JAKARIA 12 - Tanou Moonsoi Timugon

Bayagon Jirusalim

¹ Gitio noyo tanou intor ra Tuhan intor ra Israil. Tuhan ondo' namingkal ra limbowon, nambaal ra tana' ti, am nangani' ra kaayagan ra ulun mindagu,

² “Pasaukon Ku Jirusalim koson ra sasangkir wain. Bansa'-bansa' giu' ra liliut manginum riso am kakasiling koson ra ulun magauk. Paat ra ilo mangala ra Jirusalim, bandar-bandar giu' ra titikop ru Jiuda pana kalaan.

³ Paat ra tauli no, pasaukon Ku Jirusalim koson ra batu ondo' maagat. Ati-ati bansa' ondo' kuminam mangkayang riso mapilatan. Ngaangai' bansa' ra tana' ti magamung koson mamulunsar ra Jirusalim.

⁴ Paat raginio ilaanon Ku ngaangai' kuda, am ulun-ulun nangura' ra kuda masauk ra mantuyang. Alungin Ku mamagun ru Jiuda, kaa' bolowon Ku mato ru kuda ru pantula' nilo.

⁵ Bagu no bansa'-bansa' ru Jiuda mindagu ralalom ru guang, ‘Tuhan, i Aki Kapuuno' Ondo' Maayo Kaga' Kuasa' nangikang noyo ra ulun Nano ondo' minayan giu' ra Jirusalim.’

⁶ “Paat raginio pasaukon Ku bansa'-bansa' ru Jiuda koson ra apui giu' ra tatanga' ru kataunan kapoam giu' ra tatanga' ru umo ru gandum ondo' naansak; pusoon nilo ngaangai' bansa' ra libung nilo. Mamagun ru Jirusalim maayag giu' ra ralalom ru bandar.

⁷ “Aku, Tuhan mangani' ra kamanangan ra saujor ru Jiuda galing, maa' raginio katulayan ondo' apuon ru papag ri Daut am mamagun ru Jirusalim kalo makasail ra katulayan ondo' apuon ru mamagun Jiuda ra bokon.

⁸ Paat raginio sindungin Ku ilo ondo' minayan giu' ra Jirusalim, am niayuk ulun ondo' malawo kaga' pana masauk ra maikang koson ri Daut. Tingganayon ilo ru papag ri Daut koson tingganayon ru malaikat ru Tuhan am koson tingganayon ri Aki Kapuuno' galama'.

⁹ Paat raginio pusoon Ku ngaangai' bansa' ondo' kuminam mamulunsar ra Jirusalim.

¹⁰ Mangani' Aku ra papag ri Daut am mamagun ru Jirusalim ra guang ondo' masaga' makaasi' am masaga' makiasi'. Magilong ilo ra ulun ondo' tinobok nilo, am manulaboi riso koson ra ulun ondo' manulaboi ra pinatayan ru anak langkuir. Manulaboi ilo ra malumpus guang, koson ra ulun ondo' natatakan ra anak ungkuyon katuaan.

¹¹ Paat raginio mokoondo' manulaboi giu' ra Jirusalim koson ra manulaboi ri Gadad-Rimon giu' ra Limayak Migido.

^12-14 Moonong sasambaloi giu' ra pagun no manulaboi sigagama': sasambaloi ru papag ri Daut, i Natan, i Liwi, i Simii am ngaangai' sasambaloi ra bokon. Moonong sasambaloi manulaboi sigagama'. Ungkuyon-ungkuyon intor ra moonong sasambaloi manulaboi sumuai intor ra ruandu'-ruandu'.”