JIRIMIA 17 - Tanou Moonsoi Timugon

Tula am ukuman ra Jiuda

¹ Indagu Tuhan, “Bansa' ru Jiuda kau, tula min tinulisan noyo ra pen basi'; tula mino pinabatik ra guang min ra pen intor ra intan, am pinapaat ra moonong pisuk ru altar mino.

² Bansa' mino sumamba ra sinungkalalaing giu' ra altar-altar am lugu'-lugu' mokoondo' ra sinungkalalaing ondo' pinatirong koson ri Dewi Asyira giu' ra saau ru moonong puun tataun masansam, giu' ra tampak-tampak ru bulur,

³ am giu' ra rasawat ru gunung-gunung giu' ra liwar ru bandar. Susubon Ku pantula' mino magaut ra ngaangai' rapu' am kalangkayaan mino, sabap ra ngaangai' tula ondo' binaal min giu' ra titikop pagun.

⁴ Pataakin min kalalaat tana' ondo' tinaakan Kuno ramuyun, am saukon Takamin ra ulipon ru pantula' giu' ra pagun ondo' kalo noyo toojo natutunan min. Baalon Ku ngaangai' no sabap ra sangit Kutu koson ra apui ondo' bibilak ra sabubuoi no.”

Nansalinut pangilaan

⁵ Indagu Tuhan, “Mangukum Aku ra osoi ayuk ondo' mangiruan Raki', am ondo' malansan ra ulun am niayuk malansan ayuk ra ikang ru ulun ondo' mapandai matoi.

⁶ Koson io ra bulungkut giu' ra tana' kaagisan, ondo' timinuu' giu' ra intok mapua', giu' ra tana' makausi', ondo' kalo tinuwan ru tutuu' ra bokon. Ulun koson raginio kalo igondo' nakaili' ra moonsoi.

⁷ Kaa' ulun ondo' malansan Raki' masalok Ku barakatin.

⁸ Koson io ra puun tataun ondo' tumuu' giu' ra kiing ru sungoi ondo' kalo tumilis; bakat no gumawar saboi ra timug. Bulintok malasu' kalo malaa' io, sabap ra raun-raun nano masalok masansam; kabalu' pana malumpa' pagun ra tampio, kolondo' pagalabaan nano, sabap ra masalok io mangkawa'.

⁹ Guang ru ulun kalo maratian ru osoi pana; guang ru ulun mapintar toojo intor ra ngaangai' no, am maruol nano maingor kaga'.

¹⁰ Aku, Tuhan, mangimumui ra guang; pangkaraan ru ulun kinamin Ku. Pamakuan Ku ra moonong ulun sumugut ra paliso nano, am pamakuan Kuno nontopot ra binaal nano.”

¹¹ Koson ra susuit nangamut ra talu' ondo' sala' ka io tangan, koson raginio noyo ulun ondo' kalo mabanis guang mokoowot ra rapu'. Paat ra umur lakat poyo mamulok matatakan io ra ngaangai' rapu' nano. Paat ra pupus ru bayag nano mainono' ra io ulun ondo' sasambungon kaga'.

¹² Baloi ru Tuhan takau koson ra turungan ondo' matulai, ondo' nakabanta' giu' ra rasawat ru gunung masawat intor poyo ra talimpuun i.

¹³ Iou Tuhan, Okou noyo kalansanan ru Israil; ngaangai' ru ulun ondo' nangiruan Rirun tauyuon. Mapuso ilo intor ra tana' ti, am mongoi ra intok ru ulun minatoi, sabap ra nangiruan ilo ra Tuhan, puun ru timug ondo' mampakaayag.

Nakiindangan i Jirimia ra Tuhan

¹⁴ Iou Tuhan, babaso' aku no, maa' raginio maligag aku. Bayago' aku no, maa' raginio maayag aku. Okou ayuk omporon kuno!

¹⁵ Indagu ulun raki', “Ati kia ngaangai' lolob ru Tuhan ramon? Polosoon Io mambaal ra ngaangai' no raino!”

