JIRIMIA 32 - Tanou Moonsoi Timugon

Nambali i Jirimia ra tana'

¹ Paat ra bilor koopor ra pamarintaan ru Raja' Jidikia giu' ra Jiuda, iono bilor koopor am balu' ru pamarintaan ru Raja' Nibukadnijar giu' ra Babilonia, minindagu Tuhan raki'.

² Paat raginio saujor ru raja' ru Babilonia tatanga' mamulunsar ra Jirusalim. Rinakop aku giu' ra liliut ru istana raja'

³ ru Raja' Jidikia sabap ra inuwan aku nampatanou ra minindagu Tuhan, “Polosoon Ku raja' ru Babilonia manguasa' ra bandar ti,

⁴ am Raja' Jidikia kalo makapagiru'. Pataakon io ra raja' ru Babilonia; muma' io ra raja' no am mindagu riso.

⁵ Kopongo raginio ibito' i Jidikia ra Babilonia am mayan ra giu' no saboi ra ukumin Ku io. Kabalu' pana mamulunsar io ra ulun ru Babilonia, kalo makasugut io. Aku, Tuhan nakaindagu noyo.”

⁶ Nambala' Tuhan raki'

⁷ ra i Anamiil, anak ungkuyon ru kamaman kuno i Salum, matong raki' koson mangitaak raki' maa' raginio balion ku tana' nano giu' ra Anatot, giu' ra wilayah Binjamin. Aku noyo pabukat nano ra mamaar kaga' am matimpok mambali ra tana' no.

⁸ Topot koson ra rinagu noyo ru Tuhan, minatong i Anamiil raki' giu' ra liliut ru istana, am nangitaak koson balion ku tana' no. Ginio boo ra mangintopot aku ra topot-topot Tuhan minindagu raki'.

^9-10 Binali ku tana' no intor ra Anamiil ra logo mopor am tulu' ngampila' ruit pirok. Piniau ku kukula' ngaulun sasi' am giu' ra saang nilo, sinainan am sinaapan ku surat pambalian ra tana' no, am tinimbang ku ruit pinambayar no.

¹¹ Kopongo raginio inalap ku surat pambalian no, ondo' sinaapan am mokoondo' ra bantu' am inaru', am inalap ku niayuk rinalin ru surat ondo' kalo sinaapan.

¹² Tinaakan ku karuruo surat no ri Baruk anak ri Niria, akupu ri Magsiya. Pinataak ku ginio giu' ra saang ri Anamiil am niayuk sasi'-sasi' ondo' siminain ra surat-surat no, am giu' ra saang ru ngaangai' ulun ondo' tatanga' nanturung giu' ra liliut no.

¹³ Giu' ra saang nilo ngaangai', minindagu aku ri Baruk,

¹⁴ “Tuhan Ondo' Maayo Kaga' Kuasa', i Aki Kapuuno' ru Israil, nanusub rirun mangalap ra surat ruo ngampila' no, ondo' sinaapan am niayuk ondo' kalo sinaapan. Pinasuang karuruo surat no ra ralalom ru rondo' rarapu' maa' raginio tumaan ra mabuoi.

¹⁵ Tuhan Ondo' Maayo Kaga' Kuasa', i Aki Kapuuno' ru Israil, minindagu ra baloi, tana' am umo ru anggur balion poyo giti ra pagun ti.”

Pakiasian ri Jirimia

¹⁶ Pakataak ku surat-surat pambalian no ri Baruk, pakiasi' aku,

¹⁷ “Iou Tuhan Raja', Okou no ondo' nambaal ra limbowon am tana' ti ra kuasa' am kaikangan Muno ondo' maayo. Kolondo' ondo' mapagon kaga' Rirun.

¹⁸ Nampakito Kou ra togom Muno ondo' mantilayun ra riribu ulun, kaa' nangukum Kou niayuk ra ulun sabap ra tula ru matuo nilo. Okou noyo i Aki Kapuuno' ondo' matulai am maikang toojo; Okou no Tuhan Ondo' Maayo Kaga' Kuasa'.

¹⁹ Inatangan Muno mapintar am binaal Muno makaimuag; nakito Mu ngaangai' ondo' binaal ru ulun, am nambalos risilo topot koson ra binaal nilo.

²⁰ Paat ra galing i nambaal Kou ra kaimuagan am baal-baal ra makaimuag giu' ra Misir, am saboi raino pana lakat kou poyo mambaal raginilo, ra gino ngai' ru Israil am niayuk ra gino ngai' ru bansa' ra bokon. Koon raginio noyo Okou nauligan kaga' ra ati ayuk intok.

²¹ Inibit Mu ulun ru Israil miningkual intor ra Misir ra kuasa' am kaikangan Muno. Nambaal Kou ra kaimuagan am baal-baal makaimuag ondo' nampakalalaa' ra pantula'.

²² Nangani' Kou ra pagun ondo' moonsoi am malabung ti risilo, koson ra ondo' binantu' Mu noyo ra kinamatuaan nilo.

²³ Kaa' paat ra ilo minatong ra pagun ti am minayan, kalo giminagaya' ilo ra susuban Muno, am kalo naayag siminugut ra pangilaan Muno. Kalo siminugut ilo ra rondo' pana intor ra susuban Muno. Ginio ra namparatong Kou ra ngaangai' karaat ti risilo.

