JIRIMIA 38 - Tanou Moonsoi Timugon

I Jirimia giu' ra ralalom ru tulubong ondo' nalasak

¹ I Sipatia anak ri Matan, i Gidalia anak ri Pasyur, i Jukal anak ri Silimia am i Pasyur anak ri Malkia nokorongog ra aku nambala' ra mamagun intor ra

² ragu ru Tuhan, “Osoi ayuk mayan ra ralalom ru bandar ti matoi ralalom ru pangayawan, kapoam sabap ra bitilan, kapoam sabap ra maruol tumapik. Kaa' osoi ayuk mingkual am makirakop ra ulun ru Babilonia kalo potoyon; maa' ak ra io no maayag.”

³ Nambala' aku niayuk risilo ra ragu ru Tuhan ra pataakon No bandar ti ra saujor ru Babilonia, am gaawon nilo bandar ti.

⁴ Pagawai-pagawai no pana minuma' ra raja' am indagu, “Musiti' ulun ti ukumin ra matoi. Sabap ra ragu nano, saujor ru bandar ti malawo guang, koon niayuk ra moonong ulun ondo' lakat poyo minayan ra bandar ti. Kalo nangindangan io ra mamagun; kaa' nantipagon io poyo risilo.”

⁵ Indagu Raja' Jidikia, “Ginio poyo, guguang min mambaal ra kasagaan min riso. Kalo inggalarin takamin.”

⁶ Ginio ra inibit nilo aku am pinatuun aku ra kalat ra ralalom tulubong ru anak raja' i Malkia. Tulubong no soroi giu' ra liliut ru istana. Nalasakan tulubong no, molosok ayuk, aku pana nakatapung ra ralalom ru losok no.

⁷ Kaa' ulun ru Itiopia ondo' ininggalanan ri Ibid-Milik, iono sida-sida ondo' mangandoi ra istana, nokorongog ra pinasubol aku ra ralalom ru tulubong ru pagawai-pagawai no. Paat raginio tatanga' raja' naningganai ra pansusunuran giu' ra Kulobon Garabang Binjamin.

⁸ Minongoi i Ibid-Milik ra giu' no am indagu ra raja',

⁹ “Raja' kuno, binaal ru pagawai-pagawai no kalo motopot. Pinasubol nilo i Jirimia ra ralalom ru tulubong am maaru' matoi io maitilan ra giu' no sabap ra nakai' noyo akanon ra bandar ti.”

¹⁰ Kopongo raginio nanusub raja' ri Ibid-Milik maa' raginio magibit ra talu ngaulun koson mamunduk raki' mingkual intor ra tulubong no ra aku kalo poyo matoi.

¹¹ Minongoi i Ibid-Milik nabaya' ra talu ngaulun no ra gudang ru istana am nangalap ra konoon-konoon lair, am patuuno' no ra kalat raki'.

¹² Nanusub io raki' mampaantul ra konoon-konoon no ra pakilok kutu, maa' raginio kalo marualan aku paat ra aku bundukon painsawato' ra kalat no,

¹³ binunduk nilo aku pinaingkual intor ra tulubong no. Intor ragili inaput aku giu' ra liliut ru istana.

Raja' Jidikia nakipinson intor ri Jirimia

¹⁴ Rondo' paat ra bokon, nanusub Raja' Jidikia raki' muma' riso giu' ra kulobon katalu giu' ra Baloi ru Tuhan. Indagu raja', “Masaga' aku mangkuot ra rondo' pangkuatan, am musiti' kou mambala' toojo. Pai' sibunio' atan pana intor raki'.”

¹⁵ Taam aku, “Amon ru mambala' aku toojo, ukumin mu aku ra matoi; am amon ru mangani' aku ra pinson, kalo noyo lioon mu ginio.”

¹⁶ Ginio ra kalinuos ayuk ru Raja' Jidikia nambantu' raki', “Magibot aku ralalom inggalan ru Tuhan ondo' maayag, ondo' nangani' ritakau ra painawo, ra kalo ukumin tokou ra matoi kapoam pataakon kou ra ulun ondo' masaga' mamatoi rirun.”

¹⁷ Balai' ku boo Raja' Jidikia ra Tuhan Ondo' Maayo Kaga' Kuasa', i Aki Kapuuno' ru Israil, minindagu koon ragitio, “Amon ru makirakop kou ra pagawai ru raja' ru Babilonia, maayag kou am bandar ti kalo solobon. Okou am sasambaloi muno maayag.

¹⁸ Kaa' amon ru kalo makirakop kou, bandar ti pataakon ra ulun ru Babilonia. Solobon nilo bandar ti, am kalo makapagiru' kou intor risilo.”

¹⁹ Kaa' taam ru raja', “Malaa' aku ra mamagun kuno ondo' minaya' ra ulun ru Babilonia. Maaru' lair pataakon aku risilo am imboloon.”

²⁰ Indagu aku ra raja', “Okou raja' kalo pataakon ra pantula'. Kitaakon ku, gagayaa' noyo ragu ru Tuhan maa' raginio ngaangai' no maayag am painawo muno pana maalungan.

²¹ Kaa' nampakito noyo Tuhan raki' ra atan ondo' masauk rirun raja' amon ru kalo masaga' kou makirakop.

²² Ralalom ru pinaintalang no nakakito aku ra ngaangai' ruandu' ondo' lakat poyo soroi giu' ra istana ru Jiuda inibit minuma' ra pagawai-pagawai ru raja' ru Babilonia. Liliwa' mugar ruandu'-ruandu' no mindagu, ‘Raja' rinuung ru rangan-rangan nano, nanguasa' ilo riso. Raino paat ra kalayam ru raja' nakatapung noyo ra losok, nangiruan rangan-rangan nano riso.’ ”

²³ Indagu aku poyo, “Ngaangai' andu' am niayuk anak muno raja' ibiton ra ulun ru Babilonia, am okou galama' pana kalo makapagiru' intor risilo. Rokopon kou ru raja' ru Babilonia, am bandar ti solobon saboi makai'.”

²⁴ Indagu Raja' Jidikia, “Pai' iowo' osoi pana makapandai ra sunuron tati, maa' raginio kalo matoi kou.

²⁵ Amon ru nokorongog pagawai-pagawai ra minindagu aku rirun, kuatin nilo intor ra nansunuran tani. Mambantu' ilo ra kalo mamatoi ilo rirun amon ru tunungon mu ngaangai' no.

²⁶ Balai' ilo ra makitaak kou maa' raginio kalo pasubolon tokou saguli' ra pangaputan am kalo polosoon kou matoi ra giu' no.”

²⁷ Kopongo raginio pagawai-pagawai minatong nangkuot raki'. Binalaan ku ilo topot koson ra nanusuban ru raja'. Kalo nakapambaal ilo ra atan pana, sabap ra kolondo' sangulun pana nokorongog ra nansunuran mai.

²⁸ Inaput aku giu' ra liliut ru istana no saboi ra Jirusalim ginaau ru pantula'.