JIRIMIA 31 - Tanou Moonsoi Timugon

Siminaguli' Israil ra pagun galama'

¹ Indagu Tuhan, “Masaboi paat ra Aku masauk ri Aki Kapuuno' ra ngaangai' bansa' ru Israil, am ilo masauk ra ulun Kuno.

² Ragili giu' ra tana' kaagisan nampakito Aku ra makaasi' risilo ondo' nakalabus intor ra kapatayan. Paat ra ulun ru Israil maguyum ra katangusan,

³ intor ra maalur minintalang Aku risilo. Ulun kau ru Israil, intor ragili masalok Aku motogom ramuyun, am parayuson Ku mampakito ra masalok Aku motogom ramuyun.

⁴ Kaikangon Ku saguli' intok min. Igondo' poyo ra mangalap kau ra tamburing am mansayau ra maansukan.

⁵ Manangumo kau ra anggur giu' ra kabuluran ru Samaria, am ulun ondo' mantanom ra anggur makasia' ra ampos no.

⁶ Sotopot no, masaboi paat no ra ulun-ulun magagalung ru bandar gumolok giu' ra kabuluran Ipraim, ‘Ibok pagaloi takau ra Sion, mongoi ra Tuhan, i Aki Kapuuno' takau.’ ”

⁷ Indagu Tuhan, “Parimbai no ra maansukan ra tayar ru Israil, bansa' ondo' kasaa' ra gino ngai' ru bansa'. Parimbai no ra rimbai mongompor, ‘Binayag ru Tuhan ulun Nano; binayag No ngaangai' ulun ondo' lakat poyo natatang.’

⁸ Intor ra ralayo ibiton Ku ilo saguli', timungon Ku ilo intor ra pompor ru tana' ti. Ulun bolou am ulun kalo makalulu' maya' risilo, koon niayuk ra ruandu' maapang am ilo ondo' maar maganak. Sumaguli' ilo koson ra bansa' ondo' maayo.

⁹ Liliwa' mantangi' ulun Kuno sumaguli', makiasi' ilo paat ra Aku maningganai risilo muli'. Tingganayon Ku ilo mongoi ra sungoi-sungoi boborok, mansail ra ralan marata' maa' raginio kalo makasaru ilo. Aku koson ra sangulun ama' ra Israil, i Ipraim anak Kuno ra katuaan.”

¹⁰ Indagu Tuhan, “Rongog kano bansa' kau ngaangai'! Potonowo' noyo tanou Kuno ra sandaup ru raat Ulun Kuno ondo' pinantutuliar Kuno timungon Ku am alungin Ku koson ra magagalung mantamung ra domba nano.

¹¹ Pinalabus Ku noyo ulun ru Israil, am namayag risilo intor ra bansa' ondo' maikang.

¹² Matong ilo ra Bulur Sion liliwa' marimbai ra maansukan; maansukan ilo sabap ra pinataak Kuno, iono gandum, wain, umau jaitun, domba am sapi'. Ilo koson ra taman ondo' naukop ra timug, kalo naawayan ilo ra atan pana.

¹³ Paat raginio ralaa-ralaa mansayau ra maansukan. Ungkuyon-ungkuyon, matutuo am mamulok maansukan. Bansukon Ku ilo am mangulau ra kangilukan nilo masauk ra kaansukan. Kalumpusan masauk ra kaansayan.

¹⁴ Imam-imam basugon Ku ra akanon masuang, am mangukop ra ngaangai' ondo' pakuan ru ulun Kuno. Aku, Tuhan, nakaindagu noyo.”

Makaasi' Tuhan ra Israil

¹⁵ Indagu Tuhan, “Giu' ra Rama morongog manulaboi, tangi' ra malumpus kaga'. Nanulaboi i Ragil ra anak-anak nali; marara' io simoyoon sabap ra kalio ilo boo.

¹⁶ Langgai' tangi' muno am piiri' lomou muno. Bagui muli koson ra anak-anak muli balasin ra moonsoi; muli' anak-anak muli intor ra pagun ru pantula'.

¹⁷ Mokoondo' ra kalansanan ra orou tauli muno; anak-anak muno muli' ra pagun galama'. Aku, Tuhan, nakaindagu noyo.

¹⁸ Nokorongog Aku ra ulun ru Israil mindagu ra malumpus kaga', ‘Iou Tuhan, koson akai ra anak ru sapi' ondo' kalo poyo pinakaup, kaa' nangila' Kou ramon maa' raginio gumagaya' akai. Ibito' akai sumaguli'; nakatampos akai no sumaguli' Rirun, sabap Okou no Tuhan, i Aki Kapuuno' mai.

¹⁹ Timinalikur akai intor Rirun, kaa' pansagulian akai ra binaal raginio. Kopongo ra Okou nangukum ramon, parikuku' ulu mai sabap ra mangiluk guang. Nauyu' akai am inasaban sabap ra makatula akai paat ra kinamuloko'.’

