JIRIMIA 29 - Tanou Moonsoi Timugon

Surat ri Jirimia posoboyon ra ulun ru Jaudi giu' ra Babilonia

¹ Nanulis aku ra surat posoboyon ra imam-imam, nabi-nabi, tingganai-tingganai ru bansa', am ra ngaangai' ulun bokon giu' ra Jirusalim ondo' rinakop ru Raja' Nibukadnijar am inibit ra Babilonia.

² Nanulis aku ra surat no kalupus Raja' Joyakin, ina' nano, pagawai-pagawai istana, tingganai-tingganai ru ulun ru Jiuda am Jirusalim, ulun-ulun manukang, am ulun mangandoi ra mangapandai inibit ra pamatiran.

³ Pinataak ku surat no ri Ilasa anak ri Sapan am i Gimarya anak ri Ilkia, ondo' sinusub ru Raja' Jidikia intor ra Jiuda, posoboyon ra Raja' Nibukadnijar intor ra Babilonia. Suang ru surat no,

⁴ “Koon ragitio ragu ru Tuhan Ondo' Maayo Kaga' Kuasa', i Aki Kapuuno' ru Israil, posoboyon ra ngaangai' ulun ondo' pinoloso No rinakop ru Raja' Nibukadnijar, am inibit intor ra Jirusalim pinoongoi ra Babilonia:

⁵ ‘Rondon no ra giu' no. Baalo' baloi min. Panangumo am sia' no ra ampos no.

⁶ Paguguot no maa' raginio makaanak kau, am polosoon min anak min niayuk maguguot maa' raginio ilo pana makaanak. Suang min musiti' rumuang am kalo maawai.

⁷ Pangandoi no koson ra kalangkayaan ru bandar intok namatiran Kuno ramuyun. Pakiasi' kano Raki' koson ra kaatangan ru bandar raginio, sabap amon ru bandar no langkaya', akau pana langkaya'.

⁸ Aku Tuhan, i Aki Kapuuno' ru Israil, nampakara' ramuyun maa' raginio kalo mokoloso inan ruungon ru nabi-nabi ondo' minayan ra tatanga' min kapoam ru osoi pana ondo' minindagu ra makapanala' ilo ra orou matong. Pai' lioo' inupi nilo.

⁹ Pinakai nilo inggalan Kuno paat magabau ramuyun. Kalo sinusub Ku ilo. Aku, Tuhan Ondo' Maayo Kaga' Kuasa' nakaindagu noyo.’

¹⁰ Indagu Tuhan, ‘Paat ra masuku' tulu' ngoopor ngambilor tayar ru Babilonia, lioon Takamin poyo am manugut ra bantu' Kuno koson magibit ramuyun muli'.

¹¹ Aku galama' nakapandai ra inatangan Kutu koson ramuyun. Inatangan no sala' ka koson mantilubat ramuyun, kaa' koson ra kaansayan min am koson manaak ra orou tauli ondo' lalansanin min.

¹² Bagu no gumolok kau Raki'. Matong kau koson makiasi' Raki' am taamon Ku pakiasian min.

¹³ Maguyum kau Raki' am matuum min Aku, sabap ra maguyum kau Raki' ra sotopot ru guang.

¹⁴ Sotopot no, matuum min Aku. Pasagulion Takamin ra tana' min. Timungon Takamin intor ra moonong pagun am intor ra moonong intok nampatutuliaran Kuno ramuyun. Ibiton Takamin muli' ra pagun min galama'. Aku, Tuhan nakaindagu noyo.’

¹⁵ Kamin nanaak Tuhan ramuyun ra nabi-nabi intor ra Babilonia.

¹⁶ Rongogo' noyo atan ondo' rinagu ru Tuhan intor ra raja' ondo' namarinta ra pagun ondo' pinarinta ri Daut ra galing i, am intor ra mamagun ru bandar ti, iono pabukat-pabukat min ondo' kalo inibit ra namatiran nababaya' ramuyun.

¹⁷ Indagu Tuhan Ondo' Maayo Kaga' Kuasa', ‘Mamparatong Aku ra pangayawan, bitilan am maruol tumapik risilo. Pamakuan Kuno risilo koson ra kawa' ru ara ondo' napasa' kaga' saboi kalo maakan.

