JIRIMIA 25 - Tanou Moonsoi Timugon

Pantula' intor ra ralayo

¹ Paat ra bilor kaapat kalupus i Joyakim anak ungkuyon ru Raja' Josia nasauk ra raja' ru Jiuda, nakaalap aku ra tanou intor ra Tuhan intor ra ngaangai' mamagun ru Jiuda. (Baal ragitio nasauk paat ra bilor kasaa' ru pamarintaan ru Raja' Nibukadnijar giu' ra Babilonia.)

² Indagu Aku ra ngaangai' mamagun ru Jiuda am Jirusalim,

³ “Buoi ruo ngoopor am talu ngambilor, intor ra bilor koopor am talu ru Raja' Josia anak ungkuyon ru Raja' Amon namarinta giu' ra Jiuda saboi ra orou raiti', minindagu Tuhan raki' am kalo igondo' aku pakalilian mampasaboi ra atan ondo' rinagu Nano ramuyun. Kaa' akau kalo igondo' nampalio raginio.

⁴ Rinayus ayuk ru Tuhan nanusub ra nabi-nabi, iono ulipon-ulipon Nano minongoi ramuyun, kaa' marara' kau mangkirongog am mampalio risilo.

⁵ Nanusub ilo ramuyun mangiruan ra baal ru kaayagan ondo' malaat am baal ondo' makatula, maa' raginio mamagun ra pagun ondo' tinaakan ru Tuhan ramuyun am kinamatuaan min koson ra longgom tungkuson.

⁶ Nanginggalar nabi-nabi ramuyun sumamba am mangandoi ayuk ra tuhan-tuhan ra bokon. Nanginggalar ilo niayuk ramuyun sumamba ra sinungkalalaing ondo' binaal min galama', sabap baal raginio mapasingkual ra sangit ru Tuhan. Amon ru gumagaya' kau ra susuban ru Tuhan no, kalo mangukum Io ramuyun.

⁷ Kaa' Tuhan galama' minindagu ra marara' kau rumongog Riso. Pinasingkual min piboo sangit Nano ra sinungkalalaing mino. Akau galama' namparatong ra ukuman Nano ramuyun.

⁸ Ginio sabap ra marara' kau rumongog ra ragu Nano, Tuhan Ondo' Maayo Kaga' Kuasa' minindagu,

⁹ ‘Mampiau Aku ra ngaangai' bansa' intor ra ralayo, am niayuk ulipon Kuno, Raja' Nibukadnijar intor ra Babilonia. Susubon Ku ilo maa' raginio mamulunsar ra Jiuda am mamagun nano am niayuk mamulunsar ra ngaangai' bansa' ra liliut nano. Pusoon Ku mamagun ru Jiuda mababaya' ra bansa'-bansa' giu' ra liliut nano, am mompoloso risilo matutuk ra sabubuoi no. Osoi ayuk ondo' makakito risilo makatigog am malaa'. Aku, Tuhan, nakaindagu noyo.

¹⁰ Langgain Ku lakup maansukan am pangiantakan ru paguguatan nilo. Kolondo' ilo ra umau koson ra pilasut, am gandum nilo makai'.

¹¹ Polosoon Ku titikop ru pagun no matutuk am masauk ra intok makalalaa'. Bansa'-bansa' giu' ra liliut no mangandoi ayuk ra raja' ru Babilonia buoi tulu' ngoopor ngambilor.

¹² Mopongo raginio ukumin Ku ulun Babilonia am raja' nilo sabap ra tula nilo. Pusoon Ku pagun ru Babilonia am mompoloso riso malunsai ra sabubuoi no.

¹³ Ukumin Ku Babilonia ra ngaangai' karaat ondo' inatang Kuno koson palumpaan ra bansa'-bansa' paat ra Aku minindagu ondo' pinabala' galing ri Jirimia, iono ngaangai' karaat ondo' tinulisan ra ralalom ru kitab ti.

¹⁴ Balasin Ku binaal ru ulun Babilonia; uliponon ilo ru raja'-raja' maayo am masuang bansa'.’ ”

Ukuman ri Aki Kapuuno' ra bansa'-bansa'

¹⁵ Tuhan, i Aki Kapuuno' ru Israil minindagu raki', “Gitio noyo sangkir ru wain ondo' sinuangan ra sangit Kuno. Ibito' sangkir ti ra ngaangai' bansa', am susubo' ilo manginum intor ra sangkir ti. Susubon Tokou mongoi risilo.

¹⁶ Paat ra ilo manginum intor ra sangkir ti, kakasiling nilo am kolondo' makara' sabap ra pangayawan ondo' porotongon Kuno risilo.”

¹⁷ Ginio ra inalap ku sangkir no intor ra kalindu' ru Tuhan, am ongoi ra ngaangai' bansa'; nanusub Tuhan raki' mongoi risilo. Aku pana nampainum risilo intor ra sangkir no.