²⁰ Okou Israil, okou anak togom Kuno, anak katagaman toojo, uyayaan Kuno. Moonong Aku mompololob rirun, karaan Tokou mabaya' ra ondom. Tagamin Tokou; makaasi' Aku.

²¹ Tatandui' noyo ralan, am tansaki' ra panuluan ra ralan; uyumo' ralan ondo' binayaan muno ragili. Ulun kau ru Israil, uli' kano. Saguli' no ra bandar-bandar min ragili.

²² Saboi sanggilan kau pagantangan, bansa' kau ondo' kalo gumagaya' Raki'? Nambaal Aku kia ra rorondo' ondo' bagu am makaimuag, makaimuag koson ra ruandu' manindung ra ungkuyon.”

Kalangkayaan ru ulun ri Aki Kapuuno' ra orou tauli

²³ Tuhan Ondo' Maayo Kaga' Kuasa', i Aki Kapuuno' ru Israil minindagu, “Paat ra pasagulion Ku ulun Kuno ra pagun nilo, pagun Jiuda am bandar-bandar nano pana mokorongog poyo ra ulun mindagu, ‘Gama' ru barakaton ru Tuhan bulur matulai giu' ra Jirusalim intok inayanan ondo' pinatimpok Riso.’

²⁴ Mayan ulun giu' ra Jiuda am giu' ra ngaangai' ru bandar nano. Giu' no mokoondo' ra ulun magitanom, am ulun magagalung am ra bibiag tinambiag nilo.

²⁵ Paikangon Ku ilo ondo' maagui, am basugon ilo ondo' malawo sabap ra naitilan.

²⁶ Paat raginio mindagu ulun, ‘Mopongo mokororot, maikang aku.’

²⁷ Aku, Tuhan nakaindagu ra masaboi paat no ra sosokon Ku pagun Israil am Jiuda ra ulun am bibiag.

²⁸ Koson ragili nagalung Aku koson mamubul, mampalunsai, mampaluir, mamuso am manutuk risilo, koson niayuk ra Aku magalung koson mopotolorog am mampabigor risilo saguli'.

²⁹ Paat raginio kalo boo mindagu ulun, ‘Matuo mangakan ra kawa' ru anggur mataris, kaa' anak-anak ondo' makaliman ra maangil.’

³⁰ Kaa' osoi ayuk mangakan ra kawa' ru anggur ondo' mataris, io galama' noyo makaliman ra maangil. Moonong ulun matoi sabap ra tula nano galama'.”

³¹ Indagu Tuhan, “Masaboi paat no ra mambaal Aku ra nabantuan ondo' bagu ra ulun ru Israil am Jiuda.

³² Nabantuan no sala' ka koson ra nabantuan ondo' binaal Kuno ra kinamatuaan nilai paat ra Aku nagibit risilo miningkual intor ra Misir. Kabalu' pana koson Aku ti ra sangulun ralaki risilo, kaa' inanggal nilo nabantuan Kuno risilo.

³³ Gitio noyo nabantuan bagu ondo' baalon Kuno ra ulun ru Israil: Buliin Ku ukum Kuno ra ralalom ru guang nilo, am tulisin ginio ra guang nilo. Masauk Aku ri Aki Kapuuno' nilo, am masauk ilo ra ulun Kuno.

³⁴ Kolondo' sangulun pana risilo musiti' mangila' ra ulun pogondo' nano koson mulig ra Tuhan, sabap ra ilo ngaangai', maayo boborok, makaulig Raki'. Lilianin Ku kasalaan nilo am mangampun ra tula nilo. Aku, Tuhan, nakaindagu noyo.”

³⁵ Pinaatang ru Tuhan mato ru orou koson mampasinda ra matawang, am pinaatang No bulan am butitin koson mampasinda ra rondom. Mangkinibit Io ra timug ru raat mangkinulun am gogolon, am inggalan Nano Tuhan Ondo' Maayo Kaga' Kuasa'.

³⁶ Nambantu' Io ra buoi ru ukum kalo makulau baal ru tana' ti, Israil pana soroi ayuk koson ra bansa'.

³⁷ Amon ru rondo' paat ra limbowon maalap ra tuku', am lonor ru tana' ti maalap kaimumuyi', paat raginio noyo Israil impayin No sabap ra ngaangai' binaal nilo. Nakaindagu noyo Tuhan.

³⁸ Indagu Tuhan, “Masaboi paat no ra titikop ru Jirusalim baalon saguli' koson ra bandar Kuno, intor ra Manara Gananil saboi ra Kulobon Garabang Pisuk.

³⁹ Intor ra giu' no balitan nano sumuku' ra Bulur Garib, am lumisang ra Goa.

⁴⁰ Titikop ru limayak raginio, ondo' pakayon koson ra tana' kalabangan am intok pamatiran ra ginsamol, am ngaangai' umo giu' ra kiing ru Sungoi Kidron saboi ra Kulobon Garabang Kuda mongoi tampilon ra sirangon, patimpokon Raki'. Bandar Jirusalim kalo boo lunsayon kapoam pusoon.”