IPISUS 3 - Tanou Moonsoi Timugon

Kandoi ri Paulus ra ulun sala' ka Jaudi

¹ Ginio nai boo puun ra aku, i Paulus, inaput, sabap ra aku sangulun mangangandoi ri Jisus Kristus koson ra kaatangan ramuyun ondo' sala' ka ulun ru Jaudi.

² Maaru' nakapandai kano ra maya' ra kataawan ri Aki Kapuuno' aku inanian ra kandoi ti koson ra kaatangan min.

³ Ioginio ati kulaan i Aki Kapuuno' nampaintalang raki' ra inatang No ra kalo igondo' pinabala' i, koson tinulisan ku noyo gini kariwaa'.

⁴ Am amon ru basaan min tinulisan kuni, makarati' kau ra ati kulaan kaintutunan kuno ra sauk ondo' kalo igondo' pinabala', ioginio ondo' binaal ri Kristus.

⁵ Gili gitio kalo igondo' pinabala' ra ulun, kaa' raino pinaintalang noyo ri Aki Kapuuno' mansail ra Ambiluo Nano ra rasul-rasul am nabi-nabi ondo' matulai.

⁶ Gitio io ti: Sabap ra Tanou Moonsoi no, ulun sala' ka Jaudi pana mokoowot ra barakat ri Aki Kapuuno' mabaya' ra ulun ru Jaudi. Ilo karuo ti masauk koson ra rondo' inan, koson ulun sala' ka Jaudi pana mokoowot ondo' binantu' ri Aki Kapuuno' mansail ra pasimpungan nilo ri Jisus Kristus.

⁷ Aku sinauk ra sangulun mampasaboi ra Tanou Moonsoi no sabap ra kataawan ri Aki Kapuuno' raki' mansail ra ikang ru kuasa' Nano.

⁸ Sotopot no, kabalu' pana ra aku ti nakatauli intor ra ngaangai' ulun ri Aki Kapuuno', kaa' inanian aku niayuk ri Aki Kapuuno' ra kandoi mampasaboi ra ulun sala ka Jaudi ra Tanou Moonsoi intor ra kalangkayaan ri Kristus ondo' kalo noyo mauntob.

⁹ Mampakito aku ra ngaangai' ulun ra inatang ri Aki Kapuuno' ondo' kalo igondo' pinabala' ti. Nga Io ondo' nampasauk ra ngaangai' limbowon am tana' ti, kalo nambala' Io ra inatang Nano intor ragili.

¹⁰ Maa' raginio koson ra raino ti, mansail ra pasimpungan ulun Kristian, mampakito i Aki Kapuuno' ra kapintaran Nano ra mangunguasa' am kaikangan ru limbowon ti.

¹¹ Am gitio binaal ri Aki Kapuuno' sumugut ra atan ondo' inatang No kalalair i ralalom ri Jisus Kristus, Tuhan takau.

¹² Sabap ra pasimpungan am pangintapatan takau ri Kristus makakau' takau minggaar ri Aki Kapuuno' am intopoton noyo ra itakau rongogon No.

¹³ Ginio ra pai' kano kaimamang kabalu' pana ra aku imboloon koson ra kaatangan min. Sabap ra sotopot no, ngaangai' ru gitio mangindangan ramuyun.

Togom ri Kristus

¹⁴ Ginio ra aku migulatur, koson makiasi' ri Ama'.

¹⁵ Io no ondo' mangani' ra painawo ra ngaangai' maayag giu' ra suruga' am niayuk giti ra tana' ti.

¹⁶ Makiasi' aku Riso, ra intor ra kalangkayaan ru barakat Nano, mangani' Io ramuyun ra Ambiluo Nano, koson mampaikang ra guang mino,

¹⁷ am koson ra i Kristus rumondon ra guang min mansail ra pangintapatan. Am makiasi' aku poyo koson togom Nano masauk ra puun ru paliso mino,

¹⁸ koson akau am ngaangai' ulun ri Aki Kapuuno' makaintutun ra kinapila', kinaawar, kinasawat am kinalandom ru togom ri Kristus no.

¹⁹ Ginio maalur poyo intor ra pangkaraan ru ulun. Bagu no makapaliso kau ra moonsoi toojo, mogondo' ra ngaangai' ru kinatanda' ri Aki Kapuuno'.

²⁰ Koompor noyo i Aki Kapuuno', ondo' mansail ra kuasa' Nano ondo' mangandoi ra guang takau maalap kabaal mulu' poyo intor ra atan ayuk kitaakon kapoam guangon takau.

²¹ Koompor noyo Io ra pasimpungan ulun Kristian ralalom inggalan ri Kristus Jisus, suku' ra ati ayuk papag ra sabuoi-buoi no. Amin!