JIRIMIA 33 - Tanou Moonsoi Timugon

Bantu' ra bokon ondo' mangani' ra kalansanan

¹ Paat ra aku lakat poyo rinakop giu' ra liliut ru istana, nampasaboi Tuhan ra tanou ra bokon raki'.

² Tuhan, ondo' namingkal ra tana' ti am inangun toojo am niayuk pinaatang ra intok no, minindagu raki'. Io ondo' ininggalanan ra Tuhan minindagu,

³ “Golok no Raki', am taamon Ku; mambala' Aku rirun ra baal-baal ondo' moonsoi am makaimuag, ondo' kalo poyo napandayan muno.

⁴ Aku, Tuhan, i Aki Kapuuno' ru Israil, minindagu ra baloi-baloi giu' ra Jirusalim am istana ru raja' ru Jiuda lunsayon, kinibit ru pagawangan am pamulunsaran ru pantula'.

⁵ Kukula' ngaulun mangayou ra ulun ru Babilonia, ondo' mompososok ra baloi-baloi ra baangkai ru ulun ondo' linamba' Kuno saboi minatoi paat ra Aku siminangit am liminasu' guang. Iniruanan Ku bandar ti sabap ra kalaatan ru mamagun nano.

⁶ Kaa' tauli no punaan Ku baal ru bandar ti am mamabas ra mamagun nano. Manaak Aku ra malabaan ra kaansayan am kamiaan risilo.

⁷ Saukon Ku Jiuda am Israil ra langkaya', am manirong risilo saguli' koson ragili.

⁸ Kapasawon Ku ilo intor ra tula nilo Raki'; ampunon Ku tula am guor nilo.

⁹ Jirusalim masauk ra kaansukan, kaurumatan am kaansayin Kuno. Ngaangai' bansa' ra tana' ti malaa' am monontol, paat nokorongog ra ngaangai' moonsoi ondo' binaal Ku koson ra mamagun ru Jirusalim, am intor ra kalangkayaan ondo' pinataak Ku ra bandar ragitio.”

¹⁰ Indagu Tuhan, “Kon ru ulun ra intok ti koson ra tana' kaagisan, am kolondo' ulun kapoam bibiag ondo' minayan ragiti. Ragu nilo tojojo motopot, sabap ra bandar-bandar Jiuda am ralan-ralan giu' ra Jirusalim masiluk ngaangai' no; kolondo' ulun am bibiag ondo' minayan ra giu' no. Kaa' giu' ra intok-intok raginio morongog poyo

¹¹ bolos maansayan am maansukan am niayuk golos ru pangiantakan ru paguguatan. Mokorongog akai ra ulun marimbai liliwa' magibit ilo ra taak simbalui ru paringkuanangan ra Baloi Kuno. Konilo, ‘Paringkuanangan ra Tuhan Ondo' Maayo Kaga' Kuasa', sabap ra moonsoi Io am togom Nano mantilayun ra sabubuoi no.’ Saukon Ku pagun ragitio ra langkaya' koson ragili. Aku, Tuhan, nakaindagu noyo.”

¹² Indagu Tuhan Ondo' Maayo Kaga' Kuasa', “Giti ra pagun ondo' koson ra tana' kaagisan ti, ondo' kalo inayanan ru ulun kapoam bibiag, igondo' poyo mokoondo' ra padang makasakot, intok ru ulun magalung ra domba nilo.

¹³ Giu' ra bandar-bandar ra tampilon kabuluran, giu' ra lonson toojo ru bulur, giu' ra tampilon rabugus ru Jiuda, giu' ra wilayah ru Binjamin, giu' ra pekan-pekan ra liliut ru Jirusalim, am giu' ra bandar-bandar ru Jiuda, igondo' poyo magagalung-magagalung manguntob ra domba nilo. Aku, Tuhan, nakaindagu noyo.”

¹⁴ Indagu Tuhan, “Masaboi paat no ra suguton Ku bantu' Kuno ra mamagun ru Israil am Jiuda.

¹⁵ Paat raginio pilion Ku sangulun ondo' matimpok intor ra papag ri Daut koson masauk ra raja'. Mambaal raja' no ra atan ondo' motopot am matimpok giu' ra titikop pagun.

¹⁶ Mamagun ru Jiuda am Jirusalim bayagon, am maayag ilo ra mamimio. Bandar no inggalanin ra ‘Tuhan Mamamayag Ritakau’.

¹⁷ Aku, Tuhan nambantu' ra masalok mokoondo' sangulun intor ra papag ri Daut ondo' masauk ra raja' ru Israil;

¹⁸ am masalok soroi imam intor ra bansa' ru Liwi koson mangandoi ayuk Raki' am mampataak ra taak simbalui koson mapabansuk ra guang Kuno, taak simbalui koson paringkuanangan Raki', am taak-taak simbalui ra bokon.”

¹⁹ Indagu Tuhan raki',

²⁰ “Nakimabantu' Aku ra matawang am rondom, maa' raginio matawang am rondom masalok matong ra maaru' paat no. Nabantuan no kalo maalap kasulang.

²¹ Koon raginio noyo ra Aku nakimabantu' ra ulipon Kuno i Daut, ra intor ra papag nano masalok mokoondo' sangulun ondo' masauk ra raja'; am nakimabantu' Aku ra imam-imam intor ra papag ru Liwi, ra masalok ilo mangandoi ayuk Raki'. Nabantuan raginio kalo noyo toojo masulang.

²² Ruangin Ku suang ru papag ri Daut, am suang ru imam-imam ra papag ru Liwi, saboi suang nilo kalo mauntob koson ra butitin giu' ra limbowon am agis giu' ra nagas.”

²³ Indagu Tuhan raki',

²⁴ “Nakapandai kou kia ra inimpayan Ku Israil am Jiuda, ruo sasambaloi ondo' pinili' Kuno? Ulun magasab ra ulun Kuno am kalo boo mangkara' risilo koson ra rondo' bansa'.

²⁵ Kaa' Aku, Tuhan, mokoondo' ra nabantuan ra matawang am rondom, am nambaal Aku ra ukum ondo' manguasa' ra limbowon am tana' ti.

²⁶ Koson ra baal raginio kalo masulang, koson niayuk ra nabantuan Kuno ra papag ri Jakub am ulipon Kuno i Daut, kalo masulang. Pilion Kuno sangulun intor ra papag ri Daut koson mamarinta ra papag ri Abragam, i Isak am i Jakub. Makaasi' Aku ra ulun Kuno am mapasauk risilo ra langkaya' saguli'.”