JIRIMIA 15 - Tanou Moonsoi Timugon

Ukuman ra ulun ru Jiuda

¹ Tuhan mindagu boo raki', “Kalo makaasi' aku ra bansa' ragitio, kabalu' pana i Musa am i Samuil migor ragiti koson makimasi' Raki' ra bala nilo. Susubo' bansa' ragitio mugar, marara' Aku magilong risilo!

² Amon ru mangkuot ilo rirun ra intok musiti' ilo mongoi, taamo' koson ragitio, ‘Indagu Tuhan, ulun ondo' inaru' matoi sabap ra maruol, polosoon noyo ilo matoi sabap ra maruol! Ulun ondo' inaru' matoi ralalom pangayawan, polosoon noyo ilo matoi ralalom pangayawan! Ulun ondo' inaru' ra matoi sabap ra bitilan, polosoon noyo ilo matoi ra bitilan! Ulun ondo' inaru' masauk ra ulun rinakop, polosoon noyo ilo auton koson ra ulun rinakop!’

³ Aku, Tuhan nakapamatas noyo ra apat baal ondo' makalalaa' lumampa' ramuyun: ilo ondo' matoi ra potoyon ralalom ru pangayawan; baangkai nilo ayaton ru uku'; susuit mangakan ra baangkai nilo, am bibiag masigo manaliir ra suwo no.

⁴ Mangkinibit Aku ra ngaangai' bansa' ra tana' ti malaa' magilong risilo sabap ra binaal ri Manasi anak ri Gijkia giu' ra Jirusalim, paat ri Manasi nasauk ra raja' ru Jiuda.”

⁵ Indagu Tuhan, “Mamagun kau ru Jirusalim, osoi kia makaasi' ramuyun? Osoi kia masaga' mangiluk guang mabaya' ramuyun? Osoi kia masaga' mapit koson mangkuot ra baal mino?

⁶ Nangimpai kau Raki', talikurin min Aku. Ginio ra, paakangon Ku longon koson manutuk ramuyun, sabap ra nasuraan Aku no mongorot ra sangit Kuno.

⁷ Giu' ra moonong bandar ra pagun ti, akau patirin Ku koson ra rami. Kabalu' pana akau ulun Kuno, akau am anak-anak mino pusoon Ku, sabap ra marara' kau mangulau ra baal ru kaayagan min.

⁸ Pagun min mososok ru ulun napuor, masuang poyo intor ra agis giu' ra nagas. Potoyon Ku ulun mamulok saboi ina' nilo maimbolo'. Pulali' Ku porotongon i mamumuso saboi ra ilo malaa' am magalabo.

⁹ Ina' ondo' napusaan ra tulu' ngaulun anak nano ikab-ikab am malausan, koson riso mato ru orou nokotolop noyo buoi ru matawang; inasaban io am tinauyu'. Manusub Aku ra pantula' min mamatoi ra ulun ondo' lakat poyo naayag ra gino ngai' min. Aku, Tuhan nakaindagu noyo.”

Nambutok i Jirimia ra Tuhan

¹⁰ Aibui boo raki' ti! Kua kia anako' aku ri ina' kuli? Makimansangor aku kalalaat am makimagansang kalalaat ra moonong ulun ra pagun ti. Kabalu' pana kalo igondo' aku nampaira' kapoam nagira' ra ruit, kaa' ulason aku ru ngaangai' ulun.

¹¹ Iou Tuhan, amon ru kalo baalon ku kandoi kutu ra matanda', am kalo manaung ra pantula' giu' ra saang Muno paat ra ilo nalumpa' ru karaat am kapaganan, polosoon noyo ulas nilono totopot masauk. (

¹² Kolondo' sangulun pana makapamandak ra basi', mulu' poyo basi' intor ra ralayo ondo' linatakan ra gangsa'.)

¹³ Indagu Tuhan raki', “Mangator Aku ra pantula' koson magaut ra kalangkayaan am kuliamos ru ulun Kuno koson ra ukuman ra tula ondo' binaal nilo giu' ra titikop pagun.

¹⁴ Saukon Ku ilo ra ulipon ru pantula' giu' ra pagun ru bansa' ra bokon ondo' kalo nauligan nilo, sabap ra sangit Kuno koson ra apui ondo' bibilak ra sabubuoi no.”

¹⁵ Indagu aku boo raiti, “Iou Tuhan, makarati' Kou ra ngaangai' no. Karaa' aku am indangano' aku. Balasi' ilo ondo' nangimbolo' raki'. Pai' noyo pokoorot risilo saboi makasugut ilo mamatoi raki'. Karaa' noyo ra aku inasaban sabap Okou.

¹⁶ Minindagu Kou raki', am norongog ku moonong ragu Muno. Aku longgom Muno, iou Tuhan i Aki Kapuuno' Ondo' Maayo Kaga' Kuasa'; ginio ra ragu Muno nangani' ra kaansukan am kaansayan raki'.

¹⁷ Kalo maya' aku ra ulun ondo' mantitimung ra magaganja' ayuk. Ginio sabap ra gumagaya' Aku rirun, siminuai aku am natikop ra sangit.

¹⁸ Kua marayus aku ayuk maimbolo'? Kua ra pilat kutu malandom am kalo mapali'-pali'? Kuayan Muno mapasinduol kia raki' koson ra sungoi ondo' lumasak bulintok malasu'?”

¹⁹ Taam boo Tuhan, “Amon ru sumaguli' kou, apuon Tokou. Masauk kou poyo ra ulipon Kuno. Amon ru mampatanou kou ra tanou ondo' mokoonong am sala' ka ondo' kolondo' ampos, masauk kou saguli' ra nabi Kuno. Ulun matong poyo rirun, am okou kalo pana mongoi risilo.

²⁰ Saukon Tokou koson ra timbok gangsa' risilo. Manggal ilo rirun, kaa' kalo makapangala rirun. Mabaya' Aku rirun koson manindung am mamayag rirun.

²¹ Palabuson Tokou intor ra kuasa' ru ulun malaat kaga'. Aku, Tuhan nakaindagu noyo.”