JAKARIA 13 - Tanou Moonsoi Timugon

¹ Mindagu Tuhan Ondo' Maayo Kaga' Kuasa', “Paat raginio ra tauli no, rondo' taur ru timug sumalula' koson mamasau ra papag ri Daut am mamagun ru Jirusalim intor ra tula am sumamba ra sinungkalalaing ondo' binaal nilo.

² Paat raginio luluon ku inggalan ru sinungkalalaing ra pagun ti; kolondo' osoi pana boo makakara' raginio. Luuson Ku osoi ayuk migiangku ra io nabi, am mangiru' ra gogoton koson sumamba ra sinungkalalaing.

³ Kopongo raginio osoi ayuk ondo' lakat poyo masaga' mindagu ra manala', matuo nano galama' mambala' riso ra musiti' io ukumin ra matoi, sabap ra mangiou nampasaboi ra tanou ru Tuhan, kaa' sotopot no nagabau io. Paat ra io mindagu ra manala', matuo nano galama' monobok riso saboi matoi.

⁴ Paat raginio, kolondo' boo nabi ondo' lumimbau sabap ra pinaintalang-pinaintalang nano, kapoam mangku ra sangulun nabi, kapoam nambayang ra sukub makabulu maa' raginio makapamparuung io ra ulun.

⁵ Kaa' mindagu io, ‘Sala' ka nabi aku. Aku ti magitanom – magitanom buoi ru bayag kuno.’

⁶ Amon mangkuot ulun riso, ‘Pilat ru atan giu' ra kubab muno?’ Tumaam io, ‘Pilat ti noowot ku paat giu' ra baloi ru rangan kuno.’ ”

Susuban koson mamatoi ra magagalung ondo' sinusub ri Aki Kapuuno'

⁷ Mindagu Tuhan Ondo' Maayo Kaga' Kuasa', “Tirong no, okou ilang, am bulunsaro' magagalung ondo' mangandoi Raki'! Potoyo' io maa' raginio domba sampanon nano mantutuliar. Bulunsaron Ku ulun Kuno,

⁸ am giu' ra titikop ru pagun ti ruo ra sampitalu intor ra mamagun nano matoi.

⁹ Sampitalu ayuk intor ra mamagun nano maayag. Kapasawon Ku ilo koson ra pirok tinuyu' toojo ru apui. Kinamin Ku ilo koson ra ulun mangkinam ra mas. Ilo pana makiasi' boo Raki', am iowon Ku pakiasian nilo. Balain Ku ilo ra ilo ulun Kuno, am ilo pana mangiou ra Aku Tuhan, i Aki Kapuuno' nilo.”