JIRIMIA 11 - Tanou Moonsoi Timugon

I Jirimia am Nabantuan ru Tuhan

¹ Indagu Tuhan raki',

² “Ilai' noyo ragu-ragu ru nabantuan ondo' binaal Kuno ra ulun Kuno. Balai' mamagun ru Jiuda am Jirusalim ra

³ Aku, Tuhan i Aki Kapuuno' ru Israil, nagulas ra moonong ulun ondo' kalo giminagaya' ra ragu-ragu ru nabantuan no.

⁴ Nambaal Aku ra nabantuan no ra kinamatuaan nilai paat ra Aku naningganai risilo miningkual intor ra Misir, pagun ondo' koson ra naraka risilo. Nanusub Aku risilo gumagaya' Raki' am nambaal ra ngaangai' ondo' nanusuban Kuli. Nambala' Aku risilo ra amon ru gumagaya' ilo Raki', masauk ilo ra ulun Kuno am masauk Aku ri Aki Kapuuno' nilo.

⁵ Amon ru baalon nilo ngaangai' no, suguton Ku bantu' Kuno ra kinamatuaan nilai ra pagun ondo' malabung am langkaya', ondo' raino inayanan nilo, pataakin Ku risilo.” Taam Aku, “Iou noyo Tuhan.”

⁶ Tuhan pana mindagu boo raki', “Ongoi no ra bandar-bandar giu' ra Jiuda am giu' ra ralan-ralan ru Jirusalim. Potonowo' noyo tanou Kutu ra ulun ra giu' no am susubo' ilo rumongog am gumagaya' ra ragu-ragu ru nabantuan no.

⁷ Paat ra Aku naningganai risilo miningkual intor ra Misir, totopot Aku mampakara' risilo maa' raginio gumagaya' Raki'. Saboi orou raiti' pana lakat Aku poyo mampakara' ra ulun Kuno intor ra baal raginio,

⁸ kaa' marara' ilo mangkirongog am marara' gumagaya'. Gino ayuk ilo bambalingatan am malaat koson ragili. Nanusub Aku no risilo gumagaya' ra nabantuan, kaa' marara' ilo. Ginio ra pinalumpa' Ku risilo ngaangai' ukuman ondo' sinabit ralalom ru nabantuan no.”

⁹ Tuhan pana mindagu boo raki', “Mamagun ru Jiuda am Jirusalim naguguum koson manggal Raki'.

¹⁰ Nambaal ilo ra tula ondo' binaal ru kinamatuaan nilai ondo' marara' gumagaya' Raki'; sinamba nilo tuhan-tuhan ra bokon. Israil am poyo Jiuda minanggal ra nabantuan ondo' binaal Kuno ra kinamatuaan nilai.

¹¹ Ginio ra, Aku, Tuhan, nampakara' risilo ra porotongon Ku karaat risilo am kalo makapagiru' ilo intor raginio. Amon ru gumolok ilo makiindangan Raki', marara' Aku mangkirongog risilo.

¹² Kopongo raginio mamagun ru Jiuda am Jirusalim mongoi pakiindangan ra tuhan-tuhan ra bokon ondo' sambaan nilo ra mampataak ra taak simbalui. Kaa' tuhan raginio kalo makaandar mamayag risilo paat ra karaat no matong.

¹³ Tuhan-tuhan ru mamagun Jiuda masuang kaga', koson ra kinasuang ru bandar nilo. Mamagun ru Jirusalim nambaal ra altar koson mampataak ra taak simbalui ra Dewa Baal ondo' makatataman no; altar ondo' binaal nilo koson ra kinasuang ru ralan giu' ra Jirusalim.

¹⁴ Okou Jirimia, pai' pakiasi' koson risilo kapoam makiindangan Raki' koson risilo! Paat ra ilo ralalom ru kapaganan am makiindangan Raki', marara' Aku mangkirongog risilo.”

¹⁵ Indagu Tuhan, “Ulun Kuno ondo' tagamin Kuno nambaal ra baal mangalaat. Kalo maaya' ilo soroi giu' ra Baloi ru Tuhan. Indoson nilo ra mambaal ra bantu'-bantu', am mampataak ra bibiag, makapangiliu ilo ra karaat. Inda' nua' ru binaal raginio makaansuk ilo?

¹⁶ Nakaili' Aku nanginggalan risilo ra puun jaitun ondo' maawas raun, nototop ra kawa' ondo' moonsoi. Kaa' raino, ra bolos gogolon, solobon Ku raun-raun nano am pandakon Ku ngaangai' raan no.

¹⁷ “Aku, Tuhan Ondo' Maayo Kaga' Kuasa' nanirong ra Israil am Jiuda. Kaa' raino, mompololob Aku koson mamparatong ra karaat risilo. Ilo galama' nangkinibit ra ngaangai' no liminumpa' risilo, sabap ra nambaal ilo ra kalaatan. Napasingkual ilo ra sangit Kuno ra nampataak ra taak simbalui ra Baal.”

Paguguuman koson mamatoi ri Jirimia

¹⁸ Nambala' Tuhan raki' intor ra paguguuman ru pantula'-pantula' kuno raki'.

¹⁹ Koson aku ra domba ra kalo manantam ondo' inibit mongoi ra intok pamatayan. Kalo nakapandai aku ra aku noyo nasauk ra sonsolon ru paguguuman nilo. Konilo, “Ibok no ongoyo' takau tagaro' puun tataun no ra malabung ayuk poyo; ibok no potoyo' takau io maa' raginio inggalan nano malilianan ru ulun.”

²⁰ Aku pana pakiasi' boo, “Iou Tuhan Ondo' Maayo Kaga' Kuasa', Okou akim ondo' matimpok; Okou mangkinam ra pangkaraan am guang ru ulun. Pataakon ku baal kuno ra ralalom ru kalindu' Muno; ginio ra polosoon noyo aku makakito ra pambalos Muno ra binaal ru ngaangai' ulun no.”

²¹ Mamagun ru Anatot mompogogot ra aku matoi. Konilo, “Amon ru rayuson mu mampatanou ra tanou ru Tuhan, potoyon mai okou.”

²² Ginio ra, indagu Tuhan Ondo' Maayo Kaga' Kuasa', “Ukumin Ku ilo! Tuu' bagu nilo matoi ralalom ru pangayawan am anak-anak nilo matoi ra bitil.

²³ Inaru' Ku noyo paat no koson mamparatong ra karaat ra mamagun ru Anatot; paat no masaboi, kolondo' sangulun pana maayag.”