JAKUBUS 5 - Tanou Moonsoi Timugon

Papakaraan ra ulun langkaya'

¹ Am raino, ulun langkaya' kau ngai', rongogo' min gitio! Pantangi' am pangiluk kano sabap ra mokoondo' kapaganan maagat matuum min.

² Kalangkayaan mino mapuso am bayang min ra moonsoi pana obobon ru lipos.

³ Mas am pirok mino monontogol, am togol ti boo koson ra sasi' ondo' manguu' ramuyun. Kumokot io ra inan mino koson ra apui, sabap ra nanimung kau ayuk ra kalangkayaan ru tana' ti, kabalu' pana mamaar noyo pamupusan.

⁴ Kalo nampagaji' kau ra ulun ondo' nanantab ra bilor mino. Rongogo' noyo tangi' ru nangkausan nilai ti! Bobolos ru nanantab no naining noyo ri Aki Kapuuno' Ondo' Maayo Kaga' Kuasa'.

⁵ Kaayagan min ra tana' ti liminangkaya' am nabubunsag kau ayuk, am lumomok kau ayuk maginaa ra orou panimbaluyan, ioginio Orou Pangukuman.

⁶ Nangukum am namatoi kau ra ulun ondo' kolondo' sala, am kalo manggal ilo ramuyun.

Guang mataan am pakiasian

⁷ Sabap raginio, pabukat kau ngai', kataan kano saboi Tuhan no matong saguli'. Karaa' min noyo sangulun nanangumo; ati koson guang mataan nano ra io maginaa ra ampos ondo' lansanin nati toojo. Mabaya' ra guang mataan maginaa io ayuk ra rasam.

⁸ Moonsoi ru akau pana mataan am pai' kano kalawo guang, sabap ra orou ratangan saguli' ru Tuhan mamaar noyo.

⁹ Pai' kano pagasab ra rondo' am bokon, maa' raginio akau pana kalo ukumin ri Aki Kapuuno'. Karaa'! Akim no mamaar noyo, makatampos Io no.

¹⁰ Pabukat kau ngai', karaa' min noyo nabi-nabi ondo' nampasaboi ra bala' ru Tuhan ra galing i. Mataan guang am noorot nilo paat ra nakatuum ra kaimbalaan. Ilo ti noyo alapon min ra tiluan moonsoi.

¹¹ Ilo no piawon takau ra ulun makaansuk sabap ra kinataan ru guang nilai i. Norongog min noyo ati kulaan guang pantataan ri Ayup, am nakapandai kano pupus ru inatang ru Tuhan koson riso. Sabap ra Tuhan no maluoi makaasi' am maayo toojo guang.

¹² Kasaa' toojo, pabukat kau ngai', ioginio: Paat ra makimabantu', pai' kau pagibot koson manabit ra suruga', tana' ti kia, kapoam atan ayuk pana. “Iou” kamin ayuk, amon ru mabaal min, kapoam “Kalo” amon ru kalo mabaal min; maa' raginio kalo maukuman kau ri Aki Kapuuno'.

¹³ Amon ru mokoondo' intor ramuyun makakapaganan, moonsoi ru makiasi' io. Am osoi ayuk maansukan, moonsoi marimbai io mongompor ri Aki Kapuuno'.

¹⁴ Amon ru mokoondo' intor ramuyun marualan, moonsoi ru mampiau io ra tingganai pasimpungan ulun Kristian no. Matong am makiasi' ilo koson io babason am pipilin io poyo ra umau ralalom inggalan ru Tuhan.

¹⁵ Am pakiasian ondo' mabaya' ra pangintapatan, maalap kapali' maruol ru ulun no; babason ulun no ru Tuhan, am amon ru makatula lair, ampunon io.

¹⁶ Sabap raginio, pabalaa' noyo ra rondo' am bokon tula ra binaal min am pakiasi' noyo ra Tuhan ra rondo' am bokon, maa' raginio maalap kau kababas. Pakiasian ru sangulun motopot, maayo kaga' kuasa' nano.

¹⁷ Koson ra nabi Ilia ra galing i, ulun io ayuk toojo mogondo' ritakau. Kaa' nakiasi' io toojo koson kalo parasamon, am totopot rasam no kalo noyo riminatu' buoi talu ngambilor naintanga'.

¹⁸ Am ra io nakiasi' poyo koson parasamon, am mokoondo' boo limbowon namparatu' ra rasam am tana' ti pana nampasalula' ra ampos ru tinanom.

¹⁹ Pabukat kau ngai', amon ru mokoondo' sangulun intor ramuyun no kalo boo maya' ra pangilaan ri Aki Kapuuno', am ulun bokon boo magibit riso sumaguli',

²⁰ karaa' min gitio: Osoi ayuk magibit ra ulun makatula tumalikur intor ra kaayagan nakalayau, makapamayag io ra ulun makatula no intor ra kapatayan am masuang tula pana ampunon.