IMAMAT 8 - Tanou Moonsoi Timugon

Patimpokon i Arun am anak-anak nano

¹ Indagu Tuhan ri Musa,

² “Ibito' i Arun am anak-anak nano mongoi ra kulobon ru Kim Kuno, am ibito' niayuk bayang ru imam, umau upacara, sapi' gawayan mamulok tayar ra taak simbalui koson mangampun ra tula, ruo ngainan domba gawayan, am sambakul ruti' ondo' kalo latakin ra ragi.

³ Timungo' ngaangai' ulun ru Israil giu' ra kulobon ru Kim Kuno.”

⁴ Binaal ri Musa atan ondo' nanusuban ru Tuhan. Pakatimung ngai' ulun no,

⁵ indagu i Musa risilo, “Atan ondo' baalon kutu raino ti iono susuban ru Tuhan.”

⁶ Ibito' boo ri Musa i Arun am anak-anak nano mongoi ra saang, am baalo' boo upacara mariu' risilo.

⁷ Kopongo raginio pambayango' ri Musa i Arun ra bayang imam: bayang maayo, sukub am abot. Pabayango' no niayuk efod no ri Arun. Efod no binangkos ri Musa ra abot ondo' tinuyu' ra awak ri Arun.

⁸ Pautawo' niayuk ri Musa utau no ri Arun am pasuango' Urim am Tumim ralalom ru utau no.

⁹ Pasampako' ri Musa serban ra ulu ri Arun, am tampilon ra saang ru serban no patakino' ri Musa limpor mas koson tatandu' patimpokon, koson ra nanusuban ru Tuhan.

¹⁰ Alapo' boo ri Musa umau upacara am paluito' no ra Kim Tuhan am ngaangai' ondo' soroi ra ralalom no. Koon ragitio patimpokon no Kim no ra Tuhan.

¹¹ Alap io ra sanganu intor ra umau no am patakiso' no intulu' ra rasawat ru altar am kuliamos no, am niayuk ra bisin am niayuk antulan no, koson patimpokon ngaangai' no ra Tuhan.

¹² Patimpokon ri Musa i Arun ra umau upacara pasasaron no ra ulu ri Arun.

¹³ Ibito' boo ri Musa i Arun am anak-anak nano mongoi ra saang. Pambayango' ilo ri Musa ra bayang maayo am abot, am pansigalo' no ilo, koson ra nanusuban ru Tuhan.

¹⁴ Kopongo raginio pagibit i Musa ra sanginan sapi' gawayan mamulok ra tayar ru taak simbalui mangampun ra tula, pabantaa' boo ri Arun am anak-anak nano kalindu' nilo ra rasawat ru ulu ru sapi' no.

¹⁵ Simbaluyo' boo ri Musa sapi' no am alapo' sanganu raraa' no. Ra bubua' ru kalindu', pakupilo' boo ri Musa raraa' no ra sangau ru altar koson patimpokon no. Pasasaro' no suwo ru raraa' no ra tampilon ragana' ru altar. Ginio noyo ralan ri Musa napakapasau ra altar no am patimpokon no ra Tuhan.

¹⁶ Alap i Musa ra ngaangai' lomok ondo' soroi ra kalabuat ru sapi' no, tayar moonsoi kaga' intor ra angkayau ru sapi' am angkawa' nakaaya' lomok no, solobo' no ngaangai' no giu' ra rasawat ru altar.

¹⁷ Alap io ra suwo ru sapi' no pinaaya' kungkung, kual am tinai' no, solobo' no boo ngaangai' no giu' ra liwar ru pangkiman, koson ra nanusuban ru Tuhan.

¹⁸ Kopongo raginio pagibit boo i Musa sanginan domba gawayan koson ra tayar ru taak simbalui koson mapabansuk ra guang ru Tuhan, am pabantaa' boo ri Arun am anak-anak nano kalindu' nilo ra rasawat ru ulu ru domba gawayan no.

¹⁹ Simbaluyo' ri Musa domba gawayan no am pawaso' raraa' no ra kaapat-apat sapapa' ru altar.

^20-21 Puputulo' no domba gawayan no, kalabuat am paa ru domba no binaguan ra timug. Solobo' no boo ulu, lomok am suwo ru domba gawayan no giu' ra rasawat ru altar, koson ra nanusuban ru Tuhan. Taak simbalui koson mapabansuk ra guang ru Tuhan ti iono taak akanon, am owou no mapabansuk ra guang ru Tuhan.

