IMAMAT 7 - Tanou Moonsoi Timugon

Taak simbalui koson mambayar ra kalubatan

¹ Gitio noyo aturan ra taak simbalui koson mambayar ra kalubatan; taak simbalui ti matulai kaga'.

² Bibiag ru taak simbalui ragitio musiti' simbaluyon giu' ra tampilon ralayo ru altar, intok manimbalui ra bibiag tayar ru taak simbalui koson mapabansuk ra guang ru Tuhan, am raraa' no musiti' pawason ra kaapat-apat sapapa' ru altar no.

³ Ngaangai' lomok ru bibiag no musiti' pasuayon am pataakon giu' ra rasawat ru altar: Iku' ondo' mokolomok, lomok nokolopot ra kalabuat,

⁴ angkawa' pabayaan ra lomok no, am niayuk tayar ra moonsoi kaga' intor ra angkayau ru bibiag no.

⁵ Ngaangai' lomok no musiti' solobon ru imam ra rasawat ru altar koson ra taak akanon ra Tuhan; taak simbalui ti iono taak simbalui koson mambayar ra kalubatan.

⁶ Moonong ungkuyon intor ra sasambaloi ru imam makaakan ra kual ru taak simbalui ragitio, kaa' musiti' nilo akanon ginio giu' ra intok mapasau sabap ra taak simbalui ti matulai kaga'.

⁷ Aturan ondo' nogondo' masauk ra taak simbalui koson mangampun ra tula am taak simbalui koson mambayar ra kalubatan: Kual ru bibiag no masauk ra longgom ru imam ondo' mapataak ra taak simbalui no.

⁸ Kungkung ru bibiag ondo' pinataak tayar ru taak simbalui koson mapabansuk ra guang ru Tuhan, masauk ra longgom ru imam ondo' mapataak ra taak simbalui no.

⁹ Moonong taak simbalui koson paringkuanangan ra Tuhan, ondo' kia taak simbalui inansak ralalom ru oven, kapoam inansak ralalom ru paliuk, kapoam inansak ralalom ru pamanggangan, masauk ra longgom ru imam ondo' mapataak ra taak simbalui no.

¹⁰ Kaa' ngaangai' taak simbalui koson paringkuanangan ra Tuhan, iono taak simbalui ondo' kalo poyo inansak, ondo' linatakan noyo ra umau kapoam ondo' mapua', masauk ra longgom ru imam papag ri Arun am musiti' tatayaron pogondoon ra gino ngai' nilo.

Taak simbalui koson makibarakat ra Tuhan

¹¹ Gitio noyo aturan ra taak simbalui koson makibarakat ra Tuhan ondo' pataakon ra Tuhan.

¹² Amon ru mapataak sasangulun no koson ra taak paringkuanangan ri Aki Kapuuno', musiti' io mapataak ra ruti' ondo' kalo linatakan ra ragi pabayaan ra bibiag ondo' pataakon no. Ruti' no kakapalon ayuk pana, ondo' baalon intor ra tapung latakin ra umau jaitun, kapoam ruti' malilis ondo' luitin ra umau jaitun, kapoam kuui ondo' baalon intor ra tapung ondo' latakin ra umau jaitun.

¹³ Suai raginio, musiti' io niayuk mapataak ra ruti' ondo' baalon latakin ra ragi.

¹⁴ Musiti' io mapataak ra santayaran intor ra moonong salinut ru ruti' no koson ra taak lilion ra Tuhan; ngaangai' ti masauk ra longgom ru imam ondo' mangalap ra raraa' ru bibiag no, am pawason no boo ginio ra altar.

¹⁵ Kual no musiti' akanon paat ra orou papataakan ra bibiag no; kalo patatangon sanganu pana saboi ra suabon no.

¹⁶ Paat ra sasangulun mapataak ra taak simbalui koson makibarakat ra Tuhan, ra kuayan manugut ra nazar nano kapoam koson ra taak ondo' pataakon no ayuk toojo, kalo pana akanon ngaangai' taak simbalui raginio paat ra orou papataakan ra taak simbalui no. Suwo no maakan ra suabon no.

¹⁷ Kaa' amon ru lakat poyo makasuwo ru kual saboi ra orou katalu, kual no musiti' solobon ngaangai'.