¹⁸ Jirusalim am ngaangai' bandar giu' ra Jiuda, nababaya' ra raja'-raja' am tingganai-tingganai nilo, sinusub manginum intor ra sangkir no saboi ra ilo nasauk ra tana' kaagisan ondo' makalalaa'. Pakuan ra inggalan nilo koson ra ulas, koson ondo' nasauk saboi ra orou raiti'.

^19-26 Gitilo noyo suang ru inggalan ru ulun ra bokon ondo' musiti' manginum intor ra sangkir no: raja' ru Misir, pagawai-pagawai nano am tingganai-tingganai nano; ngaangai' ulun ru Misir am ngaangai' bansa' ra bokon giu' ra Misir; ngaangai' raja' giu' ra tana' Us; ngaangai' raja' ru Palistin giu' ra bandar Askilon, Gaja, Ikron, am ulun ondo' lakat poyo maayag giu' ra Asdod; ngaangai' ulun ru Idom, Moab am Amon; ngaangai' raja' giu' ra Tirus am Sidon; ngaangai' raja' giu' ra tampilon ru nagas Raat Tanga'; bandar Didan, Tima am Bus; ngaangai' ulun ondo' nampakariwa' ra abuk nilo; ngaangai' raja' ru Arab; ngaangai' raja' ru bansa' ondo' minayan giu' ra tana' kaagisan; ngaangai' raja' giu' ra Jimri, Ilam am Madai; ngaangai' raja' giu' ra ralayo, maalur am mamaar, sangulun am sangulun. Ngaangai' bansa' ra titikop ru tana' ti musiti' manginum intor ra sangkir ti. Ulun ra pupus toojo ondo' musiti' manginum intor ra sangkir no iono raja' ru Babilonia.

²⁷ Tuhan pana mindagu boo raki', “Balai' ngaangai' ulun no ra Aku, Tuhan Ondo' Maayo Kaga' Kuasa', i Aki Kapuuno' ru Israil, nanusub risilo manginum suku' magauk am mampalua'. Maratu' ilo am kalo boo makatirong saguli' sabap ra pangayawan ondo' porotongon Kuno risilo.

²⁸ Amon ru marara' ilo mangalap ra sangkir no intor ra kalindu' muno am kalo inumon no, balai' ilo ra Tuhan Ondo' Maayo Kaga' Kuasa' nakaindagu noyo ra musiti' ilo manginum intor ra sangkir no.

²⁹ Talimpuunin Ku mamuso no giu' ra bandar Kuno galama'. Indoson nilo kia ra kalo ukumin ilo? Maaru' ukumin ilo sabap ra porotongon Ku pangayawan ra ngaangai' bansa' ra titikop ru tana' ti. Aku, Tuhan Ondo' Maayo Kaga' Kuasa' nakaindagu noyo.

³⁰ Okou Jirimia, ngaangai' ondo' raguon Kuno rirun, musiti' mu potonowon. Musiti' mu raguin ilo, ‘Mansangal Tuhan intor ra suruga'; maningkalur Io intor ra inayanan Nano ondo' matulai. Gogolon io manggal ra ulun Nano; mompogolok Io koson ra ulun ondo' mamaga' ra kawa' ru anggur. Moonong ulun ra tana' ti mokorongog Riso,

³¹ saboi ra pompor ru tana' ti bolos Nano mamintanou. Pinatalang ru Tuhan baal no ra bansa'-bansa'. Mangakim ilo ra ngaangai' ulun am mamuso ra ulun malaat. Tuhan nakaindagu noyo.’ ”

³² Tuhan Ondo' Maayo Kaga' Kuasa' nakaindagu ra karaat lumampa' ra bansa' am bansa', am bagiu' mapuor kaga' tatanga' sumiab ra mapuor kaga' giu' ra pompor-pompor ru tana'.

³³ Paat orou raginio baangkai ru ulun ondo' pusoon ru Tuhan kumalayatan ra titikop ru tana' ti. Kalo tangiin ilo, kalo kayangon koson ra lobongon, kaa' polosoon ayuk ra tana' koson ra tuntur ru pampalabung ra tana'.

³⁴ Pantangi' no, tingganai kau, akau ondo' nasauk ra magagalung ra ulun Kuno, pantangi' no ra mosongou! Panulaboi no am pagiluluir ra kaau, sabap ra nasaboi noyo paat no ra akau potoyon; simbaluyon kau koson ra domba gawayan.

³⁵ Maaru' kalo makapagiru' kau.

^36-37 Mampalaa kau am mantangi' ra mangiluk sabap ra Tuhan ralalom ru sangit Nano namuso ra bansa' min am niayuk namuso ra pagun min ra mamimio ti.

³⁸ Nangiruan Tuhan ra ulun Nano koson ra singa' nangiruan ra luang batu nano. Kalaatan ru pangayawan am sangit ru Tuhan nangulau ra pagun ti nasauk ra tana' kaagisan.