¹⁸ Ilowon Ku ilo ra pangayawan, bitilan am maruol tumapik saboi ngaangai' bansa' ra titikop ru tana' ti malaa' magilong ra baal nilo. Giu' ra ati-ati pantutuliaron Ku ilo, ulun mangalaa' am magalabo magilong ra atan ondo' nasauk risilo. Asabin ilo, am inggalan nilo alapon ra pagulasan.

¹⁹ Ngaangai' baal raginio masauk risilo sabap ra kalo sinugut nilo tanou Kuno ondo' pinasaboi Ku ra rinayus-rayus risilo pinabala' galing ra nabi-nabi, ulipon-ulipon Kuno. Marara' ilo mangkirongog ra tanou Kuno.

²⁰ Akau ngaangai' ondo' pinatiran Ku ra Babilonia, rongog no ra atan ondo' paraguon ru Aku, Tuhan.’

²¹ Tuhan Ondo' Maayo Kaga' Kuasa', i Aki Kapuuno' ru Israil, nakaindagu intor ri Agab anak ri Kolaya, am intor ri Jidikia anak ri Maasiya, ondo' namakai ra inggalan ru Tuhan koson mampasaboi ra abau ramuyun. Minindagu Tuhan ra pataakon No ilo ra kuasa' ru Raja' Nibukadnijar intor ra Babilonia, ondo' mamatoi risilo ra saang min.

²² Paat ra ulun ondo' inibit intor ra Jirusalim pinoongoi ra Babilonia, masaga' magulas ra sasangulun, mindagu ilo, ‘Gama' ru pamakuan ru Tuhan rirun koson ri Jidikia am i Agab, ondo' sinolob ra naayag poyo ru raja' ru Babilonia.’

²³ Koon raginio noyo pupus nilo sabap ra nambaal ilo ra tula mangaayo giu' ra Israil: nansasawa' ilo, am namakai ra inggalan ru Tuhan koson nagabau. Binaal raginio nansala' ra kasagaan ru Tuhan. Nakapandai Io ra atan ondo' binaal nilo, am Io galama' nasauk ra sasi' ondo' manggal risilo. Tuhan nakaindagu noyo.”

Surat ri Simaya

^24-25 Tuhan Ondo' Maayo Kaga' Kuasa', i Aki Kapuuno' ru Israil nangani' ra tanou raki' posoboyon ri Simaya, ulun ri Nigilam, sabap ra nangator i Simaya ra surat namakai ra inggalan nano galama' posoboyon ra mamagun ru Jirusalim, posoboyon ra Imam Jipanya anak ri Maasiya am posoboyon ra ngaangai' imam ra bokon. Surat ondo' tinulisan ri Simaya posoboyon ri Jipanya koon ragitio,

²⁶ “Nampalantik Tuhan rirun masauk ra imam koson malit ri Joyada, am raino okou no pagawai masawat kaga' giu' ra Baloi ru Tuhan. Okou no pinalansan koson magalung ra moonong ulun mantuyang ondo' mangiou ra io noyo nabi, bangkilon ra rantai basi' ra liog nano.

²⁷ Kua kalo sinawai mu i Jirimia ulun ru Anatot no, ondo' siminauk ra nabi ra gino ngai' ru bansa' takau?

²⁸ Nambala' io ra ulun takau giu' ra Babilonia ra lakat poyo soroi ilo mabuoi ra giu' koson ra ulun rinakop; ilo pana musiti' manambaloi, pamagun ra giu', manangumo am sumia' ra ampos nano.”

²⁹ Surat no binasa' ru Imam Jipanya raki'.

³⁰ Ginio ra nanusub Tuhan raki'

³¹ mangator ra tanou intor ri Simaya ra ngaangai' ulun ru Israil ondo' pinatiran ra Babilonia. Koon ragitio tanou no: “Minindagu i Simaya ramuyun koson ayuk ra io sangulun nabi; sotopot no Aku, Tuhan, kalo nanusub riso. Ginio sabap ra nangkinibit io ramuyun nangintopot ra abau,

³² am nanusub ramuyun manggal Raki', am Aku pana mangukum riso am papag nano. Kolondo' papag nano ondo' mayan ra gino ngai' min. Kalo maayag io koson magilong ra baal-baal moonsoi ondo' baalon Ku ra ulun Kuno. Aku, Tuhan nakaindagu noyo.”