JIRIMIA 18 - Tanou Moonsoi Timugon

Giu' i Jirimia ra baloi ru ulun manukang ra pagangan

¹ Indagu Tuhan raki',

² “Ongoi no ra baloi ru ulun manukang ra pagangan, am mampasaboi Aku ra tanou Kuno rirun ra giu' no.”

³ Ginio ra ongoi aku ra baloi ru ulun manukang ra pagangan am makito ku io tatanga' mangandoi.

⁴ Paat ra pagangan ondo' tatanga' no baalon no kalo kula' matuyu', baalon no sagulio' saboi masauk ra pagangan ra bokon ondo' maya' ra kasagaan nano.

⁵ Kopongo raginio nanusub Tuhan raki' mindagu ra ulun ru Israil,

⁶ “Ulun kau ru Israil, kolondo' kia rokoon min kuasa' Kuno mambaal ramuyun koson ra binaal ru ulun manukang ra pagangan no ra tana' bandulan nano? Koson ra tana' bandulan no ralalom ru kalindu' ru ulun manukang ra pagangan, koon raginio niayuk ramuyun ralalom ru kalindu' Kuno.

⁷ Amon ru paat ra Aku mamatas koson mamubul, mamparatu', kapoam manutuk ra rondo' bansa' kapoam pamarintaan,

⁸ kaa' bansa' no pana tumalikur intor ra malaat, am Aku pana mampalugut ra baalon Kuno.

⁹ Kaa' amon ru namatas Aku koson mampabigor kapoam mangikang ra rondo' bansa' kapoam pamarintaan,

¹⁰ kaa' bansa' no pana kalo gumagaya' Raki' am mambaal ra kalaatan, Aku pana mampalugut ra baalon Kuno.

¹¹ Raino balai' ulun ru Jiuda am mamagun ru Jirusalim ra tatanga' Aku mangatang koson manggal risilo, am mampatampos ra ukuman risilo. Susubo' ilo mompolonggo' ra baal ru bayag ondo' makatula, am niayuk mangulau ra paliso am binaal nilo.

¹² Kaa' tumaam ilo, ‘Atan onong no? Bambalingatan am malaat akai ayuk maya' ra kasagaan mai!’ ”

Nangiruan ulun ru Israil ra Tuhan

¹³ Indagu Tuhan, “Kuati' ra moonong bansa' ru mokoondo' kia baal ragitio nasauk noyo. Ulun ru Israil nambaal noyo ra ondo' makalalaa'!

¹⁴ Ais batu kalo igondo' kairu' intor ra gunung batu giu' ra Libanon. Timug masalui ondo' tumilis intor ra kagunungan kalo igondo' kapua'.

¹⁵ Kaa' nampalilian ulun Kuno Raki'; nonolob ilo ra kaminyan ra sinungkalalaing. Nakasaru ilo giu' ra ralan ondo' musiti' nilo bayaan, kalo boo maya' ilo ra ralan ra galing i; liminisang ilo ra ralan mongoi ra ralan ondo' kalo poyo rinata'.

¹⁶ Sinauk nilo pagun ti ra intok makalalaa', saboi nasauk ra pangiisan ra sabubuoi no. Ngaangai' ulun ondo' mansail ra pagun ti makatigog magilong raginio, malaa' ilo am mamisik ra ulu.

¹⁷ Pantutuliaron Ku ulun Kuno giu' ra saang ru pantula', koson ra angin sirangon mapasiob ra kaau. Talikurin Ku ilo; kalo indanganon Ku ilo paat ra karaat matong.”

Paguguuman manggal ri Jirimia

¹⁸ Kon boo ru ulun, “Ibok no paguguum takau manggal ri Jirimia sabap itakau galama' mokoondo' ra imam ondo' makapangani' ra pangilaan, ulun mapintar makapangani' ra bilin, am nabi ondo' makapampasaboi ra tanou ri Aki Kapuuno' masalok soroi. Ibok no ibito' takau panguwan ri Jirimia, am lumonggo' mangkirongog ra ragu-ragu nano!”

¹⁹ Ginio ra pakiasi' aku, “Iou Tuhan, rongogo' pakiasian kutu; rongogo' atan ondo' raguon ru pantula' kuno intor raki'.

²⁰ Motopot kia ra moonsoi balasin ra malaat? Kaa' nangkali ilo ra luang maa' raginio maratu' aku ra ralalom no. Karaa' noyo ra sinaung ku ilo ra saang Muno, maa' raginio kalo sangitin Mu ilo.

²¹ Kaa' raino, iou Tuhan, polosoo' noyo anak-anak nilo matoi ra bitilan kapoam matoi ralalom ru pangayawan. Polosoon noyo bala ruandu' nilo mailusan ra ralaki am anak; polosoon noyo bala ru ungkuyon matoi sabap ra maruol tumapik am ulun mamulok matoi ralalom ru pangayawan.

²² Polosoon noyo ulun mantakou matong ra baloi nilo ra mamulali', saboi gumolok ilo ra malaa'. Nangkali ilo ra luang maa' raginio maratu' aku ra ralalom no, am nampakaang ilo ra landak koson mamparakop raki'.

²³ Kaa' Okou, iou Tuhan, nakapandai ra ngaangai' ondo' inatang nilo koson mamatoi raki'. Pai' noyo iruo' kasalaan nilo am pai' noyo ampuno' tula nilo. Polosoo' noyo ra ilo maala. Guguang ayuk baalon risilo paat ra Okou sumangit.”