JIRIMIA 22 - Tanou Moonsoi Timugon

Tanou ri Jirimia ra sasambaloi ru raja' ru Jiuda

^1-2 Nanusub Tuhan raki' mongoi ra istana ru raja' ru Jiuda, papag ru Raja' Daut, koson mampasaboi ra tanou ru Tuhan ra raja' am pagawai-pagawai nano, am niayuk mamagun ru Jirusalim. Gitio noyo ragu ru Tuhan risilo,

³ “Baalo' noyo atan ondo' matimpok am mabanis. Palabuso' noyo ulun ondo' rinuung intor ra kuasa' ru ulun ondo' namparuung riso. Pai' ulipono' kapoam kalaat ra ulun bansa' ru bokon, anak nailusan ra matuo kapoam ulun napuor. Pai' pamatoi ra ulun ondo' kolondo' sala ra intok matulai ti.

⁴ Amon ru totopot kau mambaal ra susuban Kuno, papag ri Daut pana masauk ayuk ra raja'. Mababaya' ilo ra pagawai-pagawai am mamagun nilo mansail ra kulobon garabang ru istana ti am tumampak ra kurita' kuda am mangura' ra kuda.

⁵ Kaa' amon ru kalo gumagaya' kau ra susuban Kuno, magibot Aku ra istana ti masauk ra mapuut. Aku, Tuhan nakaindagu noyo.

⁶ Koson Raki', istana raja' ru Jiuda koson ra kinoonsoi ru tana' Giliad am Kagunungan Libanon, kaa' intok no saukon Ku ra tana' kaagisan ondo' kalo ayanin ru ulun.

⁷ Mangator Aku ra ulun koson manutuk raginio. Magibit ilo ra kapak, puuton boo lugu'-lugu' ondo' moonsoi, ondo' binaal intor ra tataun sidar. Mopongo raginio pasuboon nilo boo ra ralalom ru apui.

⁸ Mopongo' raginio masuang ulun bansa' ru bokon mansail ra giu' no am pasakuot ra rondo' am bokon, kua Aku, Tuhan nambaal koson raginio ra bandar ondo' maayo no.

⁹ Tumaam ilo boo ra ngaangai' no nasauk sabap ra akau kalo siminugut ra nabantuan min am Aku, i Aki Kapuuno' min, am siminamba am nangandoi ayuk ra tuhan-tuhan ra bokon.”

Tanou ri Jirimia intor ra Raja' Joagas

¹⁰ Mamagun kau ru Jiuda, pai' tangii' Raja' Josia; pai' panulaboi ra pinatayan ru raja'. Kaa' tangii' noyo i Joagas, anak ungkuyon ru raja'; sabap anak no inibit noyo ra minugar am kalo boo sumaguli'. Kalo boo makakito io ra namagunan nano.

¹¹ Gitio noyo ragu ru Tuhan intor ra Raja' Joagas, anak ungkuyon ru Raja' Josia, ondo' nasauk ra raja' ru Jiuda minalit ra ama' nano, “Minugar io intor ra giti, am kalo boo sumaguli'.

¹² Matoi io giu' ra pagun pamatiran, am kalo boo makakito io ra pagun ti.”

Tanou ri Jirimia intor ra Raja' Joyakim

¹³ Aibui boo ra ulun ondo' nambaal ra baloi nano ra kolondo' katimpakan, am kinaayo no ra kolondo' kabanisan ru guang. Nanusub io ra ulun mangandoi ra kalo gajiin, am kalo nambayar ra gaji' nilo.

¹⁴ Aibui boo ra ulun ondo' mindagu, “Mambaal aku ra istana ondo' mokoondo' ra lamin-lamin mangaayo giu' ra luting no.” Pambaal io boo ra gigimpalan ra baloi nano, am tataun pinangiing intor ra tataun sidar, am tinulisan ra batik malia'.