¹⁸ Amon ru sanganu pana intor ra suwo ru kual no akano' paat ra orou katalu, kalo apuon ri Aki Kapuuno' taak simbalui no. Kalo masauk taak simbalui no ra barakat ra ulun raginio, kaa' masauk ra kalo matulai. Osoi ayuk ondo' mangakan ra suwo ru kual no makasala am musiti' mansaan ra kinibit no.

¹⁹ Kual ondo' nakatiu' ra atan ayuk ondo' majamol kalo maakan, kaa' musiti' solobon ngaangai' no. Ulun ondo' kalo majamol makaakan ra kual intor ra taak simbalui raginio.

²⁰ Amon ru mangakan sasangulun ra kual no paat ra io majamol, kalo boo karaan io ra ulun ri Aki Kapuuno'.

²¹ Paat ra mangambong sasangulun no ra ondo' majamol, am mangakan boo ulun no ra kual ru bibiag ondo' pinataak noyo, kalo boo karaan ulun no ra ulun ri Aki Kapuuno'.

²² Nangani' Tuhan ri Musa ra aturan ragitio

²³ ra tayar ru ulun ru Israil. Kalo maakan no lomok ru sapi', domba kapoam kambing.

²⁴ Lomok intor ra bibiag ondo' matoi toojo kapoam ondo' sinaam ru bibiag masigo, kalo maakan kaa' alapon koson pakuan ra bokon.

²⁵ Ulun ondo' mangakan ra lomok intor ra bibiag ondo' pataakon koson taak akanon ra Tuhan, kalo boo karaan ra ulun ri Aki Kapuuno'.

²⁶ Ati ayuk ayanan ru ulun ru Israil, kalo toojo makaakan ilo ra raraa' ru susuit kapoam raraa' ru bibiag.

²⁷ Osoi ayuk manggal ra aturan ti kalo boo karaan ra ulun ri Aki Kapuuno'.

²⁸ Nanaak Tuhan ri Musa ra aturan ragitilo

²⁹ ra tayar ru ulun ru Israil. Osoi ondo' mapataak ra taak simbalui koson makibarakat ra Tuhan, musiti' mapataak santayaran ra taak no koson taak lilion ra Tuhan.

³⁰ Musiti' ulun no galama' magibit ra taak simbalui no koson taak akanon. Musiti' io magibit ra lomok am kubab ru bibiag no, am pataakon no koson ra taak lilion ra Tuhan.

³¹ Musiti' lomok no solobon ru sangulun imam giu' ra rasawat ru altar, kaa' kubab ru bibiag no longgom ru imam-imam.

³² Musiti' paa ra pamiris ru bibiag no pataakon koson ra taak lilion

³³ ra imam ondo' mapataak ra raraa' am lomok intor ra taak simbalui koson makibarakat ra Tuhan no.

³⁴ Kubab am paa ra pamiris ru bibiag no iono taak lilion ondo' alapon ru Tuhan intor ra ulun Nano koson taakin ra imam-imam. Tayar ragitio noyo ondo' musiti' taakin ru ulun ru Israil ra imam ra sabuoi-buoi no.

³⁵ Gitio noyo tayar ru taak akanon ra Tuhan ondo' pataakon ri Arun am anak-anak nano paat ra orou ilo patimpokon ra imam.

³⁶ Paat ra orou raginio manusub Tuhan ra ulun ru Israil maa' raginio manaak ra tayar ragitio ra imam-imam. Gitio noyo aturan ondo' musiti' gagayaan ru ulun ru Israil ra sabuoi-buoi no.

³⁷ Ginio noyo aturan ra taak simbalui koson mapabansuk ra guang ru Tuhan, taak simbalui koson paringkuanangan ra Tuhan, taak simbalui koson mangampun ra tula, taak simbalui koson mambayar ra kalubatan, taak simbalui ondo' pataakon paat ra patimpokon, am taak simbalui koson makibarakat ra Tuhan.

³⁸ Nanaak Tuhan ri Musa ra susuban-susuban ragitio giu' ra rasawat ru Gunung Sinai, giu' ra tana' kaagisan no, paat ra orou Io nanusub ra ulun ru Israil mapataak ra taak simbalui nilo.