JIRIMIA 24 - Tanou Moonsoi Timugon

Ruo ngambakul kawa' ru ara

¹ Rondo' paat ra Tuhan nangani' raki' ra rondo' pinaintalang. Baal raginio nasauk nalupus Raja' Joyakin anak ungkuyon ru Raja' Joyakim intor ra Jiuda, nabaya' ra pagawai-pagawai ru pamarintaan ru Jiuda, ulun manukang am mangngandoi ra mapandai toojo, rinakop ru Raja' Nibukadnijar intor ra Babilonia, am inibit koson ra ulun rinakop intor ra Jirusalim minongoi ra Babilonia. Nakito ku ruo ngambakul kawa' ru ara pinabanta' giu' ra saang Baloi ru Tuhan.

² Bakul ondo' kasaa' sinuangan ra kawa' ru ara ondo' moonsoi, koson ra kawa' ru ara ondo' naansak galing, liliwa' bakul ondo' karuo sinuangan ra kawa' ru ara ondo' napasa', saboi kalo maakan.

³ Tuhan pana mindagu boo raki', “Okou Jirimia, atan kia nakito muno?” Taam aku, “Nakakito aku ra kawa' ru ara. Kawa' ondo' moonsoi kaga', am kawa' ondo' napasa' ra napasa' kaga' saboi kalo maakan.”

⁴ Indagu poyo Tuhan,

⁵ “Aku, Tuhan, i Aki Kapuuno' ru Israil nangkara' ra ulun ondo' inaut pinoongoi ra Babilonia no koson ra kawa' ru ara ondo' moonsoi ti, am moonsoi pamakuan Kuno risilo.

⁶ Alungin Ku ilo am magibit risilo sumaguli' ra pagun ti. Baalon Ku ilo, am kalo lunsayon ilo; tolorogon Ku ilo am kalo bubulon ilo.

⁷ Aniin Ku ilo ra kasagaan nilo koson makarati' ra Aku noyo Tuhan. Koon raginio ilo masauk ra ulun Kuno, am masauk Aku ri Aki Kapuuno' nilo, sabap ra sumaguli' ilo Raki' ra sotopot ru guang.

⁸ “Kaa' pamakuan Kuno, Tuhan ra ulun ragitio koson ra kawa' ru ara ondo' napasa', ondo' kalo maakan: Raja' Jidikia intor ra Jiuda, am pagawai-pagawai nano, am niayuk mamagun ru Jirusalim ra bokon, ondo' namagun ra pagun ti kapoam ondo' minanding ra Misir.

⁹ Mamparatong Aku ra karaat risilo saboi ngaangai' bansa' ra titikop ru tana' ti malaa'. Iison ilo, pasaukon ra kukuritin am tauyuon. Ati ayuk pantutuliaron Ku ilo, inggalan nilo alapon ra pagulasan.

¹⁰ Mamparatong Aku ra pangayawan, bitilan, maruol tumapik risilo saboi ra ngaangai' nilo matoi, am kolondo' ulun ondo' matatang ra pagun ondo' tinaakan Ku risilo am kinamatuaan nilo.”