JIRIMIA 35 - Tanou Moonsoi Timugon

I Jirimia am ulun bansa' ru Rikab

¹ Paat ra Raja' Joyakim anak ungkuyon ru Raja' Josia nasauk ra panguasa' ru Jiuda, minindagu Tuhan raki',

² “Ongoi no indagu ra ulun intor ra bansa' ru Rikab. Ibito' ilo ra rondo' lamin giu' ra Baloi Kuno am painumo' ilo ra wain.”

³ Aku pana nagibit boo ra ngaangai' bansa' ru Rikab, iono i Jaajanya (anak ru sangulun ondo' ininggalanan ri Jirimia anak ri Gabajinya) nababaya' ra ngaangai' pabukat am anak ungkuyon nano,

⁴ am ongoi ra Baloi ru Tuhan. Inibit ku ilo ra lamin ru maamaya' ru Nabi Ganan anak ri Jigdalya. Lamin no giu' ra rasawat ru lamin ri Maasiya anak ri Salum, sangulun pagawai masawat giu' ra Baloi ru Tuhan. Lamin no niayuk mamaar ra lamin ru pagawai-pagawai ra bokon.

⁵ Sinulungan ku bansa' ru Rikab no ra wain ralalom ru sangkir am mangkuk. Indagu aku risilo, “Inum kau ra wain!”

⁶ Kaa' taam ilo, “Kalo manginum akai ra wain. Kinamatuaan maili, i Jonadab anak ri Rikab, nanginggalar ramon am papag mai intor ra manginum ra wain.

⁷ Nanginggalar io niayuk ramon mambaal ra baloi kapoam magitanom, manangumo kapoam mambali raginio. Nanusub io ramon maa' raginio magail mayan giu' ra kim, maa' raginio makaayan akai ra pagun ti koson ra ulun bansa' ru bokon.

⁸ Ginagaya' mai ngaangai' nanusuban ri Jonadab no. Akai am andu' mai kalo igondo' inum ra wain; koson niayuk ra anak ungkuyon kapoam anak ruandu' mai.

^9-10 Kalo nambaal akai ra baloi koson intok ayanan; minayan akai giu' ra ralalom ru kim. Kolondo' akai ra umo ru anggur, umo kapoam sampug ru gandum. Ginagaya' mai toojo atan ayuk ondo' nanusuban ru kinamatuaan mai, i Jonadab.

¹¹ Kaa' paat ra Raja' Nibukadnijar namulunsar ra pagun ragitio, namatas akai koson matong ra Jirusalim maa' raginio magiru' intor ra saujor ru Babilonia am Siria. Ginio sabap ra akai minayan ra Jirusalim.”

^12-13 Kopongo raginio Tuhan Ondo' Maayo Kaga' Kuasa', i Aki Kapuuno' ru Israil, nanusub raki' minindagu ra mamagun ru Jiuda am Jirusalim, “Aku, Tuhan, nangkuot ra sabap min kalo riminongog ra ragu Kuno am marara' sumugut ra susuban Kuno.

¹⁴ Papag ri Jonadab giminagaya' ra susuban ri Jonadab maa' raginio kalo manginum ra wain. Saboi ra orou raiti' kolondo' sangulun pana risilo nanginum ra wain. Kabalu' pana rinayus Ku minindagu ramuyun, kaa' kalo ginagaya' min Aku.

¹⁵ Rinayus Ku nanusub ra ngaangai' ulipon Kuno, nabi-nabi mongoi ramuyun, am nanusub ilo ramuyun mangiruan ra binaal malaat am mambaal ra ondo' moonsoi. Nampakara' ilo ramuyun maa' raginio kalo sumamba kapoam mangandoi ayuk ra tuhan-tuhan ra bokon, maa' raginio marayusan min mayan ra pagun ondo' pinataak Kuno ramuyun am kinamatuaan min. Kaa' kalo riminongog kapoam nampalio kau Raki'.

¹⁶ Ginagaya' ru papag ri Jonadab susuban ru kinamatuaan nilo, kaa' kalo ginagaya' min Aku.

¹⁷ Ginio ra raino Aku, Tuhan Ondo' Maayo Kaga' Kuasa', i Aki Kapuuno' ru Israil, mamparatong ra karaat ondo' binantu' Kuli ramuyun, mamagun ru Jiuda am Jirusalim. Baalon Ku gitio sabap ra marara' kau rumongog paat ra Aku mindagu, am marara' kau tumaam paat ra Aku mampiau.”

¹⁸ Aku pana nambala' boo ra bansa' ru Rikab, ra Tuhan Ondo' Maayo Kaga' Kuasa', i Aki Kapuuno' ru Israil minindagu, “Ginagaya' min susuban ru kinamatuaan min i Jonadab; sinugut am binaal min nanusuban nano.

¹⁹ Ginio ra Aku, Tuhan Ondo' Maayo Kaga' Kuasa', i Aki Kapuuno' ru Israil, nambantu' ra i Jonadab anak ri Rikab magail mokoondo' ra papag ra ungkuyon ondo' mangandoi ayuk Raki'.”