JIRIMIA 27 - Tanou Moonsoi Timugon

Nampakai i Jirimia ra kuk ru sapi'

¹ Kalo nabuoi kalupus Raja' Jidikia anak ungkuyon ru Raja' Josia nasauk ra raja' ru Jiuda, nanusub Tuhan raki',

² mambaal ra kalat intor ra kungkung am mambaal ra kuk intor ra tataun, am paatangon ra impus kutu.

³ Tuhan pana nanusub boo raki' mampasaboi ra tanou ra raja' ru Idom, Moab, Amon, Tirus am Sidon, ondo' pinabala' galing ra ulun-ulun sinusub nilo ondo' minatong ra Jirusalim koson muma' ra Raja' Jidikia.

⁴ Tuhan Ondo' Maayo Kaga' kuasa', i Aki Kapuuno' ru Israil, nanusub raki' mambala' risilo koson pabalain risilo raja' nilo ra ragu ru Tuhan ti,

⁵ “Mabaya' ra kuasa' Kuno ondo' maayo am mabaya' ra kaikangan Kuno, inangun Ku tana' ti, ulun am ngaangai' bibiag ra tana' ti; makapangani' Aku ra ngaangai' no ra osoi ayuk ondo' kasagaan Kuno.

⁶ Aku noyo nampataak ra ngaangai' bansa' ti ralalom ru kuasa' ru ulipon Kuno, i Nibukadnijar, raja' ru Babilonia. Bibiag masigo niayuk pana pinataak Ku riso koson ra kuasaan.

⁷ Ngaangai' bansa' mangandoi ayuk ra Raja' Nibukadnijar, anak ungkuyon nano am akupu nano saboi ra paat ru pagun nano galama' maratu'. Paat raginio bansa' ru Babilonia mangandoi ayuk ra bansa'-bansa' ondo' maikang am raja'-raja' ondo' maayo.

⁸ “Kaa' bansa' kapoam pamarintaan ondo' marara' kumuku' ri Nibukadnijar ukumin Ku ra pangayawan, bitilan am maruol tumapik saboi polosoon Ku i Nibukadnijar mamuso risilo ra lingonon.

⁹ Pai' rongogo' nabi min kapoam osoi pana ondo' manginggalar ramuyun kumuku' ra raja' Babilonia, kabalu' pana mangiou ilo ra makapanala' ra orou tauli, inda' pana ralalom ru inupi, kapoam mampiau ra ambiluo ru ulun minatoi, kapoam kapandayan ra sihir.

¹⁰ Namparuung ilo ramuyun saboi inibit kau ra maalur intor ra pagun min. Pagiruon Takamin, am mapuso kau.

¹¹ Kaa' bansa' ondo' masaga' kumuku' am masaga' mangandoi ayuk ra raja' ru Babilonia polosoon Ku mayan ra pagun galama' nilo koson magitanom ra giu' no. Aku, Tuhan, nakaindagu noyo.”

¹² Pinasaboi ku baal ra nogondo' ra Raja' Jidikia intor ra Jiuda. Indagu aku, “Musiti' kou makirakop ra raja' ru Babilonia. Pangandoi no riso am ra mamagun nano, maa' raginio maayag kou.

¹³ Nakaindagu noyo Tuhan ra bansa' ondo' kalo kumuku' ra raja' ru Babilonia matoi sabap ra pangayawan kapoam bitilan kapoam maruol tumapik. Kua rirun raja' am mamagun masaga' matoi koson raginio?

¹⁴ Pai' rongogo' nabi ondo' manginggalar rirun kumuku' ra raja' ru Babilonia. Mamparuung ilo rirun.

¹⁵ Tuhan galama' minindagu ra kalo nanusub Io risilo, am nagabau ilo rirun raja' ralalom ru inggalan Nano. Ginio ra pagiruon No am mamuso rirun raja' mababaya' ra nabi-nabi ondo' nagabau noyo rirun raja'.”

¹⁶ Aku pana nambala' boo ra imam-imam am ngaangai' mamagun ra minindagu Tuhan, “Pai' rongogo' nabi-nabi ondo' minindagu ra kalo boo mabuoi kuliamos ru Baloi Kuno ibiton saguli' intor ra Babilonia. Nagabau ilo ramuyun.

¹⁷ Pai' rongogo' ilo! Musiti' kau makirakop ra raja' ru Babilonia, maa' raginio maayag kau. Kua ra bandar ti polosoon masauk ra tuntur ru nangalunsai?

¹⁸ Amon ru totopot nabi ilo am nakaapu ra tanou intor Raki', raino polosoon ilo makitaak Raki', Tuhan Ondo' Maayo Kaga' Kuasa', maa' raginio kuliamos ondo' lakat poyo soroi ra Baloi Kuno am giu' ra istana ru raja' ra Jirusalim, kalo auton mongoi ra Babilonia.” (

^19-20 Paat ra Raja' Nibukadnijar namparakop ri Joyakin anak ungkuyon ru Raja' Joyakim, raja' ru Jiuda, am tingganai ru mamagun ru Jiuda am Jirusalim, am inibit ilo ra Babilonia, kalo nangalap Raja' Nibukadnijar ra lugu'-lugu', bisin tambaga', kurita'-kurita', am kukula' kuliamos ra bokon giu' ra Baloi ru Tuhan.)

²¹ “Rongogo' noyo ragu Kutu, Tuhan Ondo' Maayo Kaga' Kuasa', i Aki Kapuuno' ru Israil, intor ra ngaangai' kuliamos ondo' natatang giu' ra Baloi Kuno am giu' ra istana ru raja' ra Jirusalim:

²² Ngaangai' no auton ra Babilonia, am paayanon ra giu' saboi ra lioon Ku poyo. Paat raginio bagu no ibiton Ku ngaangai' no sumaguli' ra intok ragitio. Aku, Tuhan nakaindagu noyo.”