JIRIMIA 41 - Tanou Moonsoi Timugon

¹ Paat ra sila' katulu' ru bilor raginio, i Ismail anak ri Nitania, akupu ri Ilisama, nababaya' ra mopor ngaulun minongoi ra Mijpa koson muma' ri Gidalia. I Ismail sangulun makapabukatan ra raja', am pagawai masawat ru raja'. Tatanga' ilo nantulibung ra mangakan.

² I Ismail am mopor ngaulun ondo' minaya' riso no namutus ra ilang am namatoi ri Gidalia.

³ Pinatoi niayuk ri Ismail ngaangai' ulun ru Israil ondo' nababaya' ri Gidalia giu' ra Mijpa, am saujor-saujor ru Babilonia ondo' nakapaat raginio soroi ra giu'.

⁴ Suabon raginio, ra kolondo' osoi poyo nakapandai ra namatayan ri Gidalia no,

⁵ balu' ngoopor ngaulun nakasaboi intor ra Sikgim, Silo am Samaria. Kinaur nilo jangut, rinilak bayang am pinilat-pilat inan. Tatanga' ilo nagibit ra gandum am kaminyan koson pataakon giu' ra Baloi ru Tuhan.

⁶ Ginio ra miningkual i Ismail intor ra Mijpa am minongoi uma' risilo. Nantangi' io liliwa' minindagu risilo, “Ibok ongoi ilai' i Gidalia.”

⁷ Pakasuku' ilo ayuk ra ralalom ru bandar no, i Ismail am ngaangai' ru ulun nano namatoi risilo, am namatir ra baangkai nilo ra ralalom ru rondo' tulubong.

⁸ Kaa' mokoondo' mopor ngaulun risilo ondo' minindagu ri Ismail, “Pai' akai potoyo'! Mokoondo' akai ra gandum, barli, umau jaitun, am ruu' ru maningot ondo' binuni giu' ra umo.” Ginio ra pinalabus ilo ri Ismail.

⁹ Tulubong intok namatiran ri Ismail ra ulun ondo' pinatoi nano tulubong maayo; tulubong raginio noyo ondo' kinali ru Raja' Asa paat io binulunsar ru Raja' Baisa intor ra Israil. Sinosok ri Ismail tulubong no ra baangkai.

¹⁰ Kopongo raginio rinakop ri Ismail ngaangai' anak ruandu' ru raja' am ngaangai' ru ulun ondo' soroi giu' ra Mijpa, ondo' pinataak ri Nibujaradan, panglima saujor no, pinalungan ri Gidalia. Rinakop ilo ri Ismail am nagibit risilo minongoi ra tampilon wilayah Amon.

¹¹ I Joganan am ngaangai' tingganai ru saujor ondo' nababaya' riso nokorongog intor ra kalaatan ondo' binaal ri Ismail.

¹² Ginio ra ilo am ulun nilo nangilou ri Ismail am namparakop riso mamaar ra rondo' kulam maayo giu' ra Gibion.

¹³ Paat ra ulun rinakop ri Ismail nakakito ri Joganan am tingganai-tingganai ru saujor no, naansukan ilo.

¹⁴ Lukiat ilo am pasimbul ongoi ra pulalai ri Joganan.

¹⁵ Kaa' i Ismail am balu' ngaulun ra ulun nano nakalabus intor ri Joganan am nagiru' ra pagun Amon.

¹⁶ I Joganan am tingganai-tingganai ru saujor nano ondo' nababaya' riso no pana nanimung boo ra ngaangai' ulun ondo' rinakop ri Ismail giu' ra Mijpa kalupus io namatoi ri Gidalia – saujor, ruandu', anak-anak, am sida-sida ondo' nasauk ra pagawai-pagawai ru istana.

^17-18 Nangalaa' ilo ngaangai' ra ulun Babilonia sabap ra i Ismail namatoi ri Gidalia ondo' linantik ru raja' Babilonia koson ra gabenor. Ginio ra minongoi ilo ra Misir koson nagiru' intor ra ulun ru Babilonia. Giu' ra tanga' ru pangkiralanan, minuog ilo giu' ra Kimgam mamaar ra Bitligim.