JAKUBUS 4 - Tanou Moonsoi Timugon

Kasagaan ru tana' ti

¹ Atan kia puun ru pantataaman am pansangaran min? Sala' ka kia ginio intor ra kasagaan ru guang malaat min ondo' masalok mantipagon ramuyun.

² Mansalinut gogoton min, kaa' ra io kalo moowot min, makimampatoi kau boo. Maayo toojo guang min sumolon ra atan ayuk, kaa' ra io kalo masuku' min kaalap, ginio boo puun ra akau makimantaam am makimansangor ti. Kalo noyo makaalap kau ra atan ayuk pana, sabap ra kalo makiasi' kau ri Aki Kapuuno'.

³ Am ra makiasi' kau pana, kolondo' niayuk moowot min, sabap ra malaat kinitaak mino. Katasuan ru guang ayuk ondo' karaan ralalom pakiasian min.

⁴ Akau no ulun kalo malansanan. Nakapandai kano ra maguyum ra kasagaan ru tana' ti mogondo' ayuk ra makimantula' ri Aki Kapuuno'. Ginio ra osoi ayuk maguyum ra kasagaan ru tana' ti, io masauk ra pantula' ri Aki Kapuuno'.

⁵ Kaa' indos min kia ra raragu ayuk ondo' tinulisan ra Buuk Kitab ra, “Pinorondon noyo ri Aki Kapuuno' Ambiluo Nano ra guang takau sigagama', am maayo toojo kasagaan Nati ra Io ayuk tagamin takau.”

⁶ Am mulu' poyo boo kataawan Nano ritakau. Ginio ra tinulisan ra Buuk Kitab ra, “Ampangin ri Aki Kapuuno' ulun ondo' minsawat guang, kaa' mataau Io ra ulun ondo' minggana' guang.”

⁷ Ginio ra gagaya' kano ri Aki Kapuuno'. Anggalo' min noyo Tingganai ru riwato no, am magiru' io boo intor ramuyun.

⁸ Inggaari' noyo i Aki Kapuuno', am i Aki Kapuuno' pana minggaar ramuyun. Ulun kau ra makatula, langgai' min noyo baal ra malaat. Ulun kau ra maginduo guang, kapasawo' noyo guang mino!

⁹ Panasal, pantangi' am panulaboi kau ra baal malaat min i. Polosoo' noyo kinuritan min masauk ra tinangian am kaansukan min masauk ra kasilukan.

¹⁰ Paingganaa' noyo guang mino ra saang ru Tuhan, am painsawaton kau boo ru Tuhan.

Pai' kano pampalaat ra ulun bokon

¹¹ Pabukat kau ngai', pai' kano pagasab ra rondo' am bokon. Osoi ayuk magasab kapoam mangukum ra pabukat nano ra Kristian, sotopot no magasab kapoam mangukum io ra Ukum ri Aki Kapuuno'. Am amon ru Ukum ti salaan no poyo, arati' no kalo boo suguton no io, kaa' Ukum salaan no boo.

¹² Kaa' sotopot no rondo' ayuk ondo' nambaal ra Ukum am poyo makapangukum ra ulun, Io no i Aki Kapuuno'. Am Io ti ayuk ondo' makapamayag am mamatoi ra ulun. Ginio ra, osoi kia akau ti, suku' ra makakau' kau magasab ra pabukat min ra Kristian?

Pai' kano limbau

¹³ Am raino ti, rongogo' noyo gitio, akau ondo' mindagu ra, “Orou raiti' kapoam susuab, manding akai po ra rondo' bandar am mayan ra giu' no buoi sambilor. Giu' no mantatalan akai koson maguyum ra ruit masuang toojo.”

¹⁴ Inatang min ginio, kabalu' pana kalo mapandayan min atan ondo' masauk ralalom ru kaayagan min susuab pana! Koson kau ayuk ra lisun ondo' makito ayuk ra sangkinolor, am kalio boo.

¹⁵ Sotopot no moonsoi ru mindagu kau kon ragino, “Amon ru Tuhan mangiou, maayag akai am baalon mai gitio kapoam ginio.”

¹⁶ Kaa' raino minsawat boo guang min am lumimbau kau ayuk. Ngaangai' ragu lumimbau ti kalo noyo moonsoi.

¹⁷ Intor raginio, ulun ondo' nakapandai ra ati rondo' moonsoi baalon no, kaa' kalo niayuk suguton no baalo', ginio karaan ra makatula io.