²² Kopongo raginio pagibit i Musa ra sanginan domba gawayan poyo tayar ru patimpokon ra imam, pabantaa' boo ri Arun am anak-anak nano kalindu' nilo ra rasawat ru ulu ru kambing no.

²³ Simbaluyo' ri Musa domba gawayan no. Pangalap io boo sanganu raraa' ru domba no am pakupilo' ra talingo pamiris ri Arun, am ra pangina' ru bubua' kalindu' ra pamiris nano, am niayuk ra pangina' ru bubua' kalayam ra pamiris nano.

²⁴ Ibito' boo ri Musa anak-anak ri Arun no giu' ra saang. Pakupilo' boo ri Musa sanganu raraa' ru domba no ra talingo ra pamiris nilo, ra pangina' ru bubua' kalindu' ra pamiris nilo, am niayuk ra pangina' ru bubua' kalayam ra pamiris nilo. Pawaso' boo ri Musa suwo ru raraa' no ra kaapat-apat sapapa' ru altar.

²⁵ Alap i Musa ra lomok ru domba no, am niayuk iku' ondo' mokolomok, lomok ondo' nokolopot ra kalabuat no, tayar ra moonsoi kaga' intor ra angkayau no, angkawa' pabayaan ra lomok no am paa ra pamiris ru domba no.

²⁶ Kopongo raginio, alap i Musa rondo' ruti' intor ra sambakul ruti' ondo' kalo linatakan ra ragi, ondo' patimpokon noyo ra Tuhan, am niayuk rondo' ruti' makakapal ondo' binaal ra umau, am niayuk rondo' ruti' malilis, ngaangai' no patampako' no boo ra rasawat ru lomok am paa ra pamiris ru domba gawayan no.

²⁷ Pabantaa' no ngaangai' akanon no ra kalindu' ri Arun am anak-anak nano, am pataako' nilo boo ngaangai' no koson ra taak lilion ra Tuhan.

²⁸ Alapo' boo ri Musa akanon no intor risilo am solobo' no giu' ra rasawat ru altar, ralimbou ru taak simbalui koson mapabansuk ra guang ru Tuhan, koson ra taak simbalui ondo' pataakon paat ra imam patimpokon. Taak simbalui ti iono taak akanon, am owou no mapabansuk ra guang ru Tuhan.

²⁹ Kopongo raginio alap i Musa ra kubab ru domba no am pataako' no koson ra taak lilion ra Tuhan. Ginio noyo tayar ri Musa intor ra domba gawayan ondo' pataakon koson patimpokon ra imam. Nambaal i Musa ra ngaangai' no koson ra nanusuban ru Tuhan.

³⁰ Alap i Musa sanganu umau upacara am niayuk sanganu raraa' ondo' giu' ra rasawat altar, am patakiso' no ginio ri Arun am anak-anak nano am niayuk ra bayang nilo. Gitio noyo ralan ri Musa mambaal ra patimpokon risilo am niayuk bayang nilono ra Tuhan.

³¹ Indagu i Musa ri Arun am anak-anak nano, “Ibito' kual ru taak simbalui ti giu' ra kulobon ru Kim ru Tuhan am tonoko' kual no ra giu' no. Musiti' min akanon ra giu' no ginio am ruti' ondo' pataakon paat ra imam patimpokon, iono ruti' ondo' soroi ralalom ru bakul, koson ra nanusuban ru Tuhan.

³² Solobo' ngaangai' suwo ru kual am ruti'.

³³ Pai' kau ingkual intor ra kulobon ru Kim no buoi tulu' ngoorou, saboi mopongo upacara patimpokon ramuyun no.

³⁴ Manaak Tuhan ra susuban maa' raginio atan ondo' baalon takau orou raiti', baalon niayuk rayuso', ra upacara ragitio ampunon tula mino.

³⁵ Musiti' kau soroi giu' ra kulobon ru Kim ru Tuhan orou am rondom buoi tulu' ngoorou, koson mambaal ra atan ondo' nanusuban noyo ru Tuhan. Amon ru kalo matoi kau. Baal ragitio noyo ondo' nanusuban ru Tuhan.”

³⁶ Ginii noyo nambaal i Arun am anak-anak nano ra ngaangai' ondo' nanusuban ru Tuhan ondo' pinabala' galing ri Musa.