JIRIMIA 20 - Tanou Moonsoi Timugon

Nansangor i Jirimia am Imam Pasyur

¹ Imam Pasyur anak ri Imir iono tingganai pagawai ru Baloi ru Tuhan. Paat ra io nokorongog ra mampatanou aku ra ngaangai' baal raginio,

² nanusub io koson aku ti lambaan am rantayon giu' ra Kulobon Garabang Binjamin, garabang tampilon rasawat giu' ra Baloi ru Tuhan.

³ Suabon no, kalupus i Pasyur namugal ra rantai kuti, indagu aku riso, “Inggalan ondo' tinaakan ru Tuhan rirun sala' ka i Pasyur, kaa' ‘Kalaanan Ra Ati Ayuk’.

⁴ Tuhan galama' minindagu, ‘Saukon Tokou ra kalaanin ru inan muno galama' am rangan-rangan muno. Makakito kou risilo ngaangai' potoyon ru pantula' ra ilang. Polosoon Ku ngaangai' ulun ru Jiuda kuasaan ru raja' Babilonia; santayaran risilo auton koson ra ulun rinakop poongoyon ra pagun nano, am ilo ondo' kalo auton no potoyon.

⁵ Polosoon Ku pantula' nilo manalingaau am magaut ra ngaangai' kalangkayaan ru bandar ti am niayuk ngaangai' rapu' longgom nano poongoyon ra Babilonia, am poyo rapu' tungkuson ru raja'-raja' ru Jiuda.

⁶ Okou no, Pasyur, rokopon am auton ra Babilonia mababaya' ra ngaangai' sasambaloi muno. Giu' no patayan muno am lobongon mababaya' ra ngaangai' rangan muno ondo' nangkirongog ra abau muno.’ ”

Nambutok i Jirimia ra Tuhan

⁷ Iou Tuhan, rinuung Mu aku, am naruung aku. Maikang Kou intor raki' am nangala raki'. Iniis aku ru moonong ulun, inasaban intor ra susuab ti saboi ra mamai'.

⁸ Pogonong ra aku mindadagu, musiti' aku gumolok ra mapuor toojo, “Malaat kaga'! Kapusaan!” Iou Tuhan, iniis am inasaban aku ra moonong paat, sabap ra nampasaboi aku ra tanou Muno.

⁹ Kaa' paat ra aku mindagu, “Polosoon aku makalilian ra Tuhan, marara' aku boo mindagu ralalom ru inggalan Nano,” tanou Muno pana koson ra apui ondo' mapaang ralalom ru guang. Kinamin ku oroto', kaa' kalo boo magula' ku.

¹⁰ Mokorongog aku ra ulun mongkonos ra ati ayuk, “Kalaanan gumaai-gaai! Ibok pabalaa' takau riso ondo' makakuasa'!” Niayuk poyo ngaangai' rangan moonsoi kuno maginaa ra karatuan kuno. Konilo, “Maaru' lair ra pamparuungan, makapangala takau riso, maa' raginio itakau makapansuli' riso.”

¹¹ Kaa', Okou, iou Tuhan, manaung raki'; Okou maikang am mapanggol. Ilo ondo' nangimbolo' raki' maratu' am kalo maikang. Tauyuon ilo ra sabubuoi no, sabap ra inatangan nilo kalo nasugut. Pagasaban risilo no masalok karaan.

¹² Kaa', iou Tuhan Ondo' Maayo Kaga' Kuasa', mabaya' ra matimpok mangkinam Kou ra ulun; nakapandai Kou ra suang ru guang am pangkaraan nilo. Ginio ra iowo' noyo aku magilong Rirun mambalos ra kalaatan ru pantula' kuno, sabap ra pataakon ku baal kuno Rirun.

¹³ Rimbayi' noyo Tuhan! Omporo' noyo Tuhan! Palabuson No ulun naimbolo' intor ra kuasa' ru ulun malaat.

¹⁴ Inulas noyo orou naganakan raki'! Liliani' noyo orou paat ra ina' kuno naganak raki'!

¹⁵ Inulas noyo ulun nagibit ra tanou ondo' nangkinibit ra ama' kuno naansukan, paat ra tanou pinasaboi riso, “Nokoowot kou ra sangulun anak ungkuyon!”

¹⁶ Polosoon noyo ulun nagibit ra tanou no koson ra bandar-bandar ondo' tinutuk ru Tuhan ra kalo makaasi'. Polosoon noyo io mokorongog ra golok marualan paat ra susuab ti, am golok mosongou ru pangayawan ra tanga' ru orou,

¹⁷ sabap ra kalo pinatoi no aku paat ra aku lakat poyo tininai', maa' raginio soroi aku ayuk ra tinai' ru ina' kuno am binunakan ri ina' masauk ra lobong kuno.

¹⁸ Kua anako' aku! Koson kia ra maimbolo' ayuk am makaliman ra kapaganan? Bayag kutu makasail kia koson mokoowot ra mauyu' ayuk?