JIRIMIA 12 - Tanou Moonsoi Timugon

Nambutok i Jirimia ra Tuhan

¹ “Iou Tuhan, amon ru pabalaan ku baal kutu Rirun, maaru' matutunan toojo ra Okou noyo ondo' motopot. Kaa' musiti' aku mangkuot Rirun intor ra katimpakan. Kua kia ra ulun malaat langkaya'? Kua kia ra ulun ondo' kalo mabanis guang makabanang?

² Tinanom Mu ilo koson ra tutuu', ilo pana nanambakat, timinuu' am nangkawa'. Masalok ilo mindagu ra moonsoi intor Rirun, kaa' ralalom ru guang, sotopot no kalo mampalio ilo Rirun.

³ Kaa' iou Tuhan, nakaulig Kou raki'; nakito Mu binaal kuno am nakapandai ra suang ru guang kuno Rirun. Ralaato' ulun malaat no mingkual koson ra domba mongoi ra intok pamatayan. Alungi' ilo saboi ra paat ilo simbaluyon.

⁴ Kula' poyo buoi no ru pagun mai ti mapua', am sakot molonot giu' ra padang? Susuit am bibiag matoi sabap ra kalaatan ru bansa' mai, ondo' mindagu, ‘Kalo makito ri Aki Kapuuno' binaal takati.’ ”

⁵ Indagu Tuhan, “Okou Jirimia, amon ru naagui kono nakimagilou ra ulun, atan piboo kulaan kou makimagilou ra kuda? Amon ru kalo mokosoloro' kou ra intok mamimio, atan piboo kulaan kou mokosoloro' giu' ra kataunan, giu' ra kiing ru Sungoi Jordan?

⁶ Tinumbalik kou boo napumpung pabukat-pabukat muno galama'; babaya' ilo mamulunsar rirun. Pai' no pangintopot risilo, kabalu' pana ragu nilono maamis.”

Mangiluk Tuhan sabap ra ulun Nano

⁷ Indagu Tuhan, “Iniruanan Ku Israil; inimpayan Ku bansa' pinili' Kuno. Pinataak Ku ulun ondo' tinagaman Kuno ra ralalom ru kalindu' ru pantula' nilo.

⁸ Ulun pinili' Kuno minanggal Raki'; koson ra singa' giu' ra gimbaan koon raginio noyo ra ilo sumingangal Raki'. Ginio sabap ra masisang Aku risilo.

⁹ Ulun pinili' Kuno koson ra sanginan susuit ondo' sinumbit ru sanginan kanui intor ra ngaangai' intok. Piawo' bibiag masigo koson maya' manaliir risilo.

¹⁰ Masuang panguasa' ra bansa' bokon nampapaluyak ra umo ru anggur Kuno; pinanjak-panjak nilo umo Kuno. Kinulau nilo pagun Kutu ondo' moonsoi nasauk ra tana' kaagisan.

¹¹ Sinauk nilo ginio ra tana' ondo' kolondo' tutuu'; nokoloso ra saang Kuno. Titikop pagun nasauk ra tana' kaagisan, am kolondo' osoi pana mampalio raginio.

¹² Giu' ra titikop ra tana' marata' ra masawat giu' ra tana' kaagisan, ulun matong koson mantakou. Mamparatong Aku ra pangayawan koson mangumok ra titikop pagun; kolondo' osoi pana ondo' maayag ra kaansayan.

¹³ Ulun Kuno mantanom ra gandum, kaa' mangkumos ra alab. Mingkotog ilo mangandoi kaa' kolondo' maalap ra ampos. Sabap ra siminangit Aku toojo, kinumos nilo kalo mauli'.”

Bantu' ru Tuhan ra pagun paginggaar ru Israil

¹⁴ Indagu Tuhan, “Gitio noyo tanou Kuno intor ra pagun-pagun paginggaar ru Israil ondo' nampajajou ra pagun ondo' pinataak Ku ra ulun Kuno Israil. Koson ra tatanom ondo' binubul intor ra tana', koon raginio noyo ra ngaangai' ulun malaat no bubulon Ku intor ra pagun-pagun nilo. Palabuson Ku Jiuda intor ra kuasa' nilo.

¹⁵ Kaa' malupus ra Aku mamatir risilo, makaasi' Aku poyo risilo; moonong bansa' ibiton Ku sumaguli' ra pagun nilo galama'.

¹⁶ Amon ru totopot guang nilo masaga' mangapu ra ugama ru ulun Kuno am magibot ra mindagu, ‘Ralalom inggalan ru Tuhan ondo' maayag,’ – koson mangila' ilo ra ulun Kuno magibot ralalom inggalan ru Baal ragili – ilo no pana makasimpung ra ulun Kuno am masauk ra moonsoi.

¹⁷ Kaa' bansa' ondo' marara' gumagaya' Raki', bubulon Ku koson ra tatanom am pusoon Ku. Aku, Tuhan, nakaindagu noyo.”