JIRIMIA 40 - Tanou Moonsoi Timugon

Minayan i Jirimia ri Gidalia

¹ Minindagu Tuhan raki' kalupus i Nibujaradan, panglima saujor no, nampalabus raki' giu' ra Rama. Inibit aku ra giu' no ra rinantai nababaya' ra ngaangai' ulun intor ra Jirusalim am Jiuda ondo' inibit koson ra ulun rinakop minongoi ra Babilonia.

² Panglima saujor no nagibit raki' ra kiing am indagu, “Tuhan, i Aki Kapuuno' muno, nompololob ra pagun ti ra kapusaan.

³ Raino sinugut no ragu Nano. Ngaangai' no nasauk sabap ra bansa' muno makatula ra Tuhan am kalo giminagaya' Riso.

⁴ Okou palabuson ku am mangiru' ra rantai intor ra longon muno. Amon ru masaga' kou, maya' kou raki' mongoi ra Babilonia am alungin tokou. Kaa' amon ru marara' kou, kalo pana. Giti ra titikop pagun ti, makaugar kou mongoi ra ati ayuk pana kasagaan muno.”

⁵ Paat ra aku kalo tumaam, mindagu i Nibujaradan, “Saguli' no ri Gidalia anak ri Agikam, akupu ri Sapan, ondo' linantik ru raja' Babilonia nasauk ra gabenor ru bandar-bandar ru Jiuda. Makaayan kou riso am maayag mababaya' ra mamagun kapoam mongoi ra ati ayuk kasagaan muno.” Kopongo raginio inanian no aku ra tangguang am lutu' ru akanon, am pinalabus no boo aku.

⁶ Minongoi aku ri Gidalia giu' ra Mijpa, am minayan nababaya' ra mamagun ondo' lakat poyo giu' ra pagun no.

I Gidalia, gabenor ru Jiuda

⁷ Kukula' ngaulun pagawai am saujor ru Jiuda lakat poyo kalo nakirakop. Nokorongog ilo ra raja' ru Babilonia nampalantik ri Gidalia nasauk ra gabenor ru pagun no, am ngaangai' mamagun ondo' musikin kaga' giu' ra pagun no, ondo' kalo inibit ra Babilonia pinataak ragana' ru kuasa' nano.

⁸ Ginio ra i Ismail anak ri Nitania, i Joganan anak ri Karia, i Siraya anak ri Tanumit, anak-anak ri Ipai ulun ru Nitopa, am i Jijania anak ri Maakga minongoi nababaya' ra ulun nilo minuma' ri Gidalia giu' ra Mijpa.

⁹ Indagu i Gidalia risilo, “Pabukat kau ngaangai' kalo pana malaa' makirakop ra ulun ru Babilonia. Pamagun no ra pagun ti am pangandoi no ra raja' ru Babilonia. Intopoton ku ra maayag kau.

¹⁰ Aku galama' mayan ra Mijpa, am aku manampilon ramuyun ngaangai' paat ra ulun ru Babilonia matong. Pabukat kau ngaangai' ayan no ra pekan-pekan am pambuli ra wain, kikinawa', am umau ru jaitun.”

¹¹ Liliwa' raginio, ngaangai' ulun ru Israil giu' ra pagun Moab, Amon, Idom am pagun-pagun ra bokon nokorongog ra raja' ru Babilonia nangiou noyo ra santayaran ulun ru Israil mayan giu' ra Jiuda, am ra raja' no nampalantik ri Gidalia masauk ra gabenor nilo.

¹² Ginio ra iniruanan nilo intok-intok nampatuliaran risilo, am siminaguli' ra Jiuda. Minatong ilo ri Gidalia giu' ra Mijpa, am giu' no nambuli ilo ra masuang wain am kikinawa'.

Pinatoi i Gidalia

¹³ Kopongo raginio, i Joganan am tingganai-tingganai ru saujor ondo' kalo poyo nakirakop, minatong ri Gidalia

¹⁴ am indagu riso, “Kalo kia nakapandai kou ra Raja' Baalis intor ra Amon, nanusub ri Ismail koson mamatoi rirun?” Kaa' kalo mangintopot i Gidalia.

¹⁵ I Joganan pana mindagu boo riso ra sininok, “Iowo' noyo aku mamatoi ri Ismail. Kolondo' osoi pana nakapandai raginio. Kua kia pinoloso io mamatoi rirun? Baal raginio mangkinibit ra ngaangai' ulun ru Jaudi ondo' timinimung nababaya' rirun nakapantuliar saguli', am karaat ra liminumpa' ra ngaangai' ulun ondo' lakat poyo soroi giu' ra Jiuda.”

¹⁶ Kaa' taam i Gidalia, “Pai' baalo' ginuang muno! Ragu-ragu muno intor ri Ismail no kalo motopot!”