JIRIMIA 1 - Tanou Moonsoi Timugon

I Jirimia

¹ Kitab ti mokoondo' ra ragu-ragu ri Jirimia anak ri Ilkia, sangulun ra imam intor ra bandar Anatot giu' ra wilayah Binjamin.

² Mindagu Tuhan ri Jirimia ra bilor koopor am talu ra pamarintaan ru Raja' Josia anak ungkuyon ru Raja' Amon giu' ra Jiuda.

³ Kopongo raginio mindagu poyo Tuhan ri Jirimia paat ra pamarintaan ru Raja' Joyakim anak ungkuyon ru Raja' Josia. Kopongo raginio, indagu Tuhan ri Jirimia ra ingkukula' saboi bilor koopor am rondo' ra pamarintaan ru Raja' Jidikia anak ungkuyon ru Raja' Josia. Paat ra sila' kalimo bilor raginio niayuk mamagun ru Jirusalim pinatiran ra pagun.

I Jirimia piniau ru Tuhan

⁴ Indagu Tuhan raki',

⁵ “Ra Aku kalo poyo nampasauk rirun ra okou tinayon ru ina' muno, am ra kalo poyo inanak, pinili' am linantik Ku noyo okou masauk ra nabi tayar ra bansa'-bansa'.”

⁶ Taam aku, “Iou Tuhan Raja', kalo matanda' ra aku mindagu sabap ra aku ti lakat poyo mamulok.”

⁷ Kaa' taam Tuhan, “Pai' no indagu ra okou no lakat poyo mamulok. Ongoi no ra ulun ondo' paangayin Kuno rirun, am balai' ilo ra ngaangai' ondo' panusuban Kuno rirun.

⁸ Pai' no kalaa' risilo sabap ra mabaya' Aku rirun koson manindung rirun. Aku, Tuhan, nakaindagu noyo!”

⁹ Kopongo raginio patutuyo' ru Tuhan kalindu' Nano, am paguuto' ra kabang kuni am indagu, “Rongog no, mangani' Aku rirun ra ragu Kutu ondo' musiti' raguon mu.

¹⁰ Paat ra orou raiti' mangani' Aku rirun ra kuasa' ra bansa' am pamarintaan koson mampagaba' am mamparatu', koson mamuso am mampaluir, koson manirong am mopotolorog.”

Ruo pinaintalang intor ra Tuhan

¹¹ Pangkuot Tuhan raki', “Okou Jirimia, atan kia nakito muno?” Taam aku, “Rondo' raan ru badam.”

¹² Indagu Tuhan, “Motopot. Tatanga' Aku manutun maa' raginio ngaangai' ondo' raguon Kuno masauk toojo.”

¹³ Pangkuot poyo Tuhan raki', “Atan poyo nakito muno?” Taam aku, “Giu' ra tampilon ralayo, nakito ku rondo' pagangan ondo' suang no rumiri', am pagangan no mamaar matingkaung ra tampilon ragiti.”

¹⁴ Indagu Tuhan raki', “Karaat lumuab intor ra ralayo am lumumpa' ra ngaangai' mamagun ru pagun ti,

¹⁵ sabap ra mampiau Aku ra ngaangai' bansa' giu' ra tampilon ralayo matong. Raja'-raja' nilo manirong ra panturungan ru raja' giu' ra kulobon-kulobon garabang ru Jirusalim am giu' ra liliut ru timbok no, am niayuk giu' ra liliut ru bandar-bandar ra bokon giu' ra Jiuda.

¹⁶ Mangukum Aku ra ulun Kuno sabap ra tula nilo; mangiruan ilo Raki' am mampataak ra taak simbalui ra tuhan-tuhan ra bokon. Nambaal ilo niayuk am siminamba ra sinungkalalaing no.

¹⁷ Okou Jirimia, tampos no! Ugar no am balai' ilo intor ra ngaangai' ondo' nanusuban Kuno rirun. Pai' no kalaa' risilo maa' raginio kalo mangkinibit Aku rirun malaa' poyo paat ra okou muma' risilo ra maagu no.

^18-19 Okou Jirimia, rongog no! Anggalon kou ru ngaangai' mamagun ru pagun ti, ioginio raja'-raja' ru Jiuda, pagawai-pagawai ru pamarintaan, imam-imam am mamagun. Kaa' paat ra orou raiti' mangani' Aku rirun ra kaikangan koson manggal risilo. Masauk kou koson ra bandar mokoondo' ra kubu, koson ra lugu' basi', am koson ra timbok tambaga'. Kalo makapangala ilo rirun, sabap mabaya' Aku rirun koson manindung rirun. Aku Tuhan, nakaindagu noyo.”