inakut nano pana kalo maikang koson ra anak ru sapi'. Kalo makatanggang ilo koson mangayou; ilo ngaangai' liminikar am nagiru'. Orou pangukuman risilo nakasaboi noyo; nasaboi noyo paat ra ilo pusoon.

²² Nagiru' Misir liliwa' makakinalais koson ra kukuo, liliwa' saujor ru pantula' tatakip minggaar. Namulunsar pantula' ra panaa', koson ra ulun nantagar ra puun tataun,

²³ koson ra ulun mamuso ra kataunan gimbaan. Suang nilo kalo mauntob, saujor nilo masuang poyo intor ra gapu'.

²⁴ Mamagun ru Misir tauyuon, kinala ilo ru bansa' intor ra ralayo. Aku, Tuhan, nakaindagu noyo.”

²⁵ Tuhan Ondo' Maayo Kaga' Kuasa', i Aki Kapuuno' ru Israil minindagu, “Mangukum Aku ra Amon, dewa ru bandar Tibi mababaya' ra Misir am dewa-dewa am niayuk raja'-raja'. Alapon Ku raja' ru Misir am ngaangai' ondo' liminansan riso,

²⁶ am pataakon ilo ra ulun ondo' masaga' mamatoi risilo, iono Raja' Nibukadnijar intor ra Babilonia am saujor nano. Kaa' ra orou tauli no, ulun mayan poyo giu' ra Misir, koson ragili. Aku, Tuhan, nakaindagu noyo.”

Mamayag Tuhan ra ulun Nano

²⁷ “Pai' kalaa', akau ulun Kuno, pai' ponontol, ulun kau ru Israil. Mamayag Aku ramuyun intor ra pagun ondo' maalur, intor ra pagun intok min rinakop. Muli' kau am mayan ra pagun min ra kaansayan; maayag kau ra moonsoi; kolondo' osoi pana mampakalalaa' ramuyun.

²⁸ Matong Aku am mamayag ramuyun. Pusoon Ku ngaangai' pagun intok nampatutuliaran Kuno ramuyun, kaa' kalo mamuso Aku ramuyun. Kalo palabuson Takamin intor ra ukuman, kaa' paat Takamin ukumin, matimpok Aku. Aku, Tuhan, nakaindagu noyo.”