¹⁵ Okou ti masauk kia ra raja' ondo' moonsoi poyo, amon ru mambaal kou ra istana ra tataun sidar, saboi moonsoi poyo intor ra istana ru ulun bokon? Ama' muno makasia' ra kaayagan moonsoi. Masalok io matimpok am kalo mampili' ra ulun, am nakasugut io ralalom ru ngaangai' pirot nano.

¹⁶ Mangakim io ra baal ru ulun musikin ra matimpok; ngaangai' no mugar ra moonsoi riso. Ginio arati' no makaulig ra Tuhan.

¹⁷ Kaa' okou ondo' maguyum ayuk ra ampos galama'; mamatoi kou ra ulun ondo' kolondo' sala, am mangimbolo' ra mamagun muno ra malaat kaga'. Ginio noyo ragu ru Tuhan.

¹⁸ Ginio ra minindagu Tuhan intor ra Raja' Joyakim anak ungkuyon ru Raja' Josia, intor ra Jiuda, “Kolondo' ulun manulaboi ra pinatayan nano; kolondo' ulun ondo' mindagu, ‘Alii boo ra rangan kuno, alii boo.’ Kolondo' ulun ondo' mantangi' kapoam gumolok, ‘Makalulumpus raja' kuno!’

¹⁹ Ralaaton i Joyakim am patirin paingkualo' ra kulobon garabang ru Jirusalim, koson ra pinamakuan ru ulun ra baangkai ru kaladai.”

Tanou intor ra baal pupus ru Jirusalim

²⁰ Indagu Tuhan, “Mamagun kau ru Jirusalim, ongoi no ra Libanon am golok no. Ongoi no ra tana' Basan am pampalarut no; golok no intor ra kagunungan Moab, sabap ra ngaangai' paguum min kinala noyo.

²¹ Minindagu Aku ramuyun paat ra akau moonsoi kaayagan, kaa' marara' kau rumongog Raki'. Ginio noyo ondo' baalon min buoi ru bayag min; marara' kau gumagaya' Raki'.

²² Ginio ra, tingganai-tingganai mino maliom koson ra siabin ru angin; ilo paguum mino auton koson ra ulun rinakop, am bandar mino asabin am tauyuon sabap ra nambaal kau ra malaat.

²³ Mayan kau ra kaansayan sabap ra liniputan ru lugu'-lugu' sidar ru Libanon, kaa' paat ra akau marualan, maimbolo' kau koson ra ruandu' ondo' maganak.”

Ukuman ri Aki Kapuuno' ra Raja' Joyakin

²⁴ Indagu Tuhan ra Raja' Joyakin anak ungkuyon ru Raja' Joyakim, intor ra Jiuda, “Ralalom ru inggalan Kuno, i Aki Kapuuno' ondo' maayag, mambala' Aku toojo ra kabalu' pana ra koson kou ra sinsing ru tatandu' ra kalindu' pamiris Kutu, kaa' paguson Tokou,

²⁵ am pataakon kou ra ulun kalaanin muno, iono ulun ondo' moogot mamatoi rirun. Pataakon Tokou ra Raja' Nibukadnijar intor ra Babilonia am saujor-saujor nano.

²⁶ Pagiruon Tokou am ina' muno, patirin Takamin boo ra pagun ondo' sala' ka namagunan min. Akau ruo matoi ra giu' no.

²⁷ Moondom kau kaga' ra pagun ti kaa' kalo makasaguli' kau.”

²⁸ Aku, i Jirimia mindagu, “Koson kia Raja' Joyakin ra pagangan napilang ondo' pinatiran am kalo boo kasagain? Ginio kia sabap no ra io am anak-anak nano pinagiru' am pinatiran ra pagun ondo' kalo natutunan nilo?”

²⁹ O ra pagun kuno, namagunan kuno! Rongogo' ragu ru Tuhan,

³⁰ “Ulun no inaru' noyo maa' raginio matatakan ra anak-anak nano am masalok kalo makasugut ralalom ru kaayagan nano. Kolondo' papag nano ondo' mamarinta giu' ra Jiuda koson ra palit ri Daut. Aku, Tuhan nakaindagu noyo.”