JAKARIA 9 - Tanou Moonsoi Timugon

Ukuman ra bansa'-bansa' giu' ra paginggaar ru Israil

¹ Gitio noyo tanou ru Tuhan. Nangukum Io ra pagun Gadrak am bandar Damsyik. Sala' ka ayuk bansa'-bansa' ru Israil, kaa' pusor bandar ru pagun Siria niayuk longgom ru Tuhan.

² Gamat ondo' nambalit ra pagun Siria pana longgom ru Tuhan, koson niayuk ra bandar Tirus am Sidon am ra ngaangai' kapintaran ru mamagun nano.

³ Nambaal noyo Tirus ra kubu-kubu nano am nanimung ra masuang kaga' mas am pirok, saboi nasauk ra kuliamos ru kaindalaman koson ra agis giu' ra ralan.

⁴ Kaa' Tuhan nangalap ra ngaangai' ondo' soroi riso. Patirin No ngaangai' kalangkayaan no ra ralalom ru raat, am bandar no koyoon solobon.

⁵ Bandar Askilon makakito ra baal raginio am malaa'. Bandar Gaja makakito ra baal raginio am malumpa' ru kaimbalaan ondo' maagat. Ikron niayuk makakito ra baal raginio, am kalansanan nano matutuk. Matatakan Gaja ra raja' nano, am Askilon masauk ra masiluk kolondo' ulun minayan.

⁶ Bansa' ra nararatok mayan giu' ra Asdod. Indagu Tuhan, “Manguasa' Aku ra ngaangai' ulun ru Palistin ondo' malilimbau no.

⁷ Lumonggo' ilo mangakan ra kual ondo' lakat poyo makararaa' am atan ayuk akanon ondo' kalo maakan. Ngaangai' ulun ondo' naayag masauk ra ulun Kuno am masauk ra rondo' intor ra bansa' ru Jiuda. Ikron masauk ra ulun Kuno koson ra ulun ru Jibusi paat ra galing i.

⁸ Alungin Ku tana' Kuno am kalo mangiou ra pantula' mansail. Kalo boo polosoon Ku ulun malaat mangimbolo' ra ulun Kuno. Nakito Ku noyo kaimbalaan ru ulun Kuno.”

Raja' ra matong no

⁹ Pakaansuk kano, akau mamagun ru Sion! Pagitapap kano, akau mamagun ru Jirusalim! Ilai', raja' min matong! Matong io ra katulayan am kamanangan, kaa' ra minggana' guang, matong io nangura' ra kaladai, am nangura' ra anak kaladai ondo' mamulok.

¹⁰ Indagu Tuhan, “Patirin Ku kurita' kuda intor ra Israil, am niayuk kuda giu' ra Jirusalim; busur ondo' pinakai ralalom pangayawan pusoon. Raja' min makimobonsoi ra gino ngai' ru bansa'; pamarintaan nano malangka' intor ra raat saboi ra raat, intor ra Sungoi Iprat saboi ra pompor ru tana' ti.”

Panapulian ra ulun ri Aki Kapuuno'

¹¹ Indagu Tuhan, “Sabap ra nabantuan Kuno am akau, nabantuan ondo' sinaapan ra raraa' ru taak simbalui, palabuson Ku bansa' min ondo' naimbolo' ralalom pamatiran koson ra ulun ondo' naaput ralalom ru tulubong mapua'.

¹² Uli' kano, akau ulun pinatiran, raino makakalansanan kau; uli' kano ra intok sindungan min. Balain Takamin raino, ra barakaton Takamin induo ruli' no ra ngaangai' kaimbalaan ondo' nauma' min.

¹³ Pakayon Ku Jiuda koson ra busur ru ulun tutumula', am Israil koson ra anak panah. Pakayon Ku mamagun ru Sion koson ra ilang, koson mangayou ra ulun ru Junani.”

¹⁴ Mintalang Tuhan ra ulun Nano; palabuson no anak panah koson ra ganit. Tuhan Raja' manamput ra tarumpit koson ra tatandu' mapaugar ra pamulunsaran, jumalai Io intor ra rabugus giu' ra tatanga' ru bagiu'.

¹⁵ Tuhan Ondo' Maayo Kaga' Kuasa' manindung ra ulun Nano, pusoon nilo pantula'. Mampaluwau ilo koson ra ulun magauk mampaluwau, liliwa' mampasasar ra raraa' ru pantula'; raraa' ru pantula' tumilis koson ra raraa' ru taak simbalui, ondo' pinasasar giu' ra rasawat ru altar intor ra rondo' mangkuk.

¹⁶ Paat orou raginio ra tauli no, bayagon ru Tuhan ulun Nano, koson ra magagalung mamayag ra bibiag tinambiag intor ra makalalaa'. Suminda ilo giu' ra pagun ru Tuhan koson ra intan ra karaun.

¹⁷ Mapara' bonsoi no am kinaantak ru pagun no ra tauli no! Ungkuyon mamulok am ralaa lumanja' maikang; gandum am wain mangikang risilo.