JIRIMIA 44 - Tanou Moonsoi Timugon

Tanou ru Tuhan ra ulun ru Israil giu' ra Misir

¹ Indagu Tuhan raki' intor ra ngaangai' ulun ru Israil ondo' minayan giu' ra Misir, giu' ra bandar Migdol, Tapanis, Mimpis am tampilon rabugus ru pagun no.

² Gitio noyo ragu ru Tuhan Ondo' Maayo Kaga' Kuasa', i Aki Kapuuno' ru Israil, “Akau galama' nakatainu ra kapusaan ondo' pinalumpa' Ku ra Jirusalim am ngaangai' bandar ra bokon giu' ra Jiuda. Saboi raino pana bandar-bandar raginio lakat poyo ralalom ru baal nalunsai am kolondo' minayan.

³ Kapusaan raginio nasauk sabap ra mamagun nano nambaal noyo ra malaat am napasingkual ra sangit Kuno. Nampataak ilo ra taak simbalui ra dewa-dewa, am siminamba ra dewa ondo' kalo igondo' sinamba nilo, akau kapoam kinamatuaan min.

⁴ Nararayus Aku nanusub ra ulipon Kuno, nabi-nabi ramuyun; nanginggalar ilo ramuyun nambaal ra malaat ondo' kasisangin Kuno.

⁵ Kaa' marara' kau mangkirongog kapoam mampalio raginio. Marara' kau manatang ra baal malaat; rinayus min mampataak ra taak simbalui ra dewa-dewa.

⁶ Ginio sabap no ra sangit am lasu' ru guang Kuno nakalumpa' ra bandar-bandar Jiuda am ralan-ralan giu' ra Jirusalim. Solobon Ku ngaangai' no saboi masauk ra nalunsai am intok ondo' makalalaa' saboi raino.

⁷ Ginio ra raino Aku, Tuhan Ondo' Maayo Kaga' Kuasa', i Aki Kapuuno' ru Israil, nangkuot ra sabap binaal min baal ondo' malaat no ra inan min galama'. Mamuso kau kia ra ungkuyon, ruandu', anak am lalagang, saboi kolondo' sangulun pana intor ra bansa' min soroi?

⁸ Kua pasingkualo' min sangit Kuno ra siminamba ra sinungkalalaing am nampataak ra taak simbalui ra dewa giu' ra Misir, intok inayanan min raino? Binaal min kia ginio koson mamuso kau ra inan min galama', saboi ngaangai' bansa' ra tana' ti magasab ramuyun am mamakai ra inggalan min koson ra pagulasan?

⁹ Nalilianan min kia ngaangai' kalaatan ondo' binaal ru kinamatuaan min, ru raja'-raja' ru Jiuda am andu' nilai, am niayuk ru akau galama' am andu' min, giu' ra bandar-bandar Jiuda am giu' ra ralan-ralan ru Jirusalim?

¹⁰ Kaa' saboi orou raiti' lakat kau poyo kalo minggana' guang. Kalo mangurumat kau Raki' kapoam maayag sumugut ra ngaangai' ru ukum ondo' tinaakan Kuli ramuyun am kinamatuaan min.

¹¹ Ginio ra Aku, Tuhan Ondo' Maayo Kaga' Kuasa', i Aki Kapuuno' ru Israil, manggal ramuyun am mamuso ra ngaangai' ru Jiuda.

¹² Mamagun ondo' lakat poyo minayan ra Jiuda, am ondo' gumogot mongoi giu' ra Misir am mayan ra giu', maaru' pusoon Ku. Ilo ngaangai', maayo am poyo boborok, matoi giu' ra Misir ralalom ru pangayawan kapoam sabap ra bitilan. Baal nilo makalalaa'. Ulun magasab risilo am mamakai ra inggalan nilo koson ra pagulasan.

¹³ Ukumin Ku ilo ondo' minayan giu' ra Misir, koson ra Aku nangukum ra Jirusalim ra pangayawan, bitilan am maruol tumapik.

¹⁴ Kolondo' sangulun pana intor ra ulun ru Jiuda ondo' minayan giu' ra Misir makapagiru' kapoam maayag. Kolondo' sangulun pana makauli' ra Jiuda, intok namagunan ondo' moondom ilo koson ra intok ayanan. Kolondo' makauli' ondo' ayuk am kukula' ngaulun nakapagiru'.”

¹⁵ Masuang kaga' boo ulun minatong raki', iono ngaangai' ungkuyon ondo' nakapandai ra andu' nilo nampataak ra taak simbalui ra dewa, am ngaangai' ruandu' ondo' minigor ra giu' no, nakaaya' ulun ru Israil ondo' minayan giu' ra tampilon rabugus ru Misir. Konilo raki',

¹⁶ “Marara' akai mangkirongog ra ragu ondo' raguon muno ra ralalom inggalan ru Tuhan.