²⁴ Nambaal ulun ru Babilonia ra timbok pagawangan giu' ra liliut ru bandar koson mampagaau raginio, am raino tatanga' ilo mamulunsar raginio. Pangayawan, bitilan am maruol tumapik mangkinibit ra bandar ti maratu' ra ralalom ru kalindu' nilo. Nakito Mu ra ngaangai' ondo' rinagu Muno topot-topot nasauk.

²⁵ Kabalu' pana koson raginio, iou Tuhan Raja', Okou noyo nanusub raki' nambali' ra tana' giu' ra saang ru kukula' ngaulun sasi', kabalu' pana sangkinolor poyo bandar no kuasaan ru ulun ru Babilonia.”

²⁶ Kopongo raginio indagu Tuhan raki',

²⁷ “Aku noyo Tuhan, i Aki Kapuuno' ru ngaangai' ulun. Kolondo' ondo' mapagon kaga' Raki'.

²⁸ Pataakon Ku bandar ti ra Raja' Nibukadnijar intor ra Babilonia am saujor nano. Gaawon nilo bandar ti,

²⁹ am solobon. Solobon nilo saboi makai' mababaya' ra baloi-baloi ru ulun ondo' napasingkual ra sangit Kuno. Giu' ra taap ru baloi solobon nilo kaminyan ra Baal am pasasaron wain koson pataakon ra dewa-dewa.

³⁰ Intor ra talimpuun ru sejarah nilo, ulun ru Israil am ulun ru Jiuda kalo napabansuk ra guang Kuno, am napasingkual ilo ra sangit Kuno ra binaal nilo.

³¹ Intor ra bandar ti binaal, mamagun nano nangkinibit Raki' siminangit toojo. Namatas Aku no koson mamuso ra bandar no,

³² sabap ra ngaangai' kalaatan ondo' binaal ru ulun ru Jiuda am ulun ru Jirusalim, nababaya' ra raja'-raja' am tingganai-tingganai, imam-imam am nabi-nabi nilo.

³³ Nangiruan ilo Raki' kabalu' pana narayus Aku nangila' risilo, marara' ilo mangkirongog am marara' mangapu ra pangilaan.

³⁴ Baloi Kuno pana binaal koson intok sambayangan Raki' no jinamalan nilo ra napabanta' ra sinungkalalaing ondo' makatataman giu' ra intok no.

³⁵ Nambaal ilo ra altar-altar ra Baal giu' ra Limayak Ginom, am nampataak ra anak-anak nilo ra Dewa Molok. Sotopot no, kalo igondo' Aku nanusub risilo mambaal raginio, am poyo kalo igondo' tabual ralalom ru pangkaraan Kuno ra baalon nilo baal malaat raginio am nangkinibit ra ulun ru Jiuda makatula.”

Bantu' ondo' mangani' ra kalansanan

³⁶ Tuhan, i Aki Kapuuno' ru Israil, minindagu raki', “Okou Jirimia, bansa' ru Israil minindagu ra pangayawan, bitilan, am maruol tumapik mangkinibit ra bandar ti maratu' ra ralalom ru kalindu' ru raja' ru Babilonia. Raino, rongogo' ragu Kutu.

³⁷ Timungon Ku bansa' ragitio intor ra ngaangai' pagun intok nampatuliaran Kuno risilo sabap ra sangit am lasu' ru guang Kuno risilo. Ibiton Ku ilo sumaguli' ra intok ragitio am paayanon ilo ra giti ra mamimio.

³⁸ Masauk ilo ra ulun Kuno, am masauk Aku ri Aki Kapuuno' nilo.

³⁹ Aniin Ku ilo ra rondo' kuayan ru kaayagan: koson mangurumat Raki' ra sabubuoi no koson ra kaatangan nilo galama' am papag nilo.

⁴⁰ Mambaal Aku ra nabantuan ondo' mantilayun risilo. Kalo lumonggo' Aku mambaal ra moonsoi risilo. Mangkinibit Aku risilo malaa' am mangurumat Raki' ra sotopot ru guang maa' raginio kalo mangiruan ilo Raki'.

⁴¹ Mabaya' ra guang makaansuk mambaal Aku ra moonsoi risilo, am palayunon Ku ilo ra pagun ti ra sabubuoi no.

⁴² Koson ra Aku namparatong ra karaat ra bansa' ragitio, koson raginio niayuk ra Aku mangani' risilo ra ngaangai' ondo' moonsoi, ondo' binantu' Kuli.

⁴³ Mindagu ulun ra pagun ragitio masauk koson ra tana' kaagisan ondo' kalo inayanan ru ulun am bibiag, am pagun ragitio maratu' ra kalindu' ru ulun ru Babilonia. Kaa' umo-umo ra pagun ragitio balion ru ulun poyo.

⁴⁴ Balion ru ulun umo am surat pambalian no sainin am saapin giu' ra saang ru sasi'-sasi'. Baal raginio masauk giu' ra wilayah Binjamin, giu' ra pekan-pekan ra liliut ru Jirusalim, giu' ra bandar-bandar Jiuda, giu' ra bandar-bandar ra tampilon kabuluran, giu' ra tampilon lonson toojo ru bulur, am giu' ra tampilon rabugus ru Jiuda. Pasagulion Ku bansa' ragitio ra pagun nilo. Aku, Tuhan nakaindagu noyo.”