JIRIMIA 13 - Tanou Moonsoi Timugon

Tapi' mariwa' intor ra konoon linon

¹ Nanusub Tuhan raki' mongoi pambali ra tapi' mariwa' intor ra konoon linon am tapion, kaa' nanginggalar Io raki' mompososop ra ralalom ru timug.

² Ginio ra, minongoi aku pambali ra tapi' mariwa' no, am patapio'.

³ Tuhan pana mindagu poyo raki',

⁴ “Ongoi no ra Sungoi Iprat am bunio' tapi' mariwa' no giu' ra lolot ru bulur batu.”

⁵ Aku pana minongoi pambuni ra tapi' mariwa' no mamaar ra Sungoi Iprat.

⁶ Kukula' buoi raiti nanusub Tuhan raki' mongoi poyo ra Sungoi Iprat koson mangalap ra tapi' mariwa' no.

⁷ Aku pana minongoi, am ingkualo' tapi' mariwa' no intor ra intok nambunian kuli. Nakito ra tapi' no naapu' noyo am kolondo' boo toojo onong.

⁸ Tuhan pana mindagu poyo raki',

⁹ “Koon raginio noyo ralan Kuno mamuso ra mamagun ru Jiuda am Jirusalim. Umokon Ku limbau nilono.

¹⁰ Bansa' ondo' malaat ti marara' gumagaya' Raki'. Lakat ilo poyo bambalingatan am malaat koson ragili. Sumambayang ilo am mangandoi ayuk ra tuhan-tuhan ra bokon. Ginio noyo sabap ra ilo masauk koson ra tapi' mariwa' ondo' kolondo' onong no.

¹¹ Koson ra tapi' mariwa' naigot ra awak ru nantapi' no, koon raginio noyo kuayan Kuno ra ulun ru Israil am Jiuda maa' raginio maigot Raki'. Koon raginio boo ra ilo masauk ra ulun Kuno am mamparatong ra ompor am urumat ra inggalan Kuno. Kaa' marara' ilo gumagaya' Raki'.”

Rarapu' ru wain

¹² Indagu Tuhan raki', “Okou Jirimia, pambala' ra ulun ru Israil ra moonong rarapu' ru wain musiti' totopon ra wain. Tumaam ilo, ‘Kalo kia makapandai akai ra moonong rarapu' ru wain musiti' totopon ra wain?’

¹³ Mopongo raginio balai' ilo ra Aku, Tuhan mompototop ra ulun ra pagun ti ra wain saboi ilo magauk: raja'-raja' papag ri Daut, imam-imam, nabi-nabi am ngaangai' mamagun ru Jirusalim.

¹⁴ Mopongo raginio pagingkuon Ku ilo ra rondo' am bokon, koson ra rarapu' pagingkuon. Koon raginio pamakuan Kuno ra ulun matutuo am mamulok ra kolondo' ampun. Pusoon Ku ilo ra kolondo' togom kapoam makaasi'.”

Nampakara' i Jirimia intor ra malilimbau

¹⁵ Ulun kau ru Israil, Tuhan nakaindagu noyo! Paingganaa' guang muno am rongogo' ragu Nano.

¹⁶ Urumato' noyo Tuhan, i Aki Kapuuno' muno ra Io kalo poyo mamparatong ra kalandaman, am kalayam muno makasaru ra kagunungan; ra kalo poyo sinda ondo' lansanin min kulawon masauk ra molondom kaga'.

¹⁷ Amon ru marara' kau rumongog Riso, mantangi' aku ra moopot sabap ra kalimbawan min. Mantangi' aku ra mangiluk, lomou kuno tumulisan sabap ra ulun ru Tuhan rinakop ru pantula'.

¹⁸ Indagu Tuhan raki', “Susubo' raja' am ina' nano tumuun intor ra panturungan nilo, sabap ra karaun nilo ra moonsoi naratu' noyo intor ra ulu.

¹⁹ Bandar-bandar ru Jiuda giu' ra tampilon rabugus tatanga' inawangan, am kolondo' ulun makatangkus ra pagawangan no. Ngaangai' mamagun ru Jiuda pinatiran ra pagun.”

²⁰ Alii ra Jirusalim, ilai' ga! Pantula' muno tatanga' matong intor ra ralayo! Ati kia ulun ondo' musiti' min sindungin, ulun ondo' kalimbawan min kaga' no?

²¹ Atan kia raguon min paat ra ulun ondo' karaan min koson ra rangan, nampaala am niayuk nanguasa' ramuyun? Maaru' makaliman kau ra maruol koson ra ruandu' maganak.

²² Maaru' mangkuot kau kua ra ngaangai' no liminumpa' ramuyun; kua ra bayang min rinilak am kua sinawa' kau. Pakapandai no ra ngaangai' no nasauk sabap ra tula min maayo kaga'.

²³ Makakulau kia ulun maitom ra batik ru kungkung nano, kapoam ampunguon makairu' ra gumutitikan nano? Maaru' kalo! Koson niayuk ramuyun ondo' maindalom mambaal ra malaat, kalo lair mambaal ra moonsoi.

²⁴ Pantutuliaron kau ru Tuhan koson ra rami ondo' siabin ru angin intor ra tana' kaagisan.

²⁵ Nakaindagu Io noyo ra ginio noyo pupus min. Ginio noyo ondo' inaru' Nano koson baalon ramuyun sabap ra nakalilian kau noyo Riso am mangintopot ra tuhan-tuhan ondo' kalo motopot.

²⁶ Tuhan galama' mangalus ra bayang mino saboi magibaang kau am tauyuon.

²⁷ Nakakito Io ramuyun nambaal ra baal-baal ondo' kasisangin Nano. Nakakito Io ramuyun nangilou ra dewa-dewa giu' ra bulur am giu' ra padang, koson ra sangulun ungkuyon malaai ra andu' ru ulun bokon kapoam koson ra sanginan kuda gawayan makimampaa' ra kuda ruandu'. Mamagun kau ru Jirusalim, malumpa' kau ru karaat! Sanggilan kia akau maaya' sumambayang poyo Raki'?