JAKARIA 11 - Tanou Moonsoi Timugon

Naratuan ru ulun manguasa' ondo' malaat

¹ Okou Libanon, ukabi' noyo kulobon-kulobon muno, maa' raginio apui mokosolob ra puun ru sidar muno.

² Okou puun ru sipris, pantangi' no am panulaboi no, sabap ra puun ru sidar naratu' noyo; puun-puun tataun ondo' maayo napuso noyo. Akau puun-puun ru oak giu' ra Basan, pantangi' no am panulaboi no, sabap ra kataunan makapal tinagar noyo.

³ Ulun-ulun manguasa' manulaboi, sabap ra katulayan nilo liminiot noyo. Rongogo' sangal ru singa'; sabap ra intok ayanan ru singa' giu' ra kataunan giu' ra gawar ru Sungoi Jordan napuso noyo.

Ruo ngaulun magagalung

⁴ Tuhan, i Aki Kapuuno' kuno mindagu raki', “Baalo' noyo koson sangulun magagalung kou ondo' magalung ra domba ondo' simbaluyon.

⁵ Ulun-ulun tatangan ra domba nanimbalui ra sampanon ru domba no kaa' kalo ukumin ilo; nantalan ilo ra kual ru domba no am indagu, ‘Koompor noyo Tuhan! Langkaya' akai!’ Magagalung-magagalung no kalo makaasi' ra domba tinambiag nilo.”

⁶ Indagu Tuhan, “Kalo makaasi' Aku ra osoi pana ra tana' ti. Aku galama' mampataak ra ngaangai' ulun ra ralalom kalindu' ru ulun manguasa' risilo. Ulun-ulun manguasa' no mamuso ra tana' ti, am kalo bayagon Ku io intor ra kuasa' nilo.”

⁷ Ulun mantalan ra domba nampagaji' raki', am aku pana nasauk ra magagalung ru domba sampanon ondo' simbaluyon. Alapon ku ruo jujuga': ondo' rondo' inggalanin ku “Kataawan” am ondo' rondo poyo “Pasimpungan”. Tumalimpuun aku boo magalung ra domba-domba no.

⁸ Nakai' noyo orot kuno ra talu ngaulun magagalung ra bokon ondo' masisang raki'. Ginio ra pagiruon ku ilo ralalom buoi sansila'.

⁹ Kopongo raginio indagu aku ra domba sampanon no, “Marara' aku boo magalung ramuyun. Ondo' matoi, polosoon matoi. Ondo' mapuso, polosoon mapuso. Ondo' lakat poyo maayag mampatoi ra rondo' am bokon.”

¹⁰ Kopongo raginio nangalap aku ra tataun ondo' ininggalanan “Kataawan” am pinandak, koson tatandu' ra nabantuan ondo' binaal ru Tuhan am ngaangai' bansa' inukat.

¹¹ Koson raginio noyo nabantuan no inukat paat ra orou raginio. Ulun-ulun mantalan ra domba nagilong raki', am nakapandai ilo ra Tuhan tatanga' mindagu ralalom ru binaal kuno.

¹² Indagu aku risilo, “Amon ru masaga' kau, bayari' gaji' kuno. Amon ru kalo, kalo pana.” Bayarin nilo gaji' kuno suang no talu ngoopor ngampila' ruit pirok.

¹³ Indagu Tuhan raki', “Pasubolo' ruit no ra ralalom pambulian ra ruit ra Baloi ru Tuhan. Ginio ra nangalap aku talu ngoopor ngampila' ruit ru pirok no. Ginio ayuk nakilagaan nilo raki'. Aku pana nampasubol ra ruit no ra ralalom pambulian ra ruit ra Baloi ru Tuhan.

¹⁴ Kopongo raginio namandak aku ra tataun karuo, ondo' ininggalanan “Pasimpungan”, am naukat noyo pabukatan ru Jiuda am Israil.

¹⁵ Kopongo raginio indagu Tuhan raki', “Igondo' poyo baalo' koson ra sangulun magagalung ru domba; raino ti koson ra magagalung ondo' kolondo' onong.

¹⁶ Pinangandoi ku sangulun magagalung koson magalung ra domba Kuno, kaa' kalo nampalio io domba ondo' natatak. Kalo naguyum io ra domba ondo' nakalayau, kapoam namabas ra ondo' napilat, kapoam nangani' ra akanon ra domba ondo' lakat poyo naayag. Kaa' inakan no kual ru domba ondo' molomok kaga', am namagus ra salindu ru domba.

¹⁷ Kaulas noyo magagalung ondo' kolondo' onong no! Nangiruan io ra domba sampanon nano. Pangayawan mamupus ra kuasa' nano. Kalindu' nano lumawo am mato pamiris nano moolou.”