¹⁷ Mambaal akai ra ngaangai' baal ondo' raguon mai. Mampataak akai ra taak simbalui ra dewi mai, Raja' Ruandu' ru Suruga'. Mampataak akai ra wain riso, koson ramon, kinamatuaan maili, raja' mai, am tingganai-tingganai mai maindalom mambaal raginio giu' ra bandar-bandar Jiuda am giu' ra ralan-ralan ru Jirusalim. Paat raginio mokoondo' akai ra masuang akanon; langkaya' akai am kalo mapagon.

¹⁸ Kaa' intor ra akai liminonggo' mampataak ra taak simbalui ra Raja' Ruandu' ru Suruga', am liminonggo' mampataak ra wain riso, naawayan akai ra ngaangai' no, am bansa' mai minatoi ralalom ru pangayawan am sabap ra bitilan.”

¹⁹ Indagu ruandu'-ruandu' ru giu' no, “Paat ra akai mambaal ra ruti' pinatilu ra baal ru Raja' Ruandu' ru Suruga', am mampataak ra taak simbalui am wain riso, ralaki mai nangiou ra binaal mai.”

²⁰ Aku pana mindagu boo ra ngaangai' ungkuyon am ruandu' ondo' timinaam raki' no,

²¹ “Indoson min kia ra kalo nakapandai Tuhan, kapoam nampalilian Io ra binaal min? Akau am kinamatuaan min mampataak ra taak simbalui ra Raja' Ruandu' ru Suruga'; baal raginio niayuk binaal ru raja'-raja', tingganai-tingganai, mamagun ru pagun ti, am akau galama' giu' ra bandar Jiuda am giu' ra ralan-ralan ru Jirusalim.

²² Saboi orou raiti' pagun min nalunsai am kolondo' osoi pana minayan ra giu' no. Baal nano makalalaa'. Inambai poyo ra pinakai ru ulun inggalan nano koson ra pagulasan. Ngaangai' baal raginio nasauk sabap ra Tuhan kalo boo mokoorot ra kinalaat am binaal makauyuyu' min.

²³ Karaat ondo' nakalumpa' ramuyun ra raino ti matong sabap ra nampataak kau ra taak simbalui ra tuhan-tuhan ra bokon, am sabap ra tula min ra Tuhan am kalo giminagaya' ra susuban Nano.”

^24-25 Nambala' aku risilo ngaangai', mulu' poyo ra ruandu'-ruandu', ragu ru Tuhan Ondo' Maayo Kaga' Kuasa', i Aki Kapuuno' ru Israil, ra ulun ru Jiuda ondo' minayan giu' ra Misir, “Akau am andu' min nagibot noyo ra Raja' Ruandu' ru Suruga', ra mampataak kau ra taak simbalui am wain riso, iniou min noyo bantu' mino. Gino poyo, suguto' bantu' mino! Suguto' gogoton mino!

²⁶ Kaa' raino rongogo' atan ondo' raguon Kuno rirun, ngaangai' kau ulun ru Israil ondo' minayan ra Misir: Aku, Tuhan nagibot ralalom inggalan Kuno ondo' matulai ra topot-topot kalo mangiou Aku ramuyun mamakai ra inggalan Kuno paat ra akau magibot. Kalo paindaguon kau, ‘Magibot aku ralalom inggalan ru Tuhan Raja' ondo' maayag!’

²⁷ Tutunon Ku maa' raginio kalo makasugut kau; maaru' mapuso kau. Akau ngaangai' matoi, ralalom ru pangayawan kapoam sabap ra maruol tumapik, saboi kolondo' sangulun pana ramuyun maayag.

²⁸ Kaa' santayaran boborok ramuyun ondo' minayan giu' ra Misir maayag am muli' ra Jiuda. Bagu no makapandai ilo ra ragu ri osoi ondo' masauk, ragu Kuno kapoam ragu nilo.

²⁹ Aku, Tuhan mampainono' ra Aku mangukum ramuyun ra pagun ti, am ra bantu' Kuno koson mamuso ramuyun suguton.

³⁰ Pataakon Ku Raja' Gopra intor ra Misir ra pantula' nano ondo' masaga' mamatoi riso, koson ra Aku nampataak noyo ra Raja' Jidikia intor ra Jiuda ra Raja' Nibukadnijar intor ra Babilonia, pantula' ondo' masaga' mamatoi ra Raja' Jidikia.”