JAKARIA 5 - Tanou Moonsoi Timugon

Pinaintalang intor ra naskhah rinulun ondo' nansiab

¹ Inurio ku poyo, am raino ti nakito ku rondo' naskhah rinulun nansiab giu' ra limbowon.

² Nangkuot malaikat no ra atan ondo' nakito kuno. Taam aku, “Nakito ku rondo' naskhah rinulun nansiab giu' ra limbowon. Gawar nano siam ngamito am pila' nano apat ngamito am naintanga'.”

³ Kopongo raginio indagu io raki', “Giu' ra naskhah rinulun no mokoondo' tinulisan pagulasan ra titikop ru pagun ti. Giu' ra rondo' tayar ru naskhah rinulun no mokoondo' tinulisan ra moonong mantatakou patirin intor ra pagun ti, am giu' ra tayar ru sapapa' ru naskhah rinulun no mokoondo' tinulisan ra moonong ulun ondo' nagibot ra kalo motopot patirin niayuk.

⁴ Minindagu Tuhan Ondo' Maayo Kaga' Kuasa' ra porotongon No pagulasan no ra moonong baloi ru moonong mantatakou am baloi ru moonong ulun ondo' nagibot ra kalo motopot. Pagulasan no mayan ra baloi nilo saboi ngaangai' no masauk ra tunturan ru napuut.”

Pinaintalang intor ra ruandu' ralalom ru bakul

⁵ Minatong poyo malaikat no am indagu, “Ilai'! Mokoondo' poyo ondo' minatong!”

⁶ Nangkuot aku, “Atan kia ginio?” Taam io, “Rondo' bakul. Bakul no tatandu' ru tula ru titikop pagun ti.”

⁷ Bakul no mokoondo' ra tataub ondo' binaal intor ra tima maitom. Liliwa' raginio inurio ku, tataub no nakakat am mokoondo' sangulun ruandu' nanturung giu' ra ralalom no.

⁸ Indagu malaikat no, “Ruandu' ti tatandu' ru kalaatan.” Kopongo raginio jinuulan no ruandu' raginio ra ralalom ru bakul am tinauban bakul no.

⁹ Nagilong aku ra rasawat am nakito ruo ngaulun ruandu' nansiab mongoi raki'. Mokoondo' ilo ra kawo ondo' maikang koson ra kawo ru susuit kanawai. Inalap nilo bakul ni am inibit nansiab.

¹⁰ Nangkuot aku ra malaikat no, “Ati kia pagibitan nilo ra bakul no?”

¹¹ Taam io, “Inibit nilo io ra Babilonia, am nambaal riso ra kuil ra giu' no. Paat mopongo kuil no, paayanon bakul no ra giu' no koson sambaan.”