JIRIMIA 19 - Tanou Moonsoi Timugon

Rarapu' ondo' nopoto

¹ Nanusub Tuhan raki' mongoi pambali ra rondo' rarapu', am niayuk mangkimait ra kukula' ngaulun tingganai ru bansa' am kukula' ngaulun imam ondo' matutuo poyo,

² koson mababaya' mongoi ra Limayak Ginom mansail ra Kulobon Garabang Poto ru Rarapu'. Musiti' ku potonowon tanou Nano giu' ra intok raginio.

³ Nanusub Tuhan raki' mindagu koson ragitio, “Raja' kau ru Jiuda am mamagun ru Jirusalim! Rongogo' atan ondo' masaga' Kuno, Tuhan Ondo' Maayo Kaga' Kuasa', i Aki Kapuuno' ru Israil, paraguon ramuyun. Mamparatong Aku ra karaat ondo' makalalaa' ra intok ragitio saboi ulun ondo' mangkirongog no makatigog.

⁴ Baalon Ku gitio sabap ra bansa' ragitio nangiruan noyo Raki'. Nampajamol ilo ra intok ragitio ra nampataak ra taak simbalui ra dewa-dewa ondo' kalo nauligan nilo, kinamatuaan nilo, am raja'-raja' ru Jiuda. Tinotop nilo intok ti ra raraa' ru ulun ondo' kolondo' sala.

⁵ Binaalan nilo i Baal ra altar maa' raginio makapampataak ilo ra anak-anak nilo koson ra taak simbalui ondo' solobon. Kaa' kalo igondo' Aku panusub risilo mambaal raginio, am poyo kalo igondo' baal raginio soroi ra pangkaraan Kuno.

⁶ Ginio sabap ra masaboi paat no intok ragitio kalo boo sabiton ra Topit kapoam Limayak Ginom, kaa' Limayak Pamatayan.

⁷ Intok ragitio sulangon Ku ngaangai' inatangan ru ulun ru Jiuda am mamagun ru Jirusalim. Polosoon Ku ilo kalaan ru pantula' am potoyon ralalom ru pangayawan. Polosoon Ku baangkai nilo akanon ru susuit am bibiag masigo.

⁸ Palumpaan Ku karaat makalalaa' ra bandar ti saboi moonong ulun ondo' mansail ragiti makatigog am malaa'.

⁹ Libungin bandar ti ru pantula' am mirot koson mamatoi ra mamagun no. Pampalibungan raginio malaat toojo saboi ulun giu' ra ralalom no mangakan ra rangan nano, am poyo anak nilo galama'.”

¹⁰ Tuhan pana nanusub boo raki' momoto ra rarapu' no giu' ra saang ru ngaangai' ulun ondo' minaya' raki'.

¹¹ Musiti' aku mambala' risilo ra gitio noyo ragu ru Tuhan Ondo' Maayo Kaga' Kuasa', “Tutukon Ku bansa' am bandar ti saboi masauk koson ra rarapu' ondo' nopoto no am kalo boo mapuna'. Lobongon ru ulun baangkai am poyo giu' ra Topit, sabap ra kolondo' boo intok ra bokon.

¹² Bantuon Ku ra mapasauk ra bandar ti am mamagun no koson ra Topit.

¹³ Ngaangai' baloi giu' ra Jirusalim am ngaangai' baloi ru raja'-raja' ru Jiuda masauk ra majamol koson ra Topit, sabap giu' ra taap ru baloi, nonolob ulun ra kaminyan tayar ru dewa-dewa ru limbowon am nampataak ra wain ra dewa-dewa ra bokon.”

¹⁴ Kopongo raginio nangiruan aku ra Topit, intok ru Tuhan nanusub raki' koson nampasaboi ra tanou Nano. Minongoi aku ra liliut Baloi ru Tuhan am bigor ra giu' no, am nambala' ra ngaangai' ulun,

¹⁵ ra Tuhan Ondo' Maayo Kaga' Kuasa', i Aki Kapuuno' ru Israil, minindagu koson ragitio, “Sabap no ra bambalingatan kau am marara' rumongog ra ragu Kuno, Aku pana mamparatong ra ngaangai' ukuman ondo' inatang Ku noyo ra bandar ti am ra ngaangai' pekan ra libung nano.”