JIPANYA 1 - Tanou Moonsoi Timugon

¹ Gitio noyo tanou ru Tuhan posoboyon ri Jipanya paat ra Raja' Josia anak ungkuyon ru Raja' Amon namarinta ra Jiuda. (Ama' ri Jipanya iono i Kusyi, aki nano i Gidalia, aki ra pulumpungan i Amarya am aki ra kasaa' toojo Raja' Gijkia.)

Orou pangakiman ru Tuhan

² Indagu Tuhan, “Pusoon Ku ngaangai' giu' ra tana' no:

³ ngaangai' ulun am bibiag, makaaya' susuit am papait. Kalaan Ku ulun malaat. Pusoon Ku ngaangai' ulun; kolondo' sangulun pana polosoon Ku maayag. Aku, Tuhan nakaindagu noyo.

⁴ “Ukumin Ku mamagun ru Jirusalim am mamagun ru titikop Jiuda. Saliiron Ku ondo' natatang ra sumamba ra Baal intor ra intok-intok raginio. Imam-imam ondo' mangandoi ayuk ra Baal lilianin ra malingon.

⁵ Pusoon Ku osoi ayuk ondo' magaloi ra taap koson sumamba ra mato ru orou, sila' am butitin-butitin. Pusoon Ku niayuk ulun ondo' sumamba Raki' am magibot ra gumagaya' Raki', kaa' niayuk magibot ralalom inggalan ru Dewa Milkom.

⁶ Pusoon Ku ulun ondo' nangiruan noyo Raki' am kalo boo maya' Raki'; ilo ondo' kalo matong Raki' am kalo makitulu' intor Raki'.”

⁷ Orou ru Tuhan mamaar noyo. Paat ra orou raginio mangakim Io ra ulun; ginio ra pongkoror no giu' ra saang Nano. Tatanga' Tuhan tumampos koson manimbalui ra ulun Nano koson ra bibiag simbaluyon koson ra taak simbalui, am mangkimait Io ra pantula' koson mantakou ra Jiuda.

⁸ Indagu Tuhan, “Paat ra orou panimbaluyan no, ukumin Ku tingganai-tingganai, anak-anak ungkuyon ru raja', am ngaangai' ulun ondo' minaya' ra kaulayan ru bansa' ra bokon.

⁹ Ukumin Ku ngaangai' ulun ondo' siminambayang koson ra ulun ondo' kalo nakaulig Raki', am ondo' nantakou am niayuk namatoi koson nompososok ra baloi ru tingganai pangandayan nilo ra kuliamos-kuliamos tinakou.”

¹⁰ Indagu Tuhan, “Paat ra orou raginio, mokorongog kau ra tangi' giu' ra Garabang Papait giu' ra Jirusalim. Bolos manulaboi morongog intor ra kampung bagu giu' ra bandar no am bolos lumaput ra mosongou mamintanou intor ra bulur-bulur.

¹¹ Panulaboi kano am pantangi' kano paat min morongog ngaangai' no, akau mamagun ru bandar giu' ra tampilon ragana', sabap ra ngaangai' ulun mantalan minatoi noyo.

¹² “Paat raginio alapon Ku lampung am uliaton bandar Jirusalim. Ukumin Ku mamagun nano ondo' najala' am mangintopot ra inan galama', am ondo' mindagu, ‘Tuhan kalo igondo' nambaal koson ragitio am raginio.’

¹³ Rapu' nilo gaawon am baloi nilo pusoon. Manambaloi ilo, kaa' kalo makaayan raginio. Mangandoi ilo ra umo ru anggur kaa' kalo manginum ra wain, ampos ru umo no.”

¹⁴ Orou pangakiman ru Tuhan mamaar noyo, sotopot no, orou raginio mamaar noyo kaga' am matong ra mataki'. Orou raginio natikop ra kangilukan, saboi saujor-saujor ondo' maikang kaga' pana lalaur sabap ra malumpus guang.

¹⁵ Orou raginio orou sangitan, orou kapaganan am pagalabaan, orou karatuan am kapusaan, orou kalandaman am maitom, orou ondo' majuut am masait.

¹⁶ Monsongorou no morongog bolos ru bujung am golok ru pangayawan intor ra saujor-saujor ondo' mamulunsar ra bandar-bandar mokoondo' ra kubu am manara-manara masawat.

¹⁷ Indagu Tuhan, “Porotongon Ku masuang karaat ra ulun, saboi moonong ulun matukangkam koson ra ulun bolou. Makatula ilo noyo Raki', am raino raraa' nilo nalayak koson ra timug, am baangkai nilo mootong ra tana'.”

¹⁸ Paat ra orou raginio, manulu' Tuhan ra sangit Nano, am ngaangai' mas am pirok kalo makapamayag risilo. Titikop ru tana' ti mapuso ru apui ru sangit Nano. Ra mamulali', butuson No painawo ru ngaangai' ulun ondo' minayan ra tana' ti.