JIRIMIA 42 - Tanou Moonsoi Timugon

Nangitaak mamagun ri Jirimia ra makiasi' koson risilo

¹ Kopongo raginio ngaangai' tingganai ru saujor, nakaaya' i Joganan anak ri Karia am i Ajaria anak ri Gosaya, minatong nababaya' ra mamagun intor ra ngaangai' ru ulun manampagun.

² Indagu ilo raki', “Pangindangan no ra iowo' kitaakon mai. Pakiasi' no ra Tuhan, i Aki Kapuuno' takau ra bala mai. Pakiasi' no ra bala mai ngaangai' ondo' naayag. Ragili masuang akai, kaa' raino ilai' noyo, kalo boo masuang akai.

³ Pakiasi' no gama' ru Tuhan, i Aki Kapuuno' takau manulu' ra ralan ondo' musiti' mai bayaan am atan ondo' musiti' mai baalon.”

⁴ Taam aku, “Iou noyo ru koon poyo raginio, makiasi' aku ra Tuhan, i Aki Kapuuno' takau sumugut ra kitaakon min; am atan pana pataamon Nano ra tauli no, posoboyon ku ramuyun pabukat kuno. Kalo bunion ku ra atan pana.”

⁵ Ilo pana mindagu boo raki', “Polosoon noyo Tuhan masauk ra sasi' ondo' mabanis guang am motopot ramon amon ru kalo gumagaya' akai ra susuban ondo' tinaakan ru Tuhan, i Aki Kapuuno' takau rirun koson ramon.

⁶ Nakitaak akai rirun makiasi' ra Tuhan, i Aki Kapuuno' takau. Ginio ra ondo' pataamon Nano moonsoi kapoam kalo, gumagaya' akai Riso. Baal mai masauk ra moonsoi amon ru gumagaya' Riso.”

Taaman ru Tuhan ra pakiasian ri Jirimia

⁷ Kopongo mopor ngoorou, minindagu Tuhan raki'.

⁸ Ginio ra nampiau aku ri Joganan, ngaangai' tingganai ru saujor, am ngaangai' ulun ra bokon ondo' nababaya' riso.

⁹ Indagu Aku risilo, “Nanusub kau raki' mampasaboi ra kitaakon min ngaangai' ra Tuhan, i Aki Kapuuno' ru Israil. Raino gitio noyo ragu Nano,

¹⁰ ‘Amon ru masaga' kau mamagun ra pagun ti, pasingkoton Takamin am kalo mamuso ramuyun. Potolorogon Takamin am kalo mamparanga' ramuyun. Kapusaan ondo' palumpaan Kuno ramuyun mangkinibit Raki' mangiluk kaga' guang.

¹¹ Pai' boo kalaa' ra raja' ru Babilonia. Mabaya' Aku ramuyun, am palabuson Takamin intor ra kuasa' nano.

¹² Ginio sabap ra Aku makaasi', mangkinibit Aku riso makaasi' ramuyun am mangiou ramuyun muli'. Aku, Tuhan, nakaindagu noyo.’

^13-15 Kaa' akau ondo' lakat poyo soroi giu' ra Jiuda musiti' gumagaya' ra Tuhan, i Aki Kapuuno' min am masaga' mayan ra pagun ti. Kalo paindaguon kau ra, ‘Masaga' akai mongoi ra Misir am mayan ra giu' no, maa' raginio kalo boo makaaya' ra pangayawan, kalo mokorongog ra bolos ru bujung samputin ondo' mampiau koson mangayou am kalo maimbolo' ra bitilan.’ Amon ru mindagu kau koon raginio, gitio noyo ragu ru Tuhan Ondo' Maayo Kaga' Kuasa', i Aki Kapuuno' ru Israil, ‘Amon ru gumogot kau mongoi ra Misir am mayan ra giu' no,

¹⁶ pangayawan am bitilan ondo' kalaanin min mangilou ramuyun saboi ra Misir, am matoi kau ra giu' no.

¹⁷ Ngaangai' ulun ondo' gumogot mongoi ra Misir am mayan ra giu' no matoi ralalom ru pangayawan, kapoam sabap ra bitilan, kapoam maruol tumapik. Kolondo' sangulun pana maayag kapoam makalabus intor ra karaat ondo' porotongon Kuno risilo.’

¹⁸ Tuhan, i Aki Kapuuno' ru Israil minindagu, ‘Koson ra sangit am lasu' ru guang Kuno nakalumpa' ra mamagun ru Jirusalim, koson raginio niayuk ra lasu' ru guang Kuno lumampa' ramuyun amon ru mongoi kau ra Misir. Mangalaa' ulun magilong ramuyun; asabin kau, am inggalan min alapon koson ra pagulasan. Kalo boo makakito kau ra pagun ti.’ ”

¹⁹ Aku pana mindagu poyo, “Nambala' noyo Tuhan ramuyun ngaangai' ondo' lakat poyo soroi giu' ra Jiuda maa' raginio kalo mongoi ra Misir. Ginio ra akau pakaraan Ku raino,

²⁰ ra akau ngaangai' tatanga' mambaal ra kasalaan maayo. Makitaak kau raki' makiasi' ra Tuhan, i Aki Kapuuno' takau, am nambantu' kau koson gumagaya' ra moonong susuban Nano.

²¹ Pinasaboi ku noyo ragu Nano ramuyun ngaangai', kaa' inanggal min moonong susuban ondo' pinasaboi kuli.

²² Ginio ra karaa' noyo: matoi kau ralalom pangayawan, kapoam sabap ra bitilan, kapoam maruol tumapik ra pagun ondo' kasagaan min mayan.”