JIRIMIA 43 - Tanou Moonsoi Timugon

Inibit i Jirimia ra Misir

¹ Pinasaboi ku noyo moonong ragu ru Tuhan, i Aki Kapuuno' ru Israil, ondo' musiti' ku posoboyon risilo.

² Kopongo raginio i Ajaria anak ri Gosaya am i Joganan anak ri Karia am ngaangai' ulun ra bokon ondo' malilimbau no minindagu raki', “Magabau kou! Tuhan, i Aki Kapuuno' takau, kalo nanusub rirun manginga' ramon koson mayan giu' ra Misir.

³ I Baruk anak ri Niria nanusuk ramuyun koson manggal ramon, maa' raginio ulun ru Babilonia makapanguasa' ramon am mamatoi kapoam magaut ramon mongoi ra Babilonia.”

⁴ Kolondo' sangulun pana, i Joganan kapoam pagawai-pagawai saujor kapoam mamagun giminagaya' ra susuban ru Tuhan koson mamagun giu' ra pagun Jiuda.

⁵ Kopongo raginio i Joganan am ngaangai' pagawai saujor no nagibit ra moonong ulun ondo' lakat poyo soroi giu' ra Jiuda ra Misir. Inibit ilo nababaya' ra ngaangai' ulun ondo' bagu minuli' intor ra intok-intok ilo pinantutuliar ragili;

⁶ nakaaya' ungkuyon, ruandu', anak-anak am anak ruandu' ru raja'. Nagibit ilo niayuk ra ngaangai' ulun ondo' pataakon ru panglima Nibujaradan ra alungin ri Gidalia, nakaaya' i Baruk am aku galama'.

⁷ Minanggal ilo ra susuban ru Tuhan, am minongoi ra Misir saboi koson ra galur ru bandar Tapanis.

⁸ Giu' no minindagu Tuhan raki',

⁹ “Alapo' noyo kukula' batu mangaayo am tonomo' ngaangai' no giu' ra tana' ra saang ru kulobon umpasan mongoi ra baloi ru pamarintaan giu' ra bandar no. Polosoon noyo kukula' ngaulun ru Israil nakakito rirun nambaal raginio.

¹⁰ Kopongo raginio balai' ilo ra Aku, Tuhan Ondo' Maayo Kaga' Kuasa', i Aki Kapuuno' ru Israil, magibit ra ulipon Kuno, Raja' Nibukadnijar intor ra Babilonia, mongoi ra intok ragitio. Mambaal io turungan ru raja' giu' ra rasawat ru batu-batu ondo' tinanom muno, am pabingkalon no kim ru raja' ra intok raginio.

¹¹ Matong i Nibukadnijar am mangala ra Misir. Ilo ondo' inaru' ra matoi sabap ra maruol, ilo ondo' inaru' masauk ra ulun rinakop ru pangayawan no masauk ra ulun rinakop ru pangayawan, am ilo ondo' inaru' matoi ralalom ru pangayawan no matoi ralalom ru pangayawan.

¹² Solobon Ku kuil-kuil ru dewa Misir, am raja' ru Babilonia pana monolob ra dewa-dewa nilo kapoam ibiton ngaangai' no ra intok ra bokon. Koson ra sangulun magagalung mamasau ra bayang nano intor ra kutu, koon raginio niayuk ra raja' ru Babilonia mamasau ra Misir am mugar mabaya' ra kamanangan.

¹³ Lunsayon no batu pangkaraan ru sinungkalalaing giu' ra Giliopolis, giu' ra Misir, am monolob ra kuil-kuil ru dewa ra Misir.”