¹⁶ Kaa' iou Tuhan, kalo igondo' aku nampajajal Rirun koson mamparatong ra karaat risilo. Aku kalo niayuk nompogogot ra kapaganan lumampa' risilo. Nakapandai Kou ra baal raginio, iou Tuhan. Nakapandai Kou ra atan ondo' raguon kuno.

¹⁷ Pai' Kono pampasauk ra ondo' mampakalaa' raki'. Okou noyo intok kuno sumindung paat ra kapaganan matong.

¹⁸ Gama' ru manuyu' Kou ra ulun ondo' mangimbolo' raki', sindungi' aku no, iou Tuhan. Tikopo' ilo ra kalaanan, kaa' pai' aku no ilaano'. Porotongo' karaat risilo saboi ilo matutuk.

Mangiantak ra Orou Sabat

¹⁹ Indagu Tuhan raki', “Okou Jirimia, ongoi no ra Kulobon Garabang ru Mamagun ondo' pansailan ru raja'-raja' ru Jiuda paat ra ilo mingkual mumpos ra bandar, am potonowo' noyo tanou Kutu ra giu' no. Mopongo raginio ongoi no ra ngaangai' kulobon garabang ra bokon giu' ra Jirusalim.

²⁰ Susubo' raja'-raja' am ngaangai' ulun ru Jiuda am niayuk ngaangai' mamagun ru Jirusalim ondo' mansail ra kulobon-kulobon raginio, maa' raginio mokorongog ra ragu Kuno.

²¹ Indagu koson ragitio, ‘Amon ru marara' kou matoi, pai' pangkayang ra maagat paat ra orou Sabat, kapoam magibit raginio mumpos mansail ra kulobon-kulobon garabang ru Jirusalim.

²² Pai' pangandoi am pai' pangkayang ra maagat mingkual intor ra baloi muno paat ra orou Sabat. Iantako' orou raginio koson ra orou patimpokon Raki' koson ondo' nanusuban Kuli ra kinamatuaan min.

²³ Kaa' marara' kinamatuaan min rumongog Raki' kapoam mampalio ra ragu Kuno. Bambalingatan ilo am marara' gumagaya' ra pangilaan intor Raki'.

²⁴ Gagaya' no ra ngaangai' susuban Kuno. Pai' pangkayang ra maagat mansail ra kulobon garabang ru bandar no paat ra orou Sabat. Iantako' orou Sabat koson ra orou ondo' patimpokon Raki', am pai' pangandoi paat ra orou raginio.

²⁵ Amon ru totopot kau manugut ra susuban Kuno, raja'-raja' am pagawai ondo' mamarinta koson ri Daut sumubol ra kulobon-kulobon garabang ru bandar Jirusalim. Mabaya' ilo ra ulun ru Jiuda am mamagun ru Jirusalim, tumampak ra kurita' kuda am mangura' ra kuda, saboi bandar Jirusalim mososok ra ulun ra sabubuoi no.

²⁶ Ulun matong intor ra bandar-bandar Jiuda, am intor ra kampung-kampung giu' ra liliut ru Jirusalim; matong ilo intor ra wilayah Binjamin, intor ra lonson toojo ru bulur, intor ra kagunungan am intor ra tampilon rabugus ru Jiuda. Magibit ilo ra taak simbalui koson mapabansuk ra guang Kuno am taak-taak simbalui ra bokon, taak simbalui koson ra paringkuanangan am kaminyan, am niayuk taak simbalui ra paringkuanangan ra Baloi Kuno.

²⁷ Ngaangai' baal raginio masauk paat ra akau gumagaya' Raki' am mangiantak ra orou Sabat koson ra orou ondo' patimpokon ayuk Raki'. Pai' pangkayang ra maagat mansail ra kulobon-kulobon garabang ru Jirusalim paat ra orou raginio. Amon ru manggal kau ra susuban Kuno, solobon Ku koyoo' kulobon-kulobon garabang ru Jirusalim am niayuk istana-istana nano, am apui no kalo malasa' ru osoi pana